Ёрдысьяс 13 - Коми Библия 2023

Самсонлӧн чужӧм

¹ Израиль войтыр бара кутіс вӧчны Господь водзын шогмытӧмсӧ. Таысь Господь сетіс найӧс филистимсаяс киӧ нелямын во кежлӧ.

² Тайӧ кадас Цора карын оліс Дан чужанкотырысь Маной нима морт. Сылӧн гӧтырыс эз вермы сьӧктыны.

³ Господьлӧн андел петкӧдчис Манойлӧн гӧтырыслы да шуис: «Ӧнӧдз тэ эн вермы сьӧктыны, но тэ сьӧктан да чужтан пиӧс.

⁴ Сідзкӧ, вина-сур эн ю, пеж сёян эн сёй,

⁵ ӧд тэ сьӧктан да чужтан пиӧс, коді мам кынӧмсяньыс лоӧ Енлы торйӧдӧм назорей. Сылысь юрсисӧ шырны оз позь. Сійӧ сувтас мездыны Израильӧс филистимсаяслӧн киысь».

⁶ Ань локтіс верӧсыс дінӧ да висьталіс сылы: «Ме дінӧ воліс Енлӧн морт. Сійӧ вӧлі Енлӧн андел кодь, вежавидзана да повзьӧдана. Ме эг юав, кытысь сійӧ локтіс, и ассьыс нимсӧ сійӧ эз висьтав.

⁷ Сійӧ шуис меным, мый ме сьӧкта да чужта пиӧс. Сійӧ ӧлӧдіс менӧ вина-сур юӧмысь да пеж сёян сёйӧмысь, ӧд менам кынӧмсянь кагаӧс лоӧ торйӧдӧма Енлы. Кувтӧдзыс сійӧ лоӧ назорейӧн».

⁸ Маной кевмысис Господьлы. Сійӧ шуис: «Господьӧй! Мед бара на волас миян дінӧ Енлӧн мортыс, кодӧс Тэ мӧдӧдлін. Сійӧ мед велӧдас миянӧс, мый вӧчны кагаыскӧд, коді миян чужас».

⁹ Ен кыліс Манойӧс. Енлӧн андел бара на локтіс сылӧн гӧтырыс дінӧ, кор гӧтырыс вӧлі видз-му вылын. Маной верӧсыс сэки эз вӧв сыкӧд.

¹⁰ Ань котӧртіс верӧсыс дінӧ да шуис сылы: «Мортыд, коді воліс водзынсӧ, бара петкӧдчис меным».

¹¹ Маной чеччис да муніс гӧтырыс бӧрся. Сэсся матыстчис тайӧ мортыс дінӧ да юаліс сылысь: «Тэ-ӧ сёрнитін сэки менам гӧтыркӧд?» Андел вочавидзис: «Ме».

¹² Маной юаліс: «Кор тэнад кывъясыд збыльмасны, сэки кыдзи пинымлы колӧ овны да мый вӧчны?»

¹³ Господьлӧн андел шуис Манойлы: «Тэнад гӧтырыд мед видзчысяс ставсьыс, мыйысь ме ӧлӧді.

¹⁴ Виноград да сыысь вӧчӧмтор мед оз сёй, вина-сур мед оз ю, пеж сёян мед оз сёй. Мед олас менам тшӧктӧм серти».

¹⁵ Маной шуис Господьлӧн анделлы: «Эн мун, олышт на да сёй миянкӧд. Ми тэныд кӧзапиӧс дасьтам».

¹⁶ Господьлӧн андел шуис Манойлы: «Ме олышта на тэнад корӧм серти, но ог кут сёйны сійӧ, мый тэ сёян. Кӧсъян кӧ, вай сійӧс Господьлы сотан вись пыдди». Маной эз тӧд, мый сы водзын Господьлӧн андел.

¹⁷ Маной юаліс Господьлӧн анделлысь: «Мый тэнад нимыд? Ми кӧсъям ошкыны-аттьӧавны тэнӧ, кор тэнад кывйыд инас».

¹⁸ Господьлӧн андел шуис сылы: «Мыйла тэ юасян менсьым нимӧс? Сійӧ шензьӧдана!»

¹⁹ Маной босьтіс кӧзапиӧс да нянь вись, сэсся из вылын сотіс найӧс вись пыдди Господьлы. Маной да сылӧн гӧтырыс аддзисны шензьӧданатор:

²⁰ висьпуктанінсянь ыпнитысь би пытшкас Господьлӧн андел кыпӧдчис енэжлань. Тайӧс аддзӧмысь Маной да сылӧн гӧтырыс кымынь уськӧдчисны муӧ.

²¹ Сэсся Господьлӧн андел эз нин петкӧдчыв Манойлы да сылӧн гӧтырыслы. Маной гӧгӧрвоис, мый тайӧ вӧлі Господьлӧн андел,

²² да шуис гӧтырыслы: «Ӧні ми кулам, ӧд ми Енмӧс аддзылім».

²³ Гӧтырыс шуис сылы: «Господь кӧ кӧсйис вины миянӧс, миянлысь эськӧ сотан висьтӧ да нянь висьтӧ эз сибӧд, ставсӧ тайӧс аддзывны эз сет да татшӧмторсӧ водзвыв эз юӧрт».

²⁴ Манойлӧн гӧтырыс чужтіс пиӧс да пуктіс сылы Самсон ним. Кага быдмис, и Господь бурсиис сійӧс.

²⁵ Кор Самсон оліс Махане-Данын, Цора да Эштаол каръяс костын, Господьлӧн Лолыс кутіс ышӧдны сійӧс Израильӧс мездӧм вылӧ.