Ап. уджъяс 7 - Коми Библия 2023

¹ Сэки аркирей юаліс: «Тайӧ тадз?»

² Степан шуис: «Вокъясӧй да батьясӧй, кывзӧй! Дзирдлуныслӧн Ен петкӧдчыліс Ӧвраам батьнымлы Месопотамияын, Харанӧ мунтӧдзыс на.

³ Ен шуис сылы: ”Коль ассьыд мутӧ, рӧдвужтӧ да бать керкатӧ. Ме инда тэныд му – сэтчӧ мун”.

⁴ Сэки Ӧвраам петіс Калдея муысь да овмӧдчис Харанӧ. Батьыс кулӧм бӧрын Ен вайӧдіс сэтысь Ӧвраамӧс тайӧ муас, кӧні ті ӧні оланныд.

⁵ Енмыс эз сет Ӧвраамлы татысь весиг кок пыдӧс пасьта му. Но кор Ӧвраам вӧлі ныв-питӧм на, Енмыс кӧсйысис сетны сылы да сысянь чужысьяслы мусӧ.

⁶ Ен шуис сылы: ”Тэсянь чужысьяс овмӧдчасны йӧз муӧ. Нёльсё во чӧж найӧ лоӧны сэні кесйӧг туйынӧсь да нартитӧм улынӧсь.

⁷ Но найӧс нартитысь войтырӧс Ме мыжда, – висьталӧ Ен. – Та бӧрти тэсянь чужысьясыд петасны сэтысь да пондасны кесъявны Меным тайӧ муас”.

⁸ Ен кӧрталіс Ӧвраамкӧд йитӧд, кодӧс вынсьӧдіс вундыштчӧмӧн. Ӧвраамлӧн чужис Исаак, кӧкъямысӧд луннас Ӧвраам вундыштіс сійӧс. Исаак вундыштіс Яковӧс, а Яков вундыштіс ассьыс дас кыкнан писӧ, миянлысь батьяснымӧс.

⁹ Найӧ вежалісны Ӧсиплы, та вӧсна вузалісны сійӧс Египетӧ. Но Енмыс вӧлі сыкӧд

¹⁰ да дорйис сійӧс быд сьӧкыдыс дырйи. Енмыс сетіс Ӧсиплы ыджыд мывкыдлун, та вӧсна сійӧ сьӧлӧм вылас воис фараонлы, египетса ӧксылы. Фараон весиг пуктіс сійӧс веськӧдлыны Египетӧн да аслас став овмӧсӧн.

¹¹ Тшыгъялӧм да ыджыд шог сэки суис став Египетсӧ да Ханаан мусӧ. Миян батьяслы нинӧм вӧлі сёйнысӧ.

¹² Кор Яков кыліс, мый Египетын эм нянь, мӧдӧдіс сэтчӧ миянлысь батьяснымӧс. Тайӧ вӧлі налӧн Египетӧ медводдза ветлӧм.

¹³ Мӧдысь ветліганыс Ӧсип восьтіс асьсӧ вокъясыслы. Тадзи фараон тӧдмаліс Ӧсиплысь рӧдвужсӧ.

¹⁴ Ӧсип мӧдӧдіс корны ассьыс Яков батьсӧ да став рӧдвужсӧ, ставнас найӧ вӧліны сизимдас вит морт.

¹⁵ Тадзи Яков вуджис Египетӧ, сэні сійӧ куліс, батьясным тшӧтш сэні кулісны.

¹⁶ Сэсся налысь шойяссӧ вайисны Сикемӧ да гуалісны. Гусӧ Ӧвраам ньӧблӧма эзысь вылӧ Сикемын олысь Хамор пиянлысь.

¹⁷ Египетын миян войтырным ӧтарӧ содіс. Матысмис сійӧ кадыс, мый йылысь Енмыс кыв сетӧмӧн кӧсйысьліс Ӧвраамлы.

¹⁸ Сэки юралысьӧ пуксис выль ӧксы, коді Ӧсип йылысь нинӧм эз тӧд.

¹⁹ Сійӧ наяна пӧрйӧдліс миянлысь войтырнымӧс, дзескӧдіс батьяснымӧс, тшӧктіс налы эновтны ассьыныс пузчужӧм кагаяссӧ, медым найӧ ловйӧн эз кольны.

²⁰ Сійӧ кадас чужис Мӧисей. Ен син водзын сійӧ вӧлі зэв мича. Куим тӧлысь чӧж сійӧс быдтісны бать керкаас.

²¹ Кор вӧлі кольӧма Мӧисейӧс, фараонлӧн нылыс босьтіс сійӧс да быдтіс пи пыдди.

²² Мӧисейӧс велӧдісны египетса став мывкыдлунӧ, сылӧн сёрниыс да уджъясыс вӧліны тӧдчанаӧсь.

²³ Нелямын арӧс тыригас Мӧисейлӧн чужис кӧсйӧм аддзӧдлыны ассьыс войтырсӧ, Израиль пиянӧс.

²⁴ Кор Мӧисей аддзис, мый ӧтиӧс на пиысь чорыда нӧйтӧны, уськӧдчис сійӧс дорйыны да водзӧс перйӧм могысь виис египетсаӧс.

²⁵ Мӧисей чайтіс, вокъясыс гӧгӧрвоасны, мый Енмыс кӧсйӧ мездыны найӧс сы пыр, но найӧ тайӧс эз гӧгӧрвоны.

²⁶ Мӧд луннас Мӧисей аддзис, мый кык израильса ӧта-мӧдыскӧд тышкасьӧны. Мӧисей кӧсйис, медым найӧ бурасисны. Сійӧ шуис налы: ”Кывзӧй, ті ӧд вокъяс. Мыйла нӧ ӧта-мӧднытӧ увтыртанныд?”

²⁷ Тышсӧ панысь тойыштіс Мӧисейӧс да шуис: ”Коді тэнӧ пуктіс миян вылын ыджыдалысьнас да миянӧс мыждысьнас?

²⁸ Гашкӧ, тӧрытъя египетсаӧс моз тэ тшӧтш кӧсъян вины менӧ?”

²⁹ Тайӧ шуӧмсьыс Мӧисей пышйис Египетысь да овмӧдчис Мадиан муӧ, сэні сылӧн чужис кык пи.

³⁰ Нелямын во мысти овтӧминын, Синай керӧс дорын, ӧзъялысь лежнӧг пытшкын Мӧисейлы петкӧдчис Господьлӧн андел.

³¹ Аддзӧмторйыс шемӧсмӧдіс Мӧисейӧс. Лежнӧг дорӧ матыстчигӧн сійӧ кыліс Господьлысь гӧлӧс шысӧ:

³² ”Ме – тэнад батьяслӧн Ен, Ӧвраамлӧн Ен, Исааклӧн Ен да Яковлӧн Ен”. Мӧисейӧс тіралӧм босьтіс, сійӧ эз лысьт весиг видзӧдлынысӧ.

³³ Господь шуис сылы: ”Пӧрччы кӧмтӧ, ӧд муыс, кӧні тэ сулалан, вежа.

³⁴ Ме аддза Аслам войтырлысь Египетын сьӧкыдалӧмсӧ да кыла налысь ойзӧмсӧ. Ме лэччи мездыны найӧс. Ӧні мун, Ме мӧдӧда тэнӧ Египетӧ”.

³⁵ Ен мӧдӧдіс Мӧисейӧс, но Израиль войтыр ӧтдортіс сійӧс, шуис: ”Коді тэнӧ пуктіс ыджыдалысьнас да мыждысьнас?” Но Ачыс Енмыс пуктіс сійӧс ыджыдалысьнас да мездысьнас. Вӧчис тайӧс андел пыр, коді петкӧдчис сылы лежнӧг пытшкын.

³⁶ Мӧисей петкӧдіс Израиль войтырӧс Египетысь. Уна шензьӧданатор да индысьпас сійӧ вӧчис Египет муын, Гӧрд саридз вуджигӧн да нелямын во чӧж овтӧминын ветлӧдлігӧн.

³⁷ Ӧд буретш Мӧисей висьтавліс Израиль пиянлы: ”Господь, тіян Енныд, сувтӧдас вокъяс пӧвстсьыныд ме кодь Пророкӧс тіянлы. Кывзӧй Сійӧс”.

³⁸ Ӧд Мӧисей, коді вӧлі овтӧминын миян батьяскӧд да кодкӧд сёрнитіс андел Синай керӧсын, босьтіс Енсянь ловъя кывъяссӧ, медым висьтавны миянлы.

³⁹ Но миян батьяс эз кӧсйыны кывзынысӧ, ӧтдортісны сійӧс да сьӧлӧмнысӧ бӧр бергӧдісны Египетлань.

⁴⁰ Ааронлы найӧ шуисны: ”Вӧч миянлы енъясӧс, кодъяс мунасны миян водзвылын. Ми огӧ тӧдӧй, мый лои Мӧисейкӧд, миянӧс Египетысь петкӧдысьнымкӧд”.

⁴¹ Сэки найӧ вӧчисны ӧшкӧс, вайисны тайӧ идолыслы вись да нимкодясисны киӧн вӧчӧмторныс водзын.

⁴² Енмыс бергӧдчис наысь да эновтіс найӧс юрбитны тӧлысь-кодзувъяслы. Та йылысь гижӧма пророкъяслӧн небӧгын: – Израиль войтыр! Нелямын во чӧжнас овтӧминын вайлінныд-ӧ ті Меным начкӧм ыж-мӧскӧс да мукӧд вись?

⁴³ Ті новлӧдлінныд Молок идоллысь чомсӧ да Ремфан енлысь кодзувсӧ. Ас киӧн ті вӧчинныд тайӧ бӧлбанъяссӧ да юрбитінныд налы. Та вӧсна Ме вӧтла тіянӧс Вавилонысь на ылӧджык.

⁴⁴ Овтӧминын миян батьяслӧн вӧлі вежа чом. Тайӧ вежа чомйыс висьталіс, мый Енмыс олӧ на пӧвстын. Ен петкӧдліс Мӧисейлы вежа чомлысь серпассӧ да тшӧктіс вӧчны дзик жӧ сідзи.

⁴⁵ Миян батьяс колисны вежа чомсӧ асланыс пиянлы. Сэсся найӧ Нав Исускӧд пыртісны сійӧс муӧ, кытысь Енмыс вӧтліс мукӧд войтыръясӧс. Тадзи вӧлі Давидлӧн олан лунъясӧдз.

⁴⁶ Давид кевмысис, медым вермис вӧчны Яковлӧн Енлы оланін. Давид воис Енлы сьӧлӧм вылас,

⁴⁷ но Енлы керкасӧ лэптіс Соломон.

⁴⁸ А Медвылысса оз ов киӧн вӧчӧм крамын. Пророк висьталӧ:

⁴⁹ – Енэжыс – Менам юралан пуклӧсӧй, муыс – Менам кок улӧй. Кутшӧм керка ті вӧчанныд Меным? Кӧні лоӧ Меным шойччаніныс? – висьталӧ Господь. –

⁵⁰ Ставсӧ тайӧс вӧчӧма Менам киӧн.

⁵¹ Асныралысьяс, тіян сьӧлӧмныд оз тӧд Енсӧ да тіян пельныд оз кыв Сійӧс! Асланыд батьяс моз ті век паныд сувтанныд Вежа Ловлы.

⁵² Эз вӧв пророк, кодӧс эськӧ эз вӧтлыны тіян батьяс. Найӧ виисны пророкъясӧс, кодъяс висьталісны Веськыда Олысьлӧн локтӧм йылысь. Тайӧ Веськыда Олысьсӧ ті вузалінныд да виинныд.

⁵³ Анделъяс вайисны тіянлы Индӧдсӧ, но ті энӧ олӧй сы серти».

Степанӧс изъялӧм

⁵⁴ Тайӧс кывзігӧн веськӧдлан котырӧ чукӧртчӧмаяс пузисны скӧрысла, пондісны пиньнысӧ йирны.

⁵⁵ Вежа Лолӧн тырӧм Степан видзӧдліс енэжӧ. Сійӧ аддзис Енлысь дзирдлунсӧ да Ен веськыдладорын сулалысь Исусӧс.

⁵⁶ Степан шуис: «Ме аддза восьса енэж да Ен веськыдладорын сулалысь Морт Пиӧс».

⁵⁷ Сэки чукӧртчысьяс пельнысӧ тупкӧмӧн лёкгоршӧн пондісны равзыны, ставныс уськӧдчисны Степан вылӧ.

⁵⁸ Сэсся петкӧдісны сійӧс кар сайӧ да пондісны изъявны. Изъялысьяс пукталісны вылыс паськӧмнысӧ Савл нима том мортлӧн кок дорӧ.

⁵⁹ Кор Степанӧс изъялісны, сійӧ кевмысис: «Исусӧй, Господьӧй, босьт менсьым лолӧс».

⁶⁰ Сэсся пидзӧс вылас усьӧмӧн гораа горӧдіс: «Господьӧй, эн мыжды найӧс таысь». Тайӧс шуӧм бӧрын Степанлӧн лолыс петіс.