Ёрдысьяс 16 - Коми Библия 2023

Самсон да Далида

¹ Ӧтчыд Самсон локтіс Газа карӧ, аддзис сэні кырсалысь аньӧс да пырис сы ордӧ.

² Кор Газаын олысьяс тӧдмалісны Самсонлӧн локтӧм йылысь, найӧ кытшалісны карсӧ да виччысисны сылысь петӧмсӧ карса дзиръя дорын. Найӧ войбыд сулалісны сэні. Мӧвпалісны, мый шонді петтӧдз Самсонӧс виасны.

³ Самсон войшӧрӧдзыс узис. Сэсся чеччис да муніс карса дзиръя дорӧ, нетшыштіс дзиръясӧ иганнас да куричнас, пуктіс пельпом вылас да нуис Хеврон карлы воча сулалысь керӧс вылӧ. [Сэтчӧ колис дзиръясӧ.]

⁴ Кад мысти Самсонлы мусмис Далида нима ань, коді оліс Сорек ковтысын.

⁵ Ань дінӧ локтісны филистимса юралысьяс да шуисны: «Тэ тӧдмав Самсоныдлысь, кытысь сылӧн ыджыд выныс, и кыдзи сійӧс позьӧ вермыны. Сэсся ми кӧрталам сійӧс, и сійӧ лоас миян киын. Таысь ми быдӧн сетам тэныд сюрс сё сикель эзысь».

⁶ Далида юаліс Самсонлысь: «Висьтав меным, кытысь тэнад ыджыд выныд. Кыдзи тэнӧ позьӧ кӧртавны да вермыны?»

⁷ Самсон вочавидзис сылы: «Кӧртавны кӧ менӧ косьмытӧм сизим уль сӧнӧн, сэки ме вынтӧмма да мукӧд йӧзыс кодь лоа».

⁸ Филистимса юралысьяс вайисны аньлы косьмытӧм сизим уль сӧн, и Далида кӧрталіс Самсонӧс.

⁹ Далидалӧн ӧти жырйын пукалісны филистимса кыйӧдчысьяс. Далида шуис: «Самсон, филистимсаяс локтӧны!» Самсон орйӧдліс гартӧм сӧнъяссӧ биӧн сотӧм шӧртӧс моз. Сылысь вынсӧ эз ло тӧдмалӧма.

¹⁰ Далида шуис Самсонлы: «Тэ менӧ ылӧдлін, менӧ пӧръялін. Висьтав меным, мыйӧн тэнӧ позьӧ кӧртавны».

¹¹ Самсон вочавидзис: «Кӧртавны кӧ менӧ выль гезйӧн, мыйӧн эз на вӧдитчывны, сэки ме вынтӧмма да мукӧд йӧзыс кодь лоа».

¹² Далида босьтіс выль гез, кӧрталіс Самсонӧс да шуис: «Самсон, филистимсаяс локтӧны!» Самсон сунисӧс моз орйӧдліс гезсӧ кисьыс. Та дырйи ӧти жырйын пукалісны филистимса кыйӧдчысьяс.

¹³ Далида шуис Самсонлы: «Тэ менӧ ылӧдлін, менӧ бара пӧръялін. Висьтав, мыйӧн тэнӧ позьӧ кӧртавны». Самсон вочавидзис: «Менсьым сизимнан кӧсаӧс кӧ кыан дӧраӧ да тувъялан кысян стан бердас, сэки ме вынтӧмма [да мукӧд йӧзыс кодь лоа]».

¹⁴ [Самсон пуктіс юрсӧ Далидалы пидзӧс вылас, и Далида унмовськӧдіс сійӧс.] Самсонлӧн узигкості Далида кыис сылысь сизимнан кӧсасӧ дӧраӧ да тувъяліс кысян стан бердас. Сэсся шуис: «Самсон, филистимсаяс локтӧны!» Самсон садьмис да дӧрасӧ кысян стансьыс нетшыштіс. [Сылысь вынсӧ эз ло тӧдмалӧма.]

¹⁵ Далида шуис Самсонлы: «Тэ шуан, мый радейтан менӧ, а сьӧлӧмыд абу мекӧд! Тэ куимысь нин ылӧдлін менӧ да эн висьтав меным ыджыд выныд йылысь».

