Бӧрданкыв 5 - Коми Библия 2023

Мездмӧм йылысь кевмысьӧм

¹ Господьӧй, эн вунӧд, мый миянкӧд лоис. Видзӧдлы, кутшӧма миянӧс увтыртӧны.

² Миян муным вуджис мукӧдлы, керкаясным – локтысь йӧзлы.

³ Ми колим батьястӧг, мамъясным лоины дӧваясӧн.

⁴ Асланым юан ваысь ми мынтысям эзысьӧн, песнымӧс судзӧдам сьӧм вылӧ.

⁵ Дзескӧдысьяс миянӧс сийӧсалісны, ми мудзӧмаӧсь, шойччӧгыс абу.

⁶ Египетлысь ми корим отсӧг, Ассурлысь корим нянь.

⁷ Батьясным вӧчисны мыж. Найӧ абуӧсь нин, а налӧн мыж вӧсна ми нуам мыждӧмсӧ.

⁸ Миян вылын ыджыдалӧны кесйӧгъяс, налӧн кипод улысь мездысьыс абу.

⁹ Ми полӧмӧн шедӧдам нянь, ӧд овтӧминысь локтӧны шыпурта мырддялысьяс.

¹⁰ Кучикным лои биа пач кодь, тшыглуныс сотӧ миянӧс.

¹¹ Дзескӧдысьяс мырдӧналӧны аньясӧс Сионын, янӧдӧны нывъясӧс Иуда каръясын.

¹² Юралысьяснымӧс найӧ ӧшӧдісны, пӧрысьясӧс пыдди оз пуктыны.

¹³ Зонъясӧс изки бердӧ сувтӧдісны, зонпосни кок йывсьыныс усьӧны пес кыскалӧмысь.

¹⁴ Юрнуӧдысьяс оз нин пукавны карса дзиръя дорын, том йӧз оз нин сьывны-ворсны.

¹⁵ Кусі сьӧлӧманым нимкодьлуныс, йӧктӧм пыдди ми бӧрдам.

¹⁶ Юркытшным усис миян юр вылысь. Курыд шог миянлы мыж вӧснаным!

¹⁷ Сьӧлӧмным тырӧма дойӧн, синмысь югыдыс кусӧма,

¹⁸ ӧд Сион керӧс кушмӧма, сэті ветлӧны шакалъяс.

¹⁹ Господьӧй, Тэ олан нэмъяс чӧж, Тэ пукалан юралан пуклӧсын чужысьяссянь чужысьясӧдз.

²⁰ Мый вӧсна Тэ дзикӧдз вунӧдін миянӧс, мыйла та дыра кежлӧ эновтін миянӧс?

²¹ Господьӧй, бергӧд миянӧс Асланьыд, и ми бергӧдчам. Бара сет миянлы важ кодь лунъяс.

²² Тэ ӧмӧй дзикӧдз эновтін миянӧс? Тэ ӧмӧй сэтшӧм ёна лӧгалан миян вылӧ?