Еклесиаст 7 - Коми Библия 2023

Мый мортлы бурджык?

¹ Бур нималӧмыд бурджык дона выйысь, кулан луныд – чужан лунысь.

² Гажӧдчанінӧ мунӧм дорысь бурджык мунны сэтчӧ, кӧні кулӧма вӧсна бӧрдӧны, ӧд сэні ловъя мортыс гӧгӧрвоӧ, мый виччысьӧ быдӧнӧс.

³ Шогсьӧмыд бурджык сералӧм дорысь, ӧд сьӧлӧмыдлы бур, кор чужӧмыд шог.

⁴ Мывкыд мортлӧн сьӧлӧмыс мунӧ сэтчӧ, кӧні кулӧма вӧсна бӧрдӧны, а вежӧртӧмлӧн – гажӧдчанінӧ.

⁵ Вежӧртӧмлысь сьылӧмсӧ кывзӧм дорысь бурджык кывзыны мывкыдалысь ӧлӧдӧмсӧ.

⁶ Вежӧртӧмлӧн серамыс пӧрт улын сотчысь лежнӧглӧн трачкӧдчӧм кодь. И тайӧ, вӧлӧмакӧ, весьшӧрӧ.

⁷ Мӧдӧс дзескӧдӧм вӧсна и мывкыда морт лоӧ вежӧртӧмӧн, козин босьтӧмыд тшыкӧдӧ сьӧлӧмтӧ.

⁸ Помалӧмыд бурджык заводитӧм дорысь, терпитӧмыд бурджык вылӧ кыпӧдчӧмысь.

⁹ Эн тэрмась скӧрмыны, ӧд скӧрлуныс поздысьӧ вежӧртӧмлӧн сьӧлӧмӧ.

¹⁰ Эн юась, мыйла водзынсӧ вӧлі бурджык, татшӧм юалӧмыс абу мывкыдлунсянь.

¹¹ Мывкыдлуныд – вичмӧм озырлун кодь, сійӧ бурсӧ вайӧ шонді улын олысьяслы.

¹² Мывкыдлуныд сьӧм моз видзӧ-сайӧдӧ, но тӧдӧмлуныд сьӧм дорысь бурджык, ӧд мывкыдалы сійӧ олӧм сетӧ.

¹³ Видзӧдлы Енлӧн уджъяс вылӧ. Коді вермас веськӧдны сійӧ, мый Енмыс кусыньтӧма?

¹⁴ Бур кадӧ нимкодясь, а сьӧкыд кадӧ эн вунӧд, мый ӧтиыс и мӧдыс – Енсянь. Енмыс тадзи лӧсьӧдӧма, медым мортыс нинӧм эз вермы шуны Сылы паныд.

Эн ло вывті мывкыдаӧн да дзик вежӧртӧмӧн

¹⁵ Быдторсӧ ме аддзылі аслам весьшӧрӧ олан лунъясӧ: веськыда олысь веськыдлунас кулӧ, лёк вӧчысь лёкас дыр олӧ.

¹⁶ Эн ло вывті веськыда олысьӧн, эн петкӧдлы асьтӧ вывті мывкыдаӧн: мыйла тэныд бырӧдны асьтӧ?

¹⁷ Эн сетчы мыж вӧчӧмас, эн ло вежӧртӧмӧн: мыйла тэныд кадысь водз кувнысӧ?

¹⁸ Бур, тэ кӧ кутчысян воддза тшӧктӧмас и мӧдсьыс он ӧтдортчы, ӧд Енсьыс полысьӧс бырӧдӧмыс оз су.

¹⁹ Мывкыда мортӧс мывкыдлуныс вӧчӧ карса дас юралысь дорысь вынаджыкӧн.

²⁰ Му вылас абу веськыда олысьыс, коді эськӧ мыжсӧ эз вӧчлы, а сӧмын бурсӧ.

²¹ Эн чошкӧд пельтӧ быд сёрнилы, медым эн кыв, кыдзи кесйӧгыд лёкӧдӧ тэнӧ.

²² Тэ ӧд сьӧлӧмад тӧдан, мый тэ ачыд мукӧдсӧ унаысь лёкӧдлін.

²³ Ставсӧ тайӧс ме тӧдмалі мывкыдлунӧн. Ме шуи, мый кӧсъя лоны мывкыдаӧн, но мывкыдлуныс ылын меысь.

²⁴ Ставыс ылын да пыдын, зэв пыдын – коді вермас судзӧдны сійӧс?

²⁵ Ме став сьӧлӧмӧс пукті, медым туявны-тӧдмавны да корсьны мывкыдлунсӧ да вежӧрлунсӧ. Ме гӧгӧрвои, мый лёк вӧчӧмыс петӧ вежӧртӧмлунсянь, мывкыдтӧм олӧмыс – йӧйлунсянь.

²⁶ Ме гӧгӧрвои, мый кулӧм дорысь курыдджык сэтшӧм нывбаба, коді тыв кодь, кодлӧн сьӧлӧмыс – нальк, кодлӧн киясыс – чепъяс. Енлы шогмана морт пышйӧ сыысь, а мыжа мортӧс сійӧ тывйыштӧ.

²⁷ Туялігӧн ме гӧгӧрвои, – шуис еклесиаст, –

²⁸ ме эг аддзы сійӧс, мый дыр корсьыси. Сюрс айлов пӧвстысь ме аддзи сӧмын ӧти веськыда олысьӧс, сюрс ань пӧвстысь – некодӧс.

²⁹ Сӧмын ӧтитор ме гӧгӧрвои: Енмыс вӧчис мортӧс веськыдӧн, но йӧзыс сетчисны уна ковтӧм мӧвпалӧмӧ.