Еклесиаст 10 - Коми Библия 2023

¹ Кулӧм гутъяс дукӧсьтӧны чӧскыда ӧвтысь мавтас, вежӧртӧмлуныс чышкыштӧ мывкыдлунсӧ да нималӧмсӧ.

² Мывкыдалӧн сьӧлӧмыс кыскӧ веськыдвылӧ, вежӧртӧмлӧн – шуйгавылӧ.

³ Вежӧртӧмлӧн сямтӧмлуныс тыдовтчӧ весиг туй кузя мунігӧн, ставныслы сійӧ петкӧдлӧ ассьыс вежӧртӧмлунсӧ.

⁴ Юралысьыд кӧ скӧрмас тэ вылӧ, эн тэрмась пышйыны, ӧд рамлуныд вевттьӧ ыджыд мыжъяс.

⁵ Ме аддзылі шонді улысь лёктор, мыйысь мыжа юралысь:

⁶ вежӧртӧмлунсӧ вылӧ пуктӧма, а озыръясӧс улӧ лэдзӧма.

⁷ Ме аддзылі, мый кесйӧгъяс пукалӧны вӧв вылын, а ӧксыяс кесйӧгъяс моз восьлалӧны подӧн.

⁸ Гу кодйысьыд ачыс сэтчӧ усяс, потшӧс кисьтысьӧс змей чушкас.

⁹ Из перйысь вермас асьсӧ дойдны, пес поткӧдлысьлы вермас дзенгыны.

¹⁰ Ныжмӧм чертӧ кӧ он лэчты, вынтӧ зэвтны ковмас. Мывкыдлуныд отсалӧ бурджыка уджтӧ вӧчны.

¹¹ Тунавтӧдз кӧ змей чушкас, тунасьысьлы сылӧн сямлуныс оз отсав.

¹² Мывкыдалӧн сёрниыс сьӧлӧм вылад воӧ, вежӧртӧмлӧн вомыс асьсӧ виӧ.

¹³ Вежӧртӧг сійӧ панӧ сёрнисӧ, йӧйталӧмӧн помалӧ.

¹⁴ Вежӧртӧм морт уна сёрнитӧ, оз тӧд, мый сійӧс виччысьӧ. Коді нӧ висьталас сылы, мый лоӧ сылӧн кулӧм бӧрын?

¹⁵ Вежӧртӧмӧс уджалӧмыс мудзтӧдӧ, сійӧ весиг оз тӧд, кыдзи бӧр воӧдчыны карӧдз.

¹⁶ Курыд шог сійӧ муын, кӧні ӧксыыс том зон, кӧні веськӧдлысьясыс водз асывсяньыс гажӧдчӧны.

¹⁷ Шуда олӧм сійӧ муын, кӧні ӧксыыс бур рӧдысь, кӧні веськӧдлысьясыс ас кадӧ сёйӧны-юӧны, медым ёнмӧдчыны, а оз юӧм-кодалӧм могысь.

¹⁸ Дышлӧн йиркыс ӧшалӧ, кисӧ сюркнялӧмӧн пукалысьлӧн керка вевтыс письтӧ.

¹⁹ Гажтӧ вӧчӧны нимкодясьӧм могысь, и винаыд олӧмтӧ гажӧдӧ, но ставсьыс мынтысьӧ сьӧм.

²⁰ Эн омӧльт ӧксыӧс весиг мӧвпъяснад, эн лёкӧд озырӧс вольпасяд, ӧд енэжвыв лэбач вермас нуны тэнсьыд кывъястӧ, бордъяснас паськӧдны тэнсьыд сёрнитӧ.