Ёрдысьяс 1 - Коми Библия 2023

Ханаан му босьтӧм

¹ Исуслӧн кулӧм бӧрын Израиль пиян юасисны Господьлысь: «Коді миян пӧвстысь медводдзаӧн петас ханаансаяслы паныд тышӧ?»

² Господь вочавидзис: «Иуда чужанкотыр петас. Сы киӧ Ме сета мусӧ».

³ Иудасянь чужысьяс шуисны Симеонсянь чужысьяслы: «Петӧй миянкӧд ӧтвылысь тышӧ, медым босьтны ханаансаяслысь миянлы вичмӧдӧм му. А сэсся ми тшӧтш тіянкӧд мунам, медым босьтны ханаансаяслысь тіянлы вичмӧдӧм му». Симеонсянь чужысьяс мунісны Иудасянь чужысьяскӧд.

⁴ Иудасянь чужысьяс петісны тышӧ. Господь сетіс ханаансаясӧс да перезейясӧс налӧн киӧ. Везекын найӧ пасьвартісны дас сюрс мортӧс.

⁵ Сэні найӧ паныдасисны везекса ӧксыкӧд да тышкасисны сыкӧд, пасьвартісны ханаансаясӧс да перезейясӧс.

⁶ Но везекса ӧксы пышйис. Сійӧс вӧтӧдісны, кутісны да керыштісны ки-коксьыс певъяссӧ.

⁷ Везекса ӧксы шуис: «Сизимдас ӧксылысь ки-коксьыс певсӧ ме керыштлі, и найӧ менам пызан улысь торпыригсӧ чукӧртлісны. Ӧні Енмыс менсьым водзӧс перйис». Сійӧс вайӧдісны Ерусалимӧ, сэні сійӧ куліс.

⁸ Иудасянь чужысьяс уськӧдчисны Ерусалим вылӧ да босьтісны сійӧс. Сэтчӧс олысьяссӧ виисны шыпуртӧн, а карсӧ сотісны.

⁹ Та бӧрын Иудасянь чужысьяс уськӧдчисны ханаансаяс вылӧ, кодъяс олісны керӧсвыв муын, Негевын да керӧсбердса муын.

¹⁰ Сэсся найӧ уськӧдчисны ханаансаяс вылӧ, кодъяс олісны Хеврон карын. Водзынджык Хеврон карлӧн нимыс вӧлі Киръят-Арба. Иудасянь чужысьяс пасьвартісны [енак войтырысь] Шешайӧс, Ахиманӧс да Талмайӧс.

¹¹ Хевронсянь найӧ петісны тышӧ девирса олысьяслы паныд. Водзынджык Девир карлӧн нимыс вӧлі Киръят-Сефер.

¹² Калев шуис: «Коді пасьвартас Киръят-Сефер кар, сы сайӧ ме сета ассьым Акса нылӧс».

¹³ Карсӧ босьтіс Кеназлӧн Отниэл пиыс. Кеназ вӧлі Калевлӧн ичӧт вокыс. Калев ассьыс Акса нывсӧ сетіс Отниэл сайӧ.

¹⁴ Кор Аксалы воис кад мунны гортсьыс, сылы шуисны, мед корас батьыслысь видз-му. Акса чеччис осёл вывсьыс, и Калев батьыс юаліс сылысь: «Мый тэ кӧсъян?»

¹⁵ Акса шуис батьыслы: «Бурси менӧ. Тэ сетін меным Негевысь кос му, сет меным тшӧтш ва петанінъяс». [Сылӧн корӧм серти] Калев сетіс сылы Хеврон кар дорысь вылысса и улысса ва петанінъяс.

¹⁶ Кенейяс, Мӧисей тесьтсянь чужысьяс, петісны Иудасянь чужысьяскӧд Пальма карсянь Иуда овтӧминӧ, мый паськӧдчӧма Арад карсянь лунвылӧ. Найӧ овмӧдчисны сэтчӧс войтыр пӧвстӧ.

¹⁷ Иуда да Симеон чужанкотыръяс петісны Цефат карын олысь ханаансаяслы паныд тышӧ да дзикӧдз бырӧдісны найӧс. Тайӧ карсӧ нимтісны Хормаӧн.

¹⁸ Иуда чужанкотыр босьтіс нӧшта Газа, Аскалон да Экрон каръяс нагӧгӧрса муясӧн [да Азот кар сыгӧгӧрса муӧн].

¹⁹ Господь вӧлі Иуда чужанкотыркӧд. Найӧ босьтісны керӧсвыв му, но ковтысын олысьясӧс эз вермыны вӧтлыны, ӧд налӧн вӧліны кӧрт тарантасъяс.

²⁰ Калевлы сетісны Хеврон кар, кыдзи шуліс Мӧисей. [Хеврон дорысь сылы нӧшта вичмӧдісны енак войтырлысь куим кар.] Калев вӧтліс сэтысь енак войтырлысь куим рӧд.

²¹ Венямин чужанкотыр эз вӧтлы Ерусалимын олысь евуссаясӧс. Найӧ ӧнӧдз олӧны Ерусалимын Венямин чужанкотыр пӧвстын.

²² Господь вӧлі Ӧсипсянь чужысьяскӧд, кор найӧ петісны босьтны Вефиль.

²³ Найӧ [сувтісны да] гусьӧн видзӧдалісны Вефиль кар. Тайӧ карыслӧн воддза нимыс вӧлі Луз.

²⁴ Видзӧдалысьяс аддзисны карсьыс петысь мортӧс. Найӧ [кутісны сійӧс да] шуисны сылы: «Петкӧдлы миянлы, кыті пырны карас. Ми бурӧн мынтысям тэныд».

²⁵ Сійӧ петкӧдліс налы, кыті пырны карас. Ӧсипсянь чужысьяс виалісны шыпуртӧн карса олысьясӧс, а тайӧ мортсӧ да сылысь рӧдсӧ ловйӧн колисны.

²⁶ Тайӧ мортыс муніс хеттейяслӧн муӧ, кыпӧдіс сэні кар да сетіс карыслы Луз ним. Тайӧ карыс ӧнӧдз тадзи шусьӧ.

²⁷ Манассей чужанкотыр эз вермы босьтны Бет-Шеан карсӧ [мӧд ногӧн кӧ, Скифополь карсӧ,] да сыгӧгӧрса сиктъяссӧ, Танак, Дор, Ивлеам да Мегиддо каръяссӧ да нагӧгӧрса сиктъяссӧ. Та вӧсна ханаансаяс кольччисны овны тайӧ муас.

²⁸ Бӧрынджык, кор Израиль войтыр вынсяліс, найӧ уджӧдісны ханаансаясӧс вот мынтӧм могысь, но эз вӧтлыны найӧс.

²⁹ Ефрем чужанкотыр эз вӧтлы Гезерын олысь ханаансаясӧс. Ханаансаяс кольччисны овны на пӧвстӧ Гезерӧ [да мынтісны налы вот].

³⁰ Завулон чужанкотыр эз вӧтлы Китрон да Нахалол каръясысь ханаансаясӧс, а уджӧдіс найӧс вот мынтӧм могысь. Тадзи ханаансаяс кольччисны овны Завулон чужанкотыр пӧвстӧ.

³¹ Асир чужанкотыр эз вӧтлы олысьяссӧ Акко карысь, [а уджӧдіс найӧс вот мынтӧм могысь. Эз вӧтлы олысьяссӧ Дор,] Сидон, Ахлав, Акзив, Хелва, Афек да Рехов каръясысь.

³² Асирсянь чужысьяс овмӧдчисны сэтчӧс муын олысь ханаансаяс пӧвстӧ, ӧд эз вермыны вӧтлыны найӧс.

³³ Неффалим чужанкотыр сідзжӧ эз вӧтлы Бет-Шемеш да Бет-Анат каръясысь олысьяссӧ, а овмӧдчис сэтчӧс муын олысь ханаансаяс пӧвстӧ. Бет-Шемешын да Бет-Анатын олысьясӧс Неффалим чужанкотыр уджӧдіс вот мынтӧм могысь.

³⁴ Дан чужанкотырӧс аморейяс дзескӧдісны, вӧтлісны керӧсвыв муӧ, эз лэдзны лэччыны ковтысӧ.

³⁵ Аморейяс кольччисны овны Херес нима керӧс вылӧ, [кӧні олісны ошъяс да ручьяс,] тшӧтш Аялон да Шаалвим каръясӧ. Но Ӧсипсянь чужысьяс вермисны аморейясӧс да уджӧдісны найӧс вот мынтӧм могысь.

³⁶ Аморейяс олісны Акравим ыб дорсянь Селаӧдз да нӧшта водзӧ на.