Еклесиаст 6 - Коми Библия 2023

¹ Ме аддзылі шонді улысь лёктор, мый тшӧкыда овлӧ олӧмас.

² Ен сетӧ мортлы озырлун, овмӧс-эмбур да нималӧм – ставсӧ, мый сылы колӧ, и мый сійӧ кӧсйӧ. Но Ен оз лэдз сылы нимкодясьны тайӧ озырлуннас, ӧд сылӧн озырлуныс вичмӧ йӧзлы. Тайӧ, вӧлӧмакӧ, весьшӧрӧ да ыджыд шог.

³ Мортыд вермас дыр овны, сылӧн вермас чужны сё ныв-пи, но сійӧ кӧ оз нимкодясь аслас овмӧс-эмбурнас, и кулӧм бӧрас сійӧс оз дзебны, шуа, мый чӧвтчӧм кага сы дорысь шудаджык.

⁴ Чӧвтчӧм кагаыд ӧд весьшӧрӧ воліс, сійӧ муніс пемыдас, весиг сылысь нимсӧ пемыдыс тупкис.

⁵ Сійӧ эз аддзыв и эз тӧдлы югыд шондісӧ, но сылы лӧньджык мортлы дорысь,

⁶ коді оліс эськӧ кык сюрс во да эз нимкодясь аслас эмбурӧн. Оз-ӧ ставныс мунны ӧтилаӧ?

⁷ Мортыд мырсьӧ-уджалӧ, мед сӧмын мыйкӧ сюйыштны вомас, но сылӧн сьӧлӧмыс таысь оз бурмы.

⁸ Мыйын бурыс мывкыдалы вежӧртӧмлы дорысь, мыйын бурыс гӧльлы, коді тӧдӧ, кыдзи колӧ овны йӧз водзын?

⁹ Абутӧмсӧ кӧсйӧм дорысь бурджык сійӧ, мый эм син водзад. Но и тайӧ, вӧлӧмакӧ, весьшӧрӧ, тӧв бӧрся вӧтлысьӧм кодь.

Уна кывйыд весьшӧрӧ

¹⁰ Ставыслы, мый эм, нимсӧ сетӧма нин. Ми тӧдам, коді сэтшӧм мортыс. Сійӧ оз вермы вензьыны сыысь вынаджыккӧд.

¹¹ Уна сёрни дырйи ставыс весьшӧрӧ. Мый бурыс таысь мортлы?

¹² Коді тӧдӧ, мый бурджык мортыслы, кодлӧн олӧмыс мунӧ вуджӧр моз весьшӧрӧ? Коді вермас висьтавны мортлы, мый лоӧ сы бӧрын шонді улас?