Даниил 12 - Коми Библия 2023

¹ Сійӧ кадас локтас Микаил, ыджыд юралысь андел, тэнсьыд войтыртӧ дорйысь. Сэки пуксяс сьӧкыд кад, кутшӧм эз на вӧвлы войтыръяслӧн олан кадӧ. Но тэнад войтыр пӧвстысь мездмасны ставныс, кодъяслысь нимсӧ гижӧма Небӧгӧ.

² Сэки гуалӧмаяс пӧвстысь унаӧн ловзясны: ӧтияс – помтӧм олӧм вылӧ, мӧдъяс – янӧдӧм да помтӧм мустӧмтӧм вылӧ.

³ Нэмъяс чӧж мывкыдаяс пондасны дзирдавны югыд кыа моз, веськыдлунас унаӧс туйдӧдысьяс – кодзувъяс моз.

⁴ Но тэ, Даниил, эн восьт тайӧ кывъяссӧ, а тупкы тайӧ небӧгсӧ печатьӧн, кытчӧдз оз во бӧръя кадыс. Сэки унаӧн лыддясны сійӧс, и налӧн тӧдӧмлуныс содас».

⁵ Сэсся ме, Даниил, аддзи кык сулалысьӧс: ӧтиыс сулаліс ю таладорас, мӧдыс – ю мӧдлапӧлас.

⁶ Ӧтиыс на пиысь юаліс шабді паськӧма анделлысь, коді сулаліс ю весьтын: «Дыр-ӧ на виччысьны сійӧ кадсӧ, кор помасясны тайӧ шензьӧданаторъясыс?»

⁷ Ме аддзи шабді паськӧма анделӧс, коді сулаліс ва весьтын. Веськыд да шуйга кисӧ енэжланьыс кыпӧдӧмӧн сійӧ кыв сетіс помтӧг Олысь водзын: «Коляс ӧти кадколаст, сэсся кык кадколаст да нӧшта кадколаст джын. Кор вежа войтырӧс лоӧ разӧдӧма, сэки ставыс тайӧ инас».

⁸ Ме кывзі тайӧ кывъяссӧ, но эг гӧгӧрво. Ме юалі: «Ыджыдӧй, а мый лоӧ та бӧрти?»

⁹ Но сійӧ шуис меным: «Мун, Даниил. Тайӧ кывъяссӧ оз позь восьтны, найӧс лоӧ тупкӧма печатьӧн бӧръя кадӧдзыс.

¹⁰ Унаӧс лоӧ весалӧма-сӧстӧммӧдӧма да тӧдмалӧма, но лёк йӧз кутасны водзӧ вӧчны лёксӧ. Лёк йӧз оз гӧгӧрвоны тайӧс, а мывкыдаяс гӧгӧрвоасны.

¹¹ Сійӧ кадсяньыс, кор дугӧдасны быдлунся вись вайӧм да сувтӧдасны крамӧ пеж зывӧксӧ, коляс сюрс да кыксё ӧкмысдас лун.

¹² Шуда сійӧ, коді помӧдзыс виччысяс сюрс да куимсё комын вит лунсӧ.

¹³ А тэ мун аслад туйӧд помӧдзыс. Тэ кутан шойччыны, а сэсся ловзян, медым босьтны тэныд вичманасӧ нэм помасигӧн».