Еклесиаст 1 - Коми Библия 2023

¹ Давид пилӧн, ерусалимса ӧксылӧн, еклесиастлӧн мӧвпалӧм-шуӧмъяс.

Шонді улас нинӧм выльыс абу

² Весьшӧрӧ, – шуис еклесиаст, – ставыс весьшӧрӧ, дзик весьшӧрӧ.

³ Мый бурыс мортыслы сылӧн уджалӧмысь, шонді улас мырсьӧм-пессьӧмысь?

⁴ Ӧтияс мунӧны тайӧ олӧмсьыс, мӧдъяс чужӧны, а муыс сулалӧ нэмъяс чӧж.

⁵ Шонді петӧ и шонді пуксьӧ, сійӧ тэрмасьӧ аслас пуксянінӧ, сэсся бара петӧ.

⁶ Тӧвныр веськӧдчӧ лунвывлань, сэсся бергӧдчӧ войвывлань, сійӧ бергалӧ-кытшлалӧ да бӧр воӧ аслас кытшолӧ.

⁷ Став юыс визувтӧ саридзӧ, но саридзыс оз тыр. Ваыс бӧр бергӧдчӧ юлӧн петанінӧ, медым бара визувтны.

⁸ Сёрниыд мудзтӧдӧ мортӧс, сійӧ оз вермы ставсӧ шымыртны-висьтавны. Видзӧдӧмысь синмыд оз пӧтлы, кывзӧмысь пельыд оз тырлы.

⁹ Мый вӧлі, сійӧ лоӧ на, мый вӧлі вӧчӧма, сійӧс водзӧ кутасны вӧчны, шонді улас нинӧм выльыс абу.

¹⁰ Шулӧны, видзӧдлы пӧ, тайӧ – выльтор. Но тайӧ важӧн нин вӧлӧма, миянӧдз на вӧлӧма.

¹¹ Мый кольӧма, сійӧ вунӧ, а мый лоас, сійӧс вунӧдасны водзӧ чужысьяс.

Еклесиастлӧн шуд корсьӧм

¹² Ме, еклесиаст, вӧлі израильса ӧксыӧн Ерусалимын.

¹³ Ме став олӧмӧс пукті, медым мывкыдлун отсӧгӧн тӧдмавны-туявны ставсӧ, мый вӧчсьӧ енэж улас. Тайӧ сьӧкыд могсӧ Ен сетӧма мортлы.

¹⁴ Ме видзӧдалі став уджсӧ, мый вӧчсьӧ шонді улас. Вӧлӧмакӧ, ставыс весьшӧрӧ, тӧв бӧрся вӧтлысьӧм кодь.

¹⁵ Чуклятӧ он веськӧд, абутӧмтӧ он артав.

¹⁶ Ме шуи аслым: «Ме лои ыджыд да мывкыд мортӧн. Ме ёна сюсьджык ставныс дорысь, кодъяс меӧдз юравлісны Ерусалимын. Менам сьӧлӧмӧй тырӧма мывкыдлунӧн да тӧдӧмлунӧн».

¹⁷ Ме шуи тӧдмавны, мый сійӧ мывкыдлуныс, вежӧртӧмлуныс да йӧйлуныс. Но гӧгӧрвои, мый тайӧ тӧв бӧрся вӧтлысьӧм кодь.

¹⁸ Кӧні уна мывкыдлун, сэні уна дӧзмӧм. Коді содтӧ тӧдӧмлун, сійӧ содтӧ шог.