Ефесӧ 5 - Коми Библия 2023

¹ Ті – Енлӧн муса ныв-пи, сідзкӧ, олӧй Сы вылӧ видзӧдӧмӧн.

² Кристослы ми мусаӧсь, ті тшӧтш лоӧй мусаӧсь ӧта-мӧдныдлы. Кристос сетіс Ассьыс олӧмсӧ миян вӧсна да вайис Асьсӧ Енлы чӧскыда ӧвтан вись пыдди.

³ Ті – вежа войтыр. Сідзкӧ, некутшӧм кырсалӧм, пеж оласног да горшасьӧм мед эз вӧв тіян пӧвстын. Весиг энӧ сёрнитӧй та йылысь!

⁴ Ковтӧм сёрнияс, пеж кывъяс да мисьтӧм шмоньяс мед эз петны тіян вомысь. Мӧдарӧ, аттьӧалӧй Енсӧ!

⁵ Тӧдӧй, мый Кристослӧн да Енлӧн Юраланіныс оз вичмы ни ӧти кырсалысьлы, пеж оласногалы да горшасьысьлы, коді копрасьӧ озырлунлы Енмыслы пыдди.

⁶ Некод мед оз ылӧдлы тіянӧс ковтӧм сёрниӧн, ӧд таысь кывзысьтӧмъясӧс суас Енлӧн скӧрлуныс.

⁷ Татшӧмъясыскӧд энӧ ӧтувтчӧй!

Югыдыслӧн ныв-пи

⁸ Коркӧ ті вӧлінныд пемыдӧн, ӧні ті Господь пытшкынӧсь да лоинныд югыднас. Сідзкӧ, олӧй югыдыслӧн ныв-пи моз.

⁹ Ӧд Ловлӧн вотӧсыс – бурлун, веськыдлун да збыльлун.

¹⁰ Зільӧй тӧдмавны Енмыслы шогманасӧ.

¹¹ Энӧ ӧтувтчӧй пемыдас олысьяслӧн ковтӧм уджъясӧ, мӧдарӧ, янӧдӧй найӧс.

¹² Налӧн гуся уджъяс йылысь ӧд яндзим весиг висьтавнысӧ.

¹³ Но югыдас став гусяыс тыдовтчӧ, ӧд югыдыс ставсӧ восьтӧ.

¹⁴ Сійӧн и шуӧма: – Садьмы, узьысь, ловзьы кулӧмысь, и тэнӧ югдӧдас Кристос.

¹⁵ Сідзкӧ, сюся видзӧдӧй ас бӧрсяныд: олӧй мывкыдаяс моз, а энӧ вежӧртӧмъяс моз.

¹⁶ Энӧ коллялӧй каднытӧ весьшӧрӧ, ӧд тайӧ лунъясыс тырӧмаӧсь лёкнас.

¹⁷ Энӧ лоӧй мывкыдтӧмӧн, а тӧдмалӧй Енлысь кӧсйӧмсӧ.

¹⁸ Энӧ коддзӧдчӧй винаӧн, ӧд тасянь овлӧ олӧмас лэдзчысьӧмыс. Мӧдарӧ, сетӧй Ловлы тыртны асьнытӧ.

¹⁹ Сьылӧй ӧтвылысь псаломъяс, ошкана сьыланкывъяс да бурсьылӧмъяс. Сьылӧй Господьлы да ошкӧй Сійӧс став сьӧлӧмсяньныд.

²⁰ Быд кадӧ ставсьыс аттьӧалӧй Ен Батьӧс миян Господь Исус Кристос нимӧн.

²¹ Енсьыс полӧмӧн кывзысьӧй ӧта-мӧдныдлысь.

Гозъякост олӧм

²² Гӧтыръяс, кывзысьӧй верӧсныдлысь Господьлысь моз.

²³ Ӧд гӧтырлы юрыс – верӧс, кыдзи вичколы юрыс – Кристос. Вичколы Сійӧ – Мездысь, а вичкоыс – Сылӧн вир-яй.

²⁴ Кыдзи вичкоыс кывзысьӧ Кристослысь, сідзи гӧтыръяс быдторйын кывзысьӧй асланыд верӧсъяслысь.

²⁵ Верӧсъяс, радейтӧй гӧтырнытӧ, кыдзи Кристос радейтӧ вичкосӧ. Ӧд Кристос сетіс Ассьыс олӧмсӧ вичкоыс вӧсна,

²⁶ медым вежӧдны сійӧс. Сійӧ сӧстӧммӧдіс вичкосӧ ваӧн да кывнас,

²⁷ медым сувтӧдны сійӧс Ас водзас быд боксянь мичаӧн: вежаӧн, сӧстӧмӧн, медым сылӧн эз вӧв некутшӧм няйттор, чукыр да тырмытӧмтор.

²⁸ Верӧсъяс, радейтӧй ассьыныд гӧтырнытӧ вир-яйтӧ моз, ӧд гӧтырсӧ радейтысь – асьсӧ радейтӧ.

²⁹ Некод оз мустӧмт ассьыс вир-яйсӧ, мӧдарӧ, шонтӧ-пӧткӧдӧ сійӧс. Тадзи тшӧтш Господь тӧждысьӧ Аслас вичкоыс вӧсна,

³⁰ ӧд ми – Сы вир-яйлӧн юкӧнъяс.

³¹ Гижӧдыс висьталӧ: «Та вӧсна морт кольӧ бать-мамсӧ да ӧтлаасьӧ гӧтырыскӧд, и тайӧ кыкыс лоӧ ӧти вир-яй».

³² Тайӧ – ыджыд гусятор. Ме висьтала тайӧс Кристос да вичко йылысь.

³³ Сідзкӧ, быдӧн мед радейтӧ гӧтырсӧ асьсӧ моз, а гӧтыр мед пыдди пуктӧ верӧссӧ.