Ёрдысьяс 10 - Коми Библия 2023

Тол да Яир ёрдысьяс

¹ Авимелек кулӧм бӧрын Израильӧс мездыны сувтіс Иссакар чужанкотырысь Тол, Додо Пуахлӧн пиыс. Тол оліс Ефрем керӧсвыв муын, Шамир карын.

² Тол вӧлі Израиль войтырлы ёрдысьӧн кызь куим во. Кулӧм бӧрас сійӧс дзебисны Шамир карӧ.

³ Тол бӧрын кызь кык во чӧж Израиль войтырлы ёрдысьӧн вӧлі Галаадысь Яир.

⁴ Сылӧн вӧлі комын [кык] пи, кодъяс ветлісны комын [кык] осёл вылын. Налӧн вӧлі комын [кык] кар. Ӧнія кадӧдз Галаад муын тайӧ каръяссӧ шуӧны Яирлӧн сиктъясӧн.

⁵ Яир куліс, и сійӧс дзебисны Камонӧ.

Аммон войтыр дзескӧдӧ Израильӧс

⁶ Израиль пиян бара вӧчисны Господь водзын шогмытӧмсӧ. Найӧ юрбитісны Ваал да Астарта идолъяслы, тшӧтш арамей, сидон, моав, аммон да филистим войтыръяслӧн енъяслы. Найӧ эновтісны Господьӧс, дугдісны Сылы кесъявны.

⁷ Господь скӧрмис Израиль войтыр вылӧ да сетіс найӧс филистим да аммон войтыръяс киӧ.

⁸ Дас кӧкъямыс во чӧж найӧ дзескӧдісны да нартитісны Израиль пиянӧс, кодъяс олісны Галаадын, аморейяслӧн муын Йӧрдан ю сайын.

⁹ Аммон войтыр вуджис Йӧрдан ю, медым петны тышӧ Иуда, Венямин да Ефрем чужанкотыръяслы паныд. Израиль войтырлы вӧлі вывті сьӧкыд.

¹⁰ Израиль пиян шыасисны Господь дінӧ: «Тэныд паныд ми мыжсӧ вӧчим! Ми эновтім ассьыным Енмӧс да юрбитім Ваал идолъяслы!»

¹¹ Господь вочавидзис налы: «Египетсаяс, аморейяс, аммонсаяс, филистимсаяс

¹² да сидонсаяс, тшӧтш амалик да маон войтыръяс дзескӧдісны тіянӧс. Но быд пӧрйӧ, кор ті шыасьлінныд Ме дінӧ, Ме мездылі тіянӧс налӧн киысь.

¹³ Но ті эновтінныд Менӧ да пондінныд кесъявны мукӧд енъяслы. Ме сэсся ог кут мездыны тіянӧс.

¹⁴ Мунӧй да корӧй аслыныд бӧрйӧм енъяслысь, мед найӧ мездасны тіянӧс, кор тіянлы лоӧ сьӧкыд».

¹⁵ Израиль пиян шуисны Господьлы: «Ми мыжаӧсь. Вӧч миянкӧд, мый кӧсъян, сӧмын мезды миянӧс талун».

¹⁶ Найӧ эновтісны мукӧд енъясӧс да кутісны кесъявны [сӧмын] Господьлы. Сэки Господь эз нин вермы видзӧдны, кыдзи вӧрӧг дзескӧдӧ Израильӧс.

¹⁷ Аммонсаяс чукӧртчисны да сувтісны Галаадӧ, а израильсаяс чукӧртчисны да сувтісны Миспаӧ.

¹⁸ Галаадын олысь войтыр да налӧн веськӧдлысьяс ӧта-мӧдныслы шуалісны: «Коді медводдзаӧн уськӧдчас аммон войтыр вылӧ, сійӧ и лоӧ став галаадса олысьяслӧн юралысьнас».