¹⁶ Быд лун сійӧ дӧзмӧдіс Самсонӧс аслас юасьӧмнас. Самсон жуявтӧдз мудзис

¹⁷ да восьтіс ассьыс гусяторсӧ: «Менсьым юрсиӧс ньӧтчыдысь на эз шырлыны, ӧд мам кынӧмсянь ме Енлы торйӧдӧм назорей. Вундыны кӧ менсьым юрсиӧс, вынӧй бырас. Ме вынтӧмма да мукӧд йӧзыс кодь лоа».

¹⁸ Кор Далида гӧгӧрвоис, мый Самсон восьтіс гусяторсӧ, сійӧ мӧдӧдіс корны филистимса юралысьясӧс. Тшӧктіс висьтавны: «Локтӧй. Ӧні Самсон збыльысь восьтіс меным гусяторсӧ». Филистимса юралысьяс локтісны Далида ордӧ да вайисны сылы эзысь.

¹⁹ Далида унмовськӧдіс Самсонӧс пидзӧс вылас, сэсся корис мортӧс, коді шырис Самсонлысь сизимнан кӧсасӧ. Тадзи Самсонӧс вӧлі вермӧма, и сылӧн выныс бырис.

²⁰ Далида шуис: «Самсон, филистимсаяс локтӧны!» Самсон садьмис. Сійӧ мӧвпыштіс, мый воддза мозыс мынтӧдчас наысь. Но сійӧ эз тӧд, мый Господь эновтіс сійӧс.

²¹ Филистимсаяс босьтісны Самсонӧс да бытшкисны сылысь кыкнан синсӧ. Сэсся вайӧдісны сійӧс Газа карӧ да кӧрталісны ыргӧн чепъясӧн. Дзескыдінын сылы ковмис изны нянь.

²² А шырӧм юрсиыс бара кутіс быдмыны.

²³ Филистимса юралысьяс чукӧртчисны, медым гажӧдчыны да вайны уна вись асланыс Дагон енлы. Найӧ шуалісны, миян енным пӧ сетіс миян киӧ Самсонӧс, вӧрӧгнымӧс.

²⁴ Самсон вылӧ видзӧдігӧн филистим войтыр ошкис ассьыс енсӧ. Найӧ шуалісны, миян енным пӧ сетіс миян киӧ вӧрӧгнымӧс, коді куштіс мунымӧс да миян пӧвстысь унаӧс виис.

²⁵ Войтырыс ёна гажмис. Найӧ шуисны, вайӧдӧй пӧ Самсонӧс дзескыдінысь, мед сійӧ гажӧдыштас миянӧс. Самсонӧс вайӧдісны, и йӧзыс кутісны тешитчыны сы вылын. Сійӧс сувтӧдісны кык сюръя костӧ.

²⁶ Самсон шуис сійӧс киӧдыс нуӧдысь том мортлы: «Матыст менӧ керкасӧ кутысь сюръяяс дорас, медым меным мыджсьыны на вылӧ». [Том морт тадзи и вӧчис.]

²⁷ Йӧзыс вӧлі керка тыр: айулов и аньяс, тшӧтш филистим войтырлӧн став юралысьыс. Керка вевт вылас вӧлі нӧшта куим сюрс айлов да ань, кодъяс видзӧдісны Самсон вылын тешитчӧмсӧ.

²⁸ Самсон шыасис Господь дінӧ: «Господьӧй Ыджыдӧй, эн вунӧд менӧ! Енмӧй, нӧшта ӧтчыдысь сет меным вын, медым ме кыкнан син вӧсна верми водзӧс перйыны филистимсаяслысь».

²⁹ Самсон вӧрзьӧдіс керка шӧрын сулалысь кыкнан сюръясӧ, мый вылӧ мыджсис керкаыс. Ӧтар сюръяас сійӧ пыксис веськыд кинас, мӧдарас – шуйганас.

³⁰ «Мед ме филистимсаяскӧд кула!» – горӧдіс Самсон да кыкнан кинас мый вынсьыс пыксис сюръяясӧ. Керкаыс киссис филистимсаяс да налӧн юралысьяс вылӧ. Кулігас Самсон виис олігас дорысь унджык мортӧс.

³¹ Самсонлӧн вокъясыс став рӧдвужыскӧд локтісны босьтны сылысь шойсӧ. Самсонӧс дзебисны Цора да Эштаол каръяс костӧ, Маной батьыслӧн дзебанінӧ. Израиль войтырлы ёрдысьӧн Самсон вӧлі кызь во. [Самсон бӧрын сувтіс Энанлӧн Эмегар пиыс, коді тшӧтш мездіс Израиль войтырӧс. Сійӧ бырӧдіс филистим войтырысь квайтсё мортӧс да налысь ыж-мӧссӧ.]