Еклесиаст 12 - Коми Библия 2023

¹ Эн вунӧд ассьыд Вӧчысьтӧ том каднад, ӧд кор воасны сьӧкыд лунъяс да вояс, сэки сьӧлӧмтӧ нинӧм оз кут гажӧдны.

² Сэки шонділӧн, тӧлысьлӧн, кодзувъяслӧн югӧрыс пемдас, зэр бӧрын бара кыпӧдчасны кымӧръяс.

³ Сійӧ лунӧ керка видзысьясӧс дзӧрӧм босьтас, вынаяс гӧрбыльтчасны, изысьяслӧн лыдыс чинас, налӧн уджыс сувтас, ӧшиньӧ дзоргысьяслы югыдыс пемдас.

⁴ Ывлаӧ петан ӧдзӧсъяс тупкысясны, изкилӧн шыыс ланьтас, лэбачлӧн дзользьӧмыс унтӧ пальӧдас, сьылысьяслӧн горыс чинас.

⁵ Повны кутан выліинӧ кайӧмысь, туй вылын – лёкторъясысь. Миндаль пондас дзоридзавны, чирк – варгыльтны, каперс вотӧс вынтӧммас. Мортыс пыр кежлӧ мунӧ кулӧмаяс дінӧ, и бӧрдысьяс колльӧдчӧны туйяс вылын.

⁶ Эн вунӧд ассьыд Вӧчысьтӧ, кор эзысь сикӧтшыд эз на ор, зарни дозйыд эз на пот, гырничыд ва босьтанін дорад эз на жугав, юкмӧс гӧгыльыд юкмӧсад эз на усь.

⁷ Муысь вӧчӧм вир-яйыд бӧр бергӧдчас муӧ, а лолыд бӧр мунас Ен дінӧ, коді сетіс сійӧс.

⁸ Весьшӧрӧ, – шуис еклесиаст, – ставыс весьшӧрӧ.

Кывкӧртӧд

⁹ Еклесиаст вӧлі мывкыд морт, сійӧ юксис тӧдӧмлуннас войтырыскӧд. Сійӧ унатор туяліс-тӧдмаліс и лӧсьӧдіс уна шусьӧг.

¹⁰ Еклесиаст корсис мича-ёсь шуӧмъяс, веськыда гижис збыльсӧ.

¹¹ Мывкыдалӧн кывъясыс ӧшкӧн веськӧдлан ёсь бедь кодьӧсь, шусьӧгъясыс – сатшкысь кӧрттув кодьӧсь. Найӧс лӧсьӧдӧма ачыс ыж видзысьыс.

¹² Пиӧй, медводз кут тӧд вылад, мый небӧгъяс лӧсьӧдӧмлы помыс абу, унатор туялӧмыд вир-яйтӧ мудзтӧдӧ.

¹³ Ставыслы, мый тэ кылін, кывкӧртӧдыс татшӧм: пов Енсьыс да ов Сылӧн тшӧктӧмъяс серти. Тайӧ тшӧктӧмыс – быд мортлы.

¹⁴ Енмыс веськыда мыждас мортӧс быд уджысь, бурсьыс и лёксьыс, весиг сыысь, мый вӧлі гусьӧн вӧчӧма.