Ёрдысьяс 15 - Коми Библия 2023

Филистимасаяслысь водзӧс перйӧм

¹ Бӧрынджык, кор вӧлі шобді вундан кад, Самсон локтіс гӧтырыс ордӧ. Аскӧдыс сійӧ вайис кӧзапиӧс. Самсон шуис: «Кӧсъя пырны гӧтырӧй дінӧ сылӧн вежӧсас». Но гӧтырыслӧн батьыс эз лэдз Самсонӧс,

² шуис сылы: «Ме чайті, мый тэ мустӧмтан сійӧс, та вӧсна ме сеті сійӧс тэнад кӧлысьвывса ёртыд сайӧ. Но гӧтырыдлӧн ичӧтджык чой эм, сы дорысь на мичаджык, верман чойсӧ босьтны сы пыдди».

³ Самсон шуис сылы: «Ӧні ті, филистимсаяс, асьныд мыжаӧсь, мый ме кута тіянлысь водзӧс перйыны».

⁴ Самсон муніс, кыйис куимсё ручӧс, кӧртавліс найӧс кыкӧн-кыкӧн бӧжӧдныс ӧта-мӧд бердас да пысавліс бӧж костаныс факел.

⁵ Факелъяссӧ ӧзтӧм бӧрын сійӧ лэдзаліс ручьяссӧ филистимсаяслӧн видз-муяс вылӧ. Тадзи сотіс налысь нянь кольтаяссӧ да вундытӧм няньсӧ, виноград йӧръяссӧ да олив пуяссӧ.

⁶ «Коді тайӧс вӧчис?» – юалісны филистимсаяс. Налы вочавидзисны: «Самсон, тимнаса мортлӧн зятьыс, сы вӧсна мый тимнаса морт сетіс Самсонлысь гӧтырсӧ кӧлысьвывса ёртыс сайӧ». Филистимсаяс мунісны Тимнаӧ да сотісны тайӧ аньсӧ да сылысь батьсӧ [керканас].

⁷ А Самсон шуис тайӧ филистимсаяслы: «Сыысь, мый ті тадзи вӧчинныд, ме ог лӧнь, кытчӧдз водзӧс ог перйы тіянлысь!»

⁸ Филистимсаясӧс чорыда нӧйтӧм бӧрын сійӧ муніс Этам изкыртаӧ да овмӧдчис сэтчӧс кырта горсйӧ.

⁹ Филистимса тышкайӧз петісны тышӧ, сувтісны Иуда муӧ да паськӧдчисны Лехи карӧдз.

¹⁰ Иудаын олысьяс юалісны: «Мыйла ті кӧсъянныд уськӧдчыны миян вылӧ?» Найӧ вочавидзисны: «Ми локтім Самсонла, медым вӧчны сылы, кыдзи сійӧ вӧчис миянлы».

¹¹ Иуда муысь куим сюрс морт локтіс Этам изкыртаӧ. Найӧ шуисны Самсонлы: «Тэ ӧмӧй он тӧд, мый филистимсаяс ыджыдалӧны миян вылын? Мый тэ вӧчин миянкӧд?» Самсон вочавидзис налы: «Кыдзи найӧ вӧчисны меным, сідзи ме вӧчи налы».

¹² Иуда муысь локтысьяс шуисны: «Ми локтім тэла, медым кӧртавны тэнӧ да сетны филистимсаяслы». Самсон шуис налы: «Кыв сетӧй меным, мый онӧ виӧй менӧ».

¹³ Самсонлы вочавидзисны: «Ми огӧ виӧй тэнӧ, сӧмын кӧртавлам да сетам филистимсаяслы». Самсонӧс кӧртавлісны кык выль гезйӧн да петкӧдісны изкыртаысь.

¹⁴ Кор Самсон воис Лехи карӧ, филистимсаяс горзӧмӧн паныдалісны сійӧс. Господьлӧн Лолыс лэччис Самсон вылӧ. Сэки кисӧ кӧрталӧм гезъясыс сотчӧм шабді моз гылалісны.

¹⁵ Самсон аддзис неважӧн на кулӧм осёллысь черлысӧ, босьтіс сійӧс киас да виис сыӧн сюрс филистимсаӧс.

¹⁶ Самсон шуис: «Осёл черлыӧн лыдтӧм-тшӧттӧм йӧзӧс вии. Осёл черлыӧн сюрс мортӧс вии».

¹⁷ Тайӧс шуӧм бӧрын шыбитіс кисьыс черлысӧ. Тайӧ местасӧ нимтіс Рамат-Лехиӧн.

¹⁸ Самсонлӧн ёна косьмис горшыс. Сійӧ шыасис Господь дінӧ: «Тэ сетін меным, аслад кесйӧглы, ыджыд вермӧм. А ӧні ме горш косьмӧмӧйла кула, вундыштчытӧмъяслӧн киӧ веськала».

¹⁹ Сэки Лехи карын Енмыс поткӧдіс мусӧ, кытысь кутіс визувтны ва. Самсон веськӧдіс горшсӧ, вынсяліс да ловзис. Та вӧсна тайӧ местаыс шусьӧ Эн-Хаккоре, и сійӧ ӧнӧдз Лехи карын.

²⁰ Самсон вӧлі Израиль войтырлы ёрдысьӧн кызь во филистимсаяслӧн ыджыдалӧм дырйи.