Еклесиаст 4 - Коми Библия 2023

¹ Ме видзӧдлі быдпӧлӧс дзескӧдӧм вылӧ, мый вӧчсьӧ шонді улас: дзескӧдӧмаяс бӧрдӧны – найӧс бурӧдысьыс абу, найӧ дзескӧдысьлӧн вына киынӧсь, а бурӧдысьыс абу.

² Ме шуи, мый кулӧмаяс шудаджыкӧсь ловъяяс дорысь, кодъяс олӧны на.

³ Но ёна шудаӧсь найӧ, кодъяс эз на чужны да эз на аддзывны лёксӧ, мый вӧчсьӧ шонді улас.

⁴ Нӧшта ме аддзи, мый быдпӧлӧс удж да быд зільӧм-вермӧм чужтӧ йӧз костын вежалӧм. И тайӧ, вӧлӧмакӧ, весьшӧрӧ, тӧв бӧрся вӧтлысьӧм кодь.

⁵ Вежӧртӧм морт кисӧ сюркнялӧмӧн пукалӧ, ачыс асьсӧ бырӧдӧ.

⁶ Мырсьӧмӧн да тӧв бӧрся вӧтлысьӧмӧн кык китыр чукӧртӧм дорысь бурджык лӧнь сьӧлӧмӧн ӧти китыр чукӧртны.

Кыкнад бурджык

⁷ Ме нӧшта аддзи, мый весьшӧрӧ шонді улас:

⁸ ӧтка мортлӧн некод абу, пиыс ни вокыс абу. Сійӧ мырсьӧ-уджалӧ, но озырлуныс сылысь сьӧлӧмсӧ оз гажӧд. «Кодлы ме уджала? – мӧвпалӧ сійӧ. – Мыйла ме ачымӧс гажӧдчӧмысь кута?» И тайӧ, вӧлӧмакӧ, весьшӧрӧ да абу буртор.

⁹ Кыкнад бурджык ӧтнадлы дорысь, ӧтувъя уджалӧмысь унджык бурыс.

¹⁰ Ӧтиыс кӧ усьӧ, мӧдыс лэптас сійӧс. Но курыд шог ӧтка мортлы: сійӧ кӧ усьӧ, лэптысьыс оз ло.

¹¹ Кыкӧн кӧ водасны, налы шоныд лоӧ, а ӧтнад кыдзи шоналан?

¹² Ӧтитӧ вермыны кокньыд, а кыкнад оз сетчыны. Куимпӧвста сунистӧ сьӧкыд орӧдны.

Муюгыдса ошкӧмыс бырас

¹³ Пӧрысь да вежӧртӧм ӧксы дорысь, коді оз кывзы туйдӧдӧмсӧ, бурджык гӧль, но мывкыда том морт,

¹⁴ коді дзескыдінысь петӧм бӧрас ӧксыӧ пуксис, кӧть чужис гӧльӧн мӧдыслӧн ӧксыалӧм дырйи.

¹⁵ Ме аддзи, мый шонді улас став олысьыс сувтіс том морт дор, коді пуксис ӧксыавны пӧрысь ӧксы пыдди.

¹⁶ Лыдтӧм-тшӧттӧм йӧз сувтіс выль ӧксы дор, но сы бӧрын олысьяс бурӧн эз казьтывны сійӧс. И тайӧ, вӧлӧмакӧ, весьшӧрӧ, тӧв бӧрся вӧтлысьӧм кодь.

Енлы кыв сетӧм йылысь

¹⁷ Видзӧд ас бӧрсяыд, кор мунан Ен керкаӧ. Бурджык кывзысьны Енлысь вежӧртӧм морт моз вись вайӧм дорысь, ӧд вежӧртӧмыд оз тӧд, мый лёк вӧчӧ.