Еклесиаст 9 - Коми Библия 2023

Быд мортӧс виччысьӧ пом

¹ Ме ёна мӧвпалі да гӧгӧрвои, мый веськыда олысьяс, мывкыда йӧз да налӧн уджъясыс – Ен киынӧсь. Мортыс оз тӧд, радейтӧм али мустӧмтӧм сійӧс виччысьӧ.

² И тайӧ ӧтмоза инмӧ быдӧнлы: веськыда олысьлы и лёк вӧчысьлы, бур [и лёк] мортлы, сӧстӧм и пеж мортлы, вись вайысьлы и сылы, коді оз вай висьяс. Бур мортӧс суӧ сійӧ жӧ, мый мыж вӧчысьӧс, кыв сетысьӧс – сійӧ жӧ, мый кыв сетны полысьӧс.

³ Тайӧ и эм лёкыс шонді улас, мый став йӧзыскӧд лоӧ ӧтмоза. Мортлӧн сьӧлӧмыс тырӧма лёкнас, йӧйлуныс олӧ сы пытшкын олӧм чӧжыс, и олӧм бӧрас мортыс мунӧ кулӧмаяс дінӧ – тайӧ тшӧтш лёк.

⁴ Ловъя мортлӧн эм лача. Весиг ловъя понлы бурджык кулӧм левлы дорысь.

⁵ Ловъяяс тӧдӧны, мый куласны, а кулӧмаяс оз тӧдны нинӧм. Налы оз нин ло удждоныс, ӧд найӧс вунӧдӧма.

⁶ Налӧн радейтӧмыс, мустӧмтӧмыс да вежӧгтӧмыс бырӧма-кольӧма. Некор и нинӧмторйын оз нин ло налы пайыс шонді улас.

⁷ Та вӧсна нимкодясьӧмӧн сёй няньтӧ, долыд сьӧлӧмӧн ю винатӧ, ӧд тайӧс Енмыс сетӧма тэныд.

⁸ Мед паськӧмыд пыр лоӧ еджыд, а юрыд – мавтӧма выйӧн.

⁹ Нимкодясь муса гӧтырыдкӧд олӧмнас аслад весьшӧрӧ олан лунъяс чӧжыд, мый тэныд сетӧма Енмыс шонді улас. Татшӧм тэнад пайыд мырсян-пессян олӧмад шонді улас.

¹⁰ Ставсӧ, мый верман, вӧч выныд серти. Ӧд кулӧмаяслӧн оланінас, кытчӧ тэ мунан, оз ло уджалӧмыс, мӧвпалӧмыс, тӧдӧмлуныс да мывкыдлуныс.

¹¹ Нӧшта ме аддзылі шонді улас, мый панласигӧн тэрыба котӧртысь оз век ло вермысьӧн, медвына тышкасьысь оз век вермы тышын, мывкыдалӧн абу пыр няньыс, вежӧралӧн абу пыр озырлуныс, кужысь морт дінӧ оз век буравны. Быдӧнлӧн аслас кад да аслас олан туй.

¹² Мортыд оз тӧд ассьыс оландырсӧ. Тывйыштӧм чериӧс моз, дзугйӧ гартчӧм лэбачӧс моз мортсӧ лоӧ тывйыштӧма сьӧкыд кадӧ, мый виччысьтӧг суас сійӧс.

Мывкыдлуныс вын дорысь бурджык

¹³ Ме нӧшта аддзылі ыджыд мывкыдлун шонді улас.

¹⁴ Вӧлі ичӧтик кар. Олысьыс сэні эз вӧв уна. Вына ӧксы уськӧдчис тайӧ карыс вылӧ, кытшаліс сійӧс да лэптіс сы гӧгӧр джуджыд тымӧд.

¹⁵ Сійӧ карас оліс гӧль, но мывкыд морт. Аслас мывкыдлунӧн сійӧ мездіс карсӧ, но бӧрыннас ставныс вунӧдісны тайӧ гӧль мортсӧ.

¹⁶ Ме шуи, мый вын дорысь мывкыдлуныд бурджык, но гӧль мортлысь мывкыдлунсӧ мустӧмтӧны, сылысь кывъяссӧ оз кывзыны.

¹⁷ Вежӧртӧмъяс вылын ыджыдалысьлӧн горзӧм дорысь мывкыдалысь лӧня шуӧмсӧ кывзӧныджык.

¹⁸ Мывкыдлуныд шыпурт дорысь бурджык, но ӧти мыжа морт бырӧдӧ уна буртор.