Ап. уджъяс 28 - Коми Библия 2023

Мальта ді вылӧ петӧм

¹ Ваысь петӧм бӧрын тӧдмалісны, вӧлӧмакӧ, Мальта ді.

² Сэтчӧс олысьяс бура сибӧдісны миянӧс. Найӧ пестісны бипур да корисны миянӧс шонтысьны зэрысь-кӧдзыдысь.

³ Павел чукӧртіс росъяс да пуктіс бипур вылӧ. Сэки жара сотчысь