Ёрдысьяс 14 - Коми Библия 2023

Самсон да тимнаса ныв

¹ Самсон ветліс Тимнаӧ, сэні сійӧ аддзыліс филистимса нылӧс [и нылыс сылы сьӧлӧм вылас воис].

² Гортас локтӧм бӧрын Самсон шуис бать-мамыслы: «Тимнаын ме аддзылі филистимса нылӧс. Босьтӧй сійӧс меным гӧтырӧ».

³ Бать-мамыс сылы шуисны: «Оз ӧмӧй миян чужанкотыр либӧ войтыр пӧвстысь сюр тэныд гӧтырыс? Мыйла тэ кӧсъян босьтны гӧтырӧ вундыштчытӧм филистим войтыр пӧвстысь нылӧс?» Самсон шуис батьыслы: «Босьт сійӧс меным, ӧд сійӧ меным сьӧлӧм вылӧ воис».

⁴ Бать-мамыс эз тӧдны, мый тайӧ вӧлі Господьсянь, ӧд Господь кӧсйис филистимсаяслысь водзӧс перйыны. Сійӧ кадас филистимсаяс ыджыдалісны Израиль вылын.

⁵ Самсон мӧдӧдчис бать-мамыскӧд Тимнаӧ. Сэтчӧс виноград йӧрлань матыстчигӧн сылы воча равзігтырйи уськӧдчис том лев.

⁶ Господьлӧн Лолыс лэччис Самсон вылӧ, и Самсон куш кинас косявліс левӧс кӧзапиӧс моз. Но тайӧ лоӧмтор йывсьыс бать-мамыслы эз висьтав.

⁷ Тимнаӧ локтӧм бӧрын Самсон сёрнитіс нывкӧд, коді вӧлі сылы сьӧлӧм сертиыс.

⁸ Некымын лун мысти Самсон бара муніс Тимнаӧ, медым босьтны тайӧ нывсӧ аслыс гӧтырӧ. Мунігмозыс сійӧ кежис видзӧдлыны левлысь шойсӧ, а шой пытшкысь аддзис мазі поз да ма.

⁹ Самсон босьтіс масӧ ки тырыс да сёйис мунігмозыс. Бать-мамыс дінӧ локтӧм бӧрас сетіс масӧ тшӧтш налы, и найӧ сёйисны. Но Самсон эз висьтав налы, мый тайӧ масӧ босьтіс лев шой пытшкысь.

¹⁰ Самсонлӧн батьыс локтіс гӧтырпу керкаӧ, кӧні Самсон лӧсьӧдіс [сизимлунся] гаж, кыдзи вӧчлывлӧны верӧспуяс.

¹¹ Самсонӧс аддзӧм бӧрын тимнаса олысьяс бӧрйисны кӧлысьвывса комын ёртӧс, медым найӧ вӧліны сыкӧд.

¹² Самсон шуис налы: «Ме висьтала тіянлы нӧдкыв. Сизим лун чӧжнас, мый дыра лоӧ гажыс, ті кӧ тӧдмаланныд менсьым нӧдкывйӧс, ме сета тіянлы комын вӧсни шабді дӧрӧм да комын вежан паськӧм.

¹³ А онӧ кӧ тӧдмалӧй, ті меным сетанныд комын вӧсни шабді дӧрӧм да комын вежан паськӧм». Найӧ вочавидзисны: «Висьтав ассьыд нӧдкывтӧ. Кывзам».

¹⁴ Самсон шуис: «Сёйысьлӧн пытшкӧсысь петіс сёян, выналӧн пытшкӧсысь – юмовтор». Куим лун чӧжӧн ёртъясыс зілисны тӧдмавны нӧдкывсӧ, но эз вермыны.

¹⁵ Сизимӧд луннас найӧ шуисны Самсонлӧн гӧтырлы: «Кыскы верӧсыдлысь, мед восьтас нӧдкывсӧ. А он кӧ, ми сотам тэнӧ да батьыдлысь керкасӧ. Миянӧс куштыны кӧсъянныд, та вӧсна-ӧ коринныд миянӧс татчӧ?»

¹⁶ Самсонлӧн гӧтырыс бӧрдӧмӧн шуис верӧсыслы: «Тэ мустӧмтан менӧ, ме абу муса тэныд. Менам войтырлы висьталӧм нӧдкывтӧ мыйла он гӧгӧрвоӧд меным?» Самсон вочавидзис сылы: «Ме весиг бать-мамлы эг гӧгӧрвоӧд, и тэныд ог».

¹⁷ Гаж мунігчӧжыс гӧтырыс бӧрдӧмнас дӧзмӧдіс Самсонӧс. Сизимӧд луннас Самсон гӧгӧрвоӧдіс сылы нӧдкывсӧ, ӧд гӧтырыс пикӧ воштіс сійӧс. Гӧтырыс гӧгӧрвоӧдіс нӧдкывсӧ аслас войтырлы.

¹⁸ Сизимӧд луннас, шонді пуксьытӧдзыс, карса олысьяс шуисны Самсонлы: «Маысь юмолыс да левысь вынаыс абу». Самсон вочавидзис налы: «Менам мӧскӧн кӧ энӧ гӧрӧй, менсьым нӧдкывйӧс эськӧ энӧ тӧдмалӧй».

¹⁹ Господьлӧн Лолыс лэччис Самсон вылӧ. Самсон муніс Аскалонӧ да виис сэні комын мортӧс, пӧрччӧдіс на вылысь паськӧмсӧ да сетіс налы, кодъяс тӧдмалісны сылысь нӧдкывсӧ. Скӧрйывсьыс сійӧ бӧр муніс бать керкаас.

²⁰ А Самсонлысь гӧтырсӧ сетісны Самсонлӧн кӧлысьвывса ёртыс сайӧ.