Ап. уджъяс 3 - Коми Библия 2023

Коктӧмӧс бурдӧдӧм

¹ Ӧтчыд кевмысян кадӧ куим часын Петыр да Иоан мунісны крамӧ.

² Сэні вӧлі чужӧмсяньыс коктӧм морт. Сійӧс быд лун вайлісны крамӧ да пуксьӧдлісны сідз шусяна Мича дзиръя дорӧ, медым сійӧ корис крамӧ волысьяслысь.

³ Сійӧ аддзис Петырлысь да Иоанлысь крамӧ пырӧмсӧ да пондіс корны налысь.

⁴ Петыр да Иоан сюся видзӧдлісны сы вылӧ, сэсся Петыр шуис: «Видзӧдлы миян вылӧ».

⁵ Сійӧ синсӧ лэптіс на вылӧ да виччысис, оз-ӧ сетны мыйкӧ.

⁶ Петыр шуис: «Эзысь-зарни менам абу, но мый эм, сета тэныд. Назаретса Исус Кристос нимӧн чеччы да ветлӧдлы».

⁷ Петыр босьтіс сійӧс веськыд киӧдыс да лэптіс. Дзик пыр вынсяліс сылӧн кокыс да пидзӧсыс.

⁸ Сійӧ чеччыштігмоз сувтіс да кутіс ветлӧдлыны, сэсся пырис накӧд крамӧ. Сэні чеччалӧмӧн ветлӧдліс да ошкис Енмӧс.

⁹ Став йӧзыс аддзылісны сылысь ветлӧдлӧмсӧ да Енмӧс ошкӧмсӧ.

¹⁰ Йӧзыс тӧдісны, мый тайӧ вӧлі сійӧ корысьыс, коді пукавліс крамса Мича дзиръя дорын. Тайӧ лоӧмторйыс ёна шензьӧдіс йӧзсӧ, найӧс полӧм босьтіс.

Петыр сёрнитӧ крамын

¹¹ Бурдысь эз вешйыв Петыр да Иоан дінысь. Йӧзыс шензигтыр чукӧртчисны на дінӧ Соломон йӧрӧ.

¹² Петыр аддзис тайӧс да шуис йӧзыслы: «Израиль войтыр, мый ті шензьӧмӧн видзӧданныд миян вылӧ? Чайтанныд, ми ас вынӧн тайӧс вӧчим да миян вежавидзӧм понда сійӧ ветлӧдлӧ?

¹³ Ӧвраамлӧн, Исааклӧн да Яковлӧн Ен, миян батьяслӧн Ен, восьтіс Исус Пиыслысь дзирдлунсӧ. Ті вузалінныд да соссинныд Исусысь Пилат водзын, Пилат ӧд кӧсйис лэдзны Сійӧс.

¹⁴ Ті соссинныд Вежаысь да Веськыда Олысьысь, коринныд лэдзны морт виысьӧс.

¹⁵ Ті олӧм Сетысьӧс виинныд, но Енмыс ловзьӧдіс Сійӧс. Тайӧс ми аддзылім да висьталам та йылысь.

¹⁶ Исуслӧн нимыс да Сылӧн нимӧ эскӧмыс ёнмӧдіс тайӧ мортсӧ, кодӧс ті ӧні аддзанныд да бура тӧданныд. Исус сетіс сылы эскӧм, и тайӧ эскӧмыс бурдӧдіс сійӧс тіян син водзын.

¹⁷ Вокъяс, ме тӧда, ті асланыд юралысьяс моз вӧчинныд тайӧс гӧгӧрвотӧг.

¹⁸ Енмыс водзвыв висьталіс Аслас пророкъяс пыр Кристослӧн сьӧкыд нуӧмыс йылысь. И тайӧ иніс.

¹⁹ Бергӧдчӧй мыжъяссьыныд Енлань, медым Сійӧ вештас тіянлысь мыжъяснытӧ.

²⁰ Сэки Господь сетас тіянлы ловнытӧ выльмӧдан кад да мӧдӧдас тіянлы водзвыв бӧрйӧм Исус Кристосӧс.

²¹ Енмыс босьтіс Сійӧс енэжас, и Сійӧ лоӧ сэні, кытчӧдз ставсӧ оз ло лӧсьӧдӧма воддза мозыс. Та йылысь важысянь Енмыс висьтавліс Аслас вежа пророкъяс пыр.

²² Мӧисей шулӧма батьяслы: ”Господь, тіян Енныд, сувтӧдас вокъяс пӧвстсьыныд ме кодь Пророкӧс тіянлы. Кывзысьӧй Сылысь быдторйын, мый шуас.

²³ Коді оз кывзы тайӧ Пророксӧ, сійӧс лоӧ бырӧдӧма аслас войтыр пӧвстысь”.

²⁴ Самуил да сы бӧрти став мукӧд пророкыс тшӧтш водзвыв висьтавлісны тайӧ лунъясыс йылысь.

²⁵ Ті – пророкъяслӧн ныв-пи, тіянлы вуджӧ йитӧдыс, мый Ен кӧрталіс тіян батьяскӧд, кор шуис Ӧвраамлы: ”Тэсянь чужысь пыр вуджас бурсиӧмыс мувывса быд войтырлы”.

²⁶ Ен ловзьӧдіс Ассьыс Писӧ, Исусӧс, да мӧдӧдіс Сійӧс медводз тіян дінӧ, медым бергӧдны тіянӧс лёксьыс да бурсины тіянӧс».