Еклесиаст 11 - Коми Библия 2023

Морт оз вермы тӧдны

¹ Лэдз ва кузя няньтӧ, кад мысти сійӧ бӧр воас тэныд.

² Юк озырлунтӧ сизим либӧ кӧкъямыс пельӧ, он ӧд тӧд, кутшӧм сьӧкыд кад пуксяс му вылас.

³ Кымӧръяс кӧ польдӧмаӧсь, му вылӧ зэр киссяс. Лунвывлань либӧ войвывлань кӧ пӧрас пу, сэтчӧ и коляс.

⁴ Тӧвныр вылӧ видзӧдӧмнад он кӧдз, кымӧр вылӧ чатрасьӧмнад он вунды.

⁵ Тэ он вермы тӧдны тӧврулысь шлывъялӧмсӧ да мам кынӧмын кагалысь лы артмӧмсӧ, тадзи жӧ тэ он вермы тӧдны Енлысь уджъяссӧ – Сылысь, коді вӧчӧ ставсӧ.

⁶ Асывнас кӧдз, и рытнас киыдлы эн сет шойччӧгсӧ. Тэ ӧд он тӧд, кодар уджыс лоӧ бурджык, а гашкӧ, кыкнанныс бур.

Нимкодясь том дырйиыд

⁷ Югыднад лӧсьыд, нимкодь аддзыны шондісӧ.

⁸ Весиг кӧ тэ олан уна во, нимкодясь став олӧм чӧжыд, но эн вунӧд, мый уна пемыд лун на воас. Ставыс, мый тэныд паныдасяс олӧмад, весьшӧрӧ.

⁹ Нимкодясь, зонмӧй, аслад том кадӧ, сьӧлӧмыд мед долыдасьӧ томдырйиыд. Ветлы, кытчӧ сьӧлӧмыд кыскӧ, кытчӧ синмыд видзӧдӧ, но тӧд, мый ставсьыс таысь Ен вайӧдас тэнӧ Аслас ёрд водзӧ.

¹⁰ Вӧтлы шогсьӧмсӧ сьӧлӧмсьыд, ылыст сьӧкыдалӧмсӧ вир-яйсьыд, ӧд томлуныд ӧдйӧ кольӧ, пӧрысьлуныд юасьтӧг локтӧ.