Еклесиаст 8 - Коми Библия 2023

Мортыд оз тӧд, мый сійӧс виччысьӧ

¹ Кодкӧд ӧткодялан мывкыдаӧс? Коді вермас ставсӧ вежӧртны? Мывкыдлуныд югзьӧдӧ чужӧмтӧ, вештӧ зумышлунтӧ чужӧм вывсьыд.

² Вӧч ӧксылӧн шуӧм серти, ӧд тэ кыв сетін Ен водзын.

³ Эн тэрмась мунны ӧксылӧн чужӧмбан водзысь, эн мӧвпав вӧчны сылы лёксӧ, ӧд ӧксы вермас вӧчны ставсӧ, мый кӧсъяс.

⁴ Ӧксылӧн шуӧмыс вына. Коді вермас шуны сылы: «Мый тэ вӧчан?»

⁵ Ӧксылӧн тшӧктӧм серти олысь оз шед лёкас. Мывкыда морт тӧдӧ, кор-мый вӧчнысӧ,

^6-7 ӧд быдторлы эм аслас кад да аслас мунанног. Мортыд оз тӧд, мый сійӧс виччысьӧ, оз тӧд, кыдзи мый лоӧ. Тӧдтӧмлуныс ёна сьӧктӧдӧ мортӧс. Коді висьталас сылы локтанасӧ?

⁸ Морт оз вермы ыджыдавны лолыс вылын, оз вермы кутны сійӧс, и кулан луныс абу сы киын. Тыш суӧмысь некод оз пышйы, лёк вӧчысьӧс лёкыс оз мезды.

⁹ Тайӧс ставсӧ ме казялі, и зіли вежӧртны, мый вӧчсьӧ шонді улас сійӧ кадас, кор морт ыджыдалӧ мӧд морт вылын и вайӧ сылы лёк.

Мортыд оз вермы вежӧртны Енлысь уджъяссӧ

¹⁰ Ме аддзылі, кыдзи дзебисны лёк вӧчысьясӧс. Найӧ ветлывлісны вежаинӧ, но карса олысьяс вунӧдісны та йылысь. Вӧлӧмакӧ, и тайӧ весьшӧрӧ.

¹¹ Лёк вӧчысьӧс кӧ дзик пыр оз мыждыны, сэки сійӧ водзӧ кутас лёксӧ вӧчны.

¹² Мыжа морт вӧчӧ лёксӧ сё пӧвстӧн да сирасьӧ сэтчӧ. Но ме тӧда, мый Енсьыс полысьлы аслас вежавидзӧм вӧсна бур лоӧ.

¹³ А лёк вӧчысьлы бурыс оз ло, ӧд сійӧ оз пов Енсьыс. Сылӧн олан лунъясыс мыччысьлӧм вуджӧр кодьӧсь.

¹⁴ Му вылас нӧшта эм сэтшӧмтор, мый артмӧ весьшӧрӧ: веськыда олысьӧс суӧ сійӧ, мый колӧ суны лёк вӧчысьӧс сылӧн уджъясыс серти, а лёк вӧчысьлы вичмӧ сійӧ, мый колӧ вичмыны веськыда олысьлы сылӧн уджъясыс серти. Вӧлӧмакӧ, и тайӧ весьшӧрӧ.

¹⁵ Ме ошки нимкодясьӧм, ӧд мортлы сёйӧм-юӧмысь да нимкодясьӧмысь бурджыкыс шонді улас абу. Нимкодясьӧмыс лоӧ сыкӧд став олан лунъяс чӧжыс, мыйтӧм Енмыс сетӧ сылы мырсьыны-пессьыны шонді улас.

¹⁶ Ме зіли тӧдмавны мывкыдлун да туявны мортлысь уджсӧ, мый сійӧ лун и вой вӧчӧ му вылас синсӧ куньлытӧг.

¹⁷ Сэки ме гӧгӧрвои, мый мортыс оз вермы вежӧртны Енлысь уджъяссӧ, ставсӧ, мый вӧчсьӧ шонді улас. Мыйтӧм кӧть мортыс эз туяв-тӧдмав, сійӧ вежӧртнысӧ оз вермы. Весиг кӧ мывкыда морт шуас, мый сійӧ тӧдӧ, но збыльвылас сійӧ вежӧртнысӧ оз вермы.