Еклесиаст 5 - Коми Библия 2023

¹ Кывтӧ шуны эн тэрмась, мӧвпышттӧг Ен водзын эн сёрнит, Енмыс ӧд енэжын, а тэ му вылын. Сідзкӧ, сёрниыд мед оз ло уна кывъя.

² Вӧтъясыд локтӧны уна тӧжд дырйи, вежӧртӧмӧс тӧдмалан уна сёрниыс серти.

³ Кывтӧ кӧ сетін Ен водзын, тэрмась вӧчнытӧ, ӧд вежӧртӧм абу шогмана Енлы. Сідзкӧ, кӧсйысин кӧ, вӧч.

⁴ Кӧсйысин кӧ да эн вӧч – тайӧ лёктор. Бурджык, он кӧ кӧсйысь.

⁵ Эн лэдз кывйыдлы кыскыны тэнӧ мыжас, [Енлӧн] юӧртысь водзын эн шу, тӧдлытӧг пӧ тадзи артмис. Мыйла тэныд дӧзмӧдны Енсӧ кывнад, медым Сійӧ бырӧдіс ставсӧ, мый тэ вӧчин?

⁶ Уна вӧтыд да уна сёрниыд – весьшӧрӧ. Но тэ пов Енмысь!

Юралысьясыд коланаӧсь

⁷ Аддзан кӧ, мый кӧнкӧ дзескӧдӧны гӧльӧс, торкӧны веськыда мыждӧм, оз вӧчны веськыда, эн шензьы та вылӧ. Ӧд юралысь бӧрся видзӧдӧ ыджыдджык юралысь, а на бӧрся – нӧшта на ыджыдджык.

⁸ Канмулы бур, кор ӧксыыс тӧждысьӧ аслас му вӧсна.

Озырлуныд шудсӧ оз вай

⁹ Кодлы муса сьӧм, сылы некор оз ло сійӧ тырмымӧн. Кодлы муса озырлун, сійӧ некор оз пӧтлы таысь. И тайӧ, вӧлӧмакӧ, весьшӧрӧ.

¹⁰ Кор содӧ овмӧс-эмбурыд, сэки содӧ тшӧтш сёйысьлӧн лыдыс. Мый бурыс таысь овмӧс кутысьлы – сӧмын кольӧ видзӧдны та вылӧ!

¹¹ Уджалысь чӧскыда узьӧ – пӧт сійӧ али абу, а озыр морт пӧттӧдзыс сёйӧ, но унмовсьнысӧ оз вермы.

¹² Ме аддзи шонді улас ыджыд лёктор – озырлун чукӧртӧмыд бурсӧ оз вай.

¹³ Виччысьтӧг суӧм лёктор вӧсна морт воштӧ озырлунсӧ, и пиыслы нинӧм оз вичмы.

¹⁴ Мортыд пасьтӧг петӧ мам кынӧмсьыс, пасьтӧг и мунӧ тайӧ муюгыдсьыс. Сійӧ мырсьӧ-уджалӧ, но нинӧм аскӧдыс оз ну.

¹⁵ Мортыд кутшӧмӧн локтіс муюгыдас, сэтшӧмӧн и эновтас сійӧс. И тайӧ – ыджыд лёктор. Мый бурсӧ вайис сылы весьшӧрӧ мырсьӧм-уджалӧмыс?

¹⁶ Став олӧмсӧ сійӧ коллялӧ пемыдас, шогсьӧ-майшасьӧ, элясьӧ да скӧралӧ.

¹⁷ Ме аддзи, мый мырсян-пессян олӧмас мортлы сёйӧм-юӧм да нимкодясьӧм дорысь бурджыкыс да лӧсьыдджыкыс абу. Мортыс ӧд мырсьӧ-пессьӧ шонді улас Енмӧн сетӧм олан лунъяс чӧж – татшӧм сылӧн олан пайыс.

¹⁸ Енмыс кӧ сетӧ мортлы озырлун да овмӧс-эмбур, лэдзӧ сы помысь овны-вывны, босьтны ассьыс пайсӧ да нимкодясьны мырсян-пессян олӧмас, тайӧ сылы – Енсянь козин.

¹⁹ Кор Енмыс сетӧ мортлы удж, мортлӧн сьӧлӧмыс нимкодясьӧ, а оз майшась олан лунъяс йылысь.