Бӧрданкыв 1 - Коми Библия 2023

Ерусалимлӧн шогсьӧм

¹ Ӧтнас сулалӧ кар, а коркӧ вӧлі йӧзӧн тырӧма! Ӧні сійӧ дӧва кодь, а коркӧ вӧлі войтыръяс пӧвстын ыджыд. Сійӧ ыджыдаліс ӧксыув муяс вылын, а лои вот мынтӧм могысь уджалысьӧн.

² Войнас сійӧ ырзӧмӧн бӧрдӧ, синваыс чужӧмбанӧдыс тюрӧ. Сійӧс бурӧдысьыс абу, весиг на пӧвстын, кодъяслы сійӧ вӧлі муса. Ёртъясыс пӧрйӧдлісны сійӧс, кутісны мустӧмтны.

³ Иудаӧс нуӧдісны йӧз муӧ, сійӧ шогсьӧ, нартитӧмсьыс сьӧкыдалӧ. Сійӧ олӧ мукӧд войтыръяс пӧвстын, оз тӧд шойччӧгсӧ. Дзескӧдысьяс суӧдісны Иудаӧс, сійӧ эз вермы пышйыны.

⁴ Сионӧ нуӧдан туйяс бӧрдӧны, некод оз лок гажӧдчан лунъяс кежлӧ, сылӧн дзиръяясӧд пырысьыс абу. Попъяс сьӧкыда ышлолалӧны, нывъяс шогысла ойзӧны – Сион тырӧма курыд шогӧн.

⁵ Дзескӧдысьяс ыджыдалӧны Сион вылын, мустӧмтысьяс гажаа олӧны. Сионлӧн уна мыж вӧсна Господь ыстіс сылы шог. Сылысь челядьсӧ нуӧдісны пленӧ, дзескӧдысьяс вӧтлісны найӧс водзвыланыс.

⁶ Воштіс Сион ныв ассьыс нималӧмсӧ. Сылӧн юралысьясыс кӧръяс кодьӧсь, кодъяс оз аддзыны йирсянін. Дзескӧдысь вӧтлӧ найӧс водзвылас, найӧ котӧртӧны эбӧссьыс усьӧмӧн.

⁷ Коньӧр туйын олігӧн да оланінтӧг колигӧн Ерусалимлы тӧд вылас уси став бурыс, мый сылӧн водзынсӧ вӧлі. Войтырыс кулӧ дзескӧдысьлӧн киысь, Ерусалимлы некод оз отсав. Дзескӧдысьяс сералӧмӧн видзӧдӧны, кыдзи сійӧс бырӧдӧны.

⁸ Ыджыд мыж вӧчис Ерусалим, та вӧсна сійӧс ӧтдортӧны. Сійӧс пыдди пуктысьяс ӧні мустӧмтӧны сійӧс, ӧд аддзӧны сылысь яналӧмсӧ. Чужӧмсӧ бергӧдӧмӧн Ерусалим сьӧкыда ышлолалӧ.

⁹ Бӧждорыс сылӧн няйтчӧма пежнас. Сійӧ эз мӧвпав, мый виччысьӧ сійӧс. Сійӧ дзикӧдз усис, но сійӧс бурӧдысьыс эз вӧв. «Господьӧй, видзӧдлы менам шогсьӧм вылӧ, ӧд вӧрӧг асьсӧ вылӧ кыпӧдӧ».

¹⁰ Дзескӧдысьяс нюжӧдісны кинысӧ, медым петкӧдны Ерусалимысь став донаторсӧ. Сійӧ аддзис, кыдзи ентӧдтӧмъяс пырисны вежаинӧ, а Тэ ӧд шулін на йылысь, мый налы оз позь лоны Тэнад чукӧртчӧм войтыр пӧвстын.

¹¹ Ерусалимын олысьяс ойзӧны, корсьӧны нянь, став озырлунсӧ найӧ вежӧны сёян вылӧ, медым ловйӧн кольны. – Видзӧдлы, Господьӧй! Тэ аддзан, кутшӧма менӧ мустӧмтӧны.

¹² Туй вывті ветлысь-мунысьяс, тіянкӧд тадзи мед оз ло! Видзӧдлӧй, эм-ӧ менам кодь дойыс, кутшӧм менӧ суис! Господь ыстіс меным сійӧс Аслас скӧралан лунӧ.

¹³ Вылісянь Сійӧ ыстіс би, биыс пырис менам лыясӧдз. Пуктіс менам кок улӧ нальк да кыскыштіс бӧрлань. Сійӧ вӧчис менӧ овтӧм карӧн, став менам олан лунъясӧй тырӧма дойӧн.

¹⁴ Господь Аслас киӧн кыис менам мыжъясысь сийӧс, ӧшӧдіс сійӧс меным сьыліӧ, тадзи уськӧдіс менӧ эбӧсысь. Господь сетіс менӧ вӧрӧг киӧ, сы водзын ме ог вермы сулавны.

¹⁵ Господь ӧтдортіс менсьым ён йӧзӧс, индіс-юӧртіс кад, медым бырӧдны менсьым зонъясӧс. Пычкан гуын виноградӧс моз Господь таляліс Иудалысь нывсӧ!

¹⁶ Та вӧсна ме бӧрда, синваӧй шорӧн визувтӧ. Ылын меысь бурӧдысьӧй, коді эськӧ ловзьӧдіс менӧ. Челядьӧс пасьвартӧма, ӧд вӧрӧг вӧлі вынаджык.

¹⁷ Сион нюжӧдӧма кисӧ, но бурӧдысьыс абу. Орччӧн олысь войтырлы Господь тшӧктіс дзескӧдны Яковӧс. Ерусалим лои пежӧн налӧн син водзын.

¹⁸ Господь веськыд, но ме кыпӧдчи Сылы паныд. Кывзӧй, войтыръяс, видзӧдлӧй менам дой вылӧ: менсьым ныв-зонмӧс нуӧдісны пленӧ.

¹⁹ Ме кори муса ёртъясӧс отсавны, но найӧ пӧрйӧдлісны менӧ. Попъяс да юрнуӧдысьяс корсьӧны кынӧмпӧт, медым ловйӧн кольны, но тшыгнысла найӧ кулӧны карас.

²⁰ Господьӧй, видзӧдлы, кутшӧм меным сьӧкыд! Тэныд пыксьӧмӧй вӧсна менам пытшкӧсӧй шызьӧма, сьӧлӧмӧй тіралӧ. Ывлаын шыпурт бырӧдіс челядьӧс, керкаӧ кулӧм овмӧдчис.

²¹ Йӧзыс кылӧны менсьым ойзӧмӧс, но бурӧдысьыс абу. Вӧрӧг кыліс менам сьӧкыдалӧм йылысь, сійӧ нимкодясьӧ, мый Тэ тайӧс вӧчин. Мед суас найӧс Тэӧн индӧм луныс, мед лоас накӧд, кыдзи лои мекӧд.

²² Став налӧн лёк вӧчӧмыс мед сувтас Тэнад чужӧмбан водзӧ. Вӧч накӧд сійӧ, мый Тэ вӧчин мекӧд став менам мыжъясысь. Ме дугдывтӧг ойза, менам сьӧлӧмӧй дойысла потӧ.