Ёрдысьяс 12 - Коми Библия 2023

¹ Ефремсянь чужысьяс чукӧртчисны да локтісны Цафонӧ. Найӧ шуисны Еффайлы: «Мыйла тэ миянтӧг петін тышӧ аммонсаяслы паныд? Ми сотам тэнӧ да тэнсьыд керкатӧ».

² Еффай шуис налы: «Кор менам да менам йӧзлӧн вӧлі чорыд зыксьӧм аммонсаяскӧд, ме кори тіянӧс, но ті энӧ отсалӧй меным.

³ Кор ме гӧгӧрвои, мый отсӧгыс тіянсянь оз ло, ме петі аммонсаяслы паныд да дась вӧлі пуктыны юрӧс. Господь сетіс найӧс менам киӧ. А ӧні ті мыйла петінныд тышӧ меным паныд?»

⁴ Ефремсянь чужысьяс шуисны: «Галаадсаяс, ті – Ефрем муысь пышйысьяс, тіян муныд ӧд Ефрем да Манассей чужанкотыръяслӧн муяс костын». Сэки Еффай чукӧртіс галаадса став айуловсӧ да петіс Ефремсянь чужысьяслы паныд тышӧ. Галаадсаяс пасьвартісны Ефремсянь чужысьясӧс.

⁵ Галаадсаяс тупкалісны Ефремсянь чужысьяслысь Йӧрдан ю вуджанінъяссӧ. Кор Ефрем чужанкотырысь ловйӧн кольысь корліс вуджны, сэки галаадсаяс юавлісны, абу-ӧ тэ Ефрем чужанкотырысь. Мортлы, коді вочавидзис, абу пӧ,

⁶ тшӧктісны шуны ”шибболет”, а сійӧ шуис ”сибболет”, ӧд Ефремсянь чужысьяс эз вермыны шуны тайӧ кывсӧ колана ногӧн. Сэки татшӧм мортсӧ кутісны да виисны Йӧрдан ю вуджанін дорын. Сійӧ кадас Ефрем чужанкотырысь вӧлі виӧма нелямын кык сюрс мортӧс.

⁷ Галаадса Еффай вӧлі Израиль войтырлы ёрдысьӧн квайт во. Кулӧм бӧрас сійӧс дзебисны Галаадын аслас карӧ.

Ивсан, Элон да Авдон ёрдысьяс

⁸ Еффай бӧрын Израиль войтырлы ёрдысьӧн вӧлі Виплиемысь Ивсан.

⁹ Сылӧн вӧлі комын пи да комын ныв. Комыннан нывсӧ сійӧ сетіс верӧс сайӧ эз аслас рӧдысь айуловлы, и аслас пиянлы гӧтырӧ босьтіс комын нылӧс эз аслас рӧдысь. Израиль войтырлы ёрдысьӧн Ивсан вӧлі сизим во.

¹⁰ Кулӧм бӧрас сійӧс дзебисны Виплиемӧ.

¹¹ Ивсан бӧрын дас во чӧж Израиль войтырлы ёрдысьӧн вӧлі Завулон чужанкотырысь Элон.

¹² Кулӧм бӧрас сійӧс дзебисны Аялонӧ, Завулон муӧ.

¹³ Элон бӧрын Израиль войтырлы ёрдысьӧн вӧлі Пиратонысь Гиллеллӧн Авдон пиыс.

¹⁴ Сылӧн вӧлі нелямын пи, а пияныслӧн – комын пи, ставныс найӧ ветлӧдлісны сизимдас осёл вылын. Израиль войтырлы ёрдысьӧн Авдон вӧлі кӧкъямыс во.

¹⁵ Кулӧм бӧрас сійӧс дзебисны Ефрем муын сулалысь Пиратон карӧ, амаликъяслӧн керӧсвыв муӧ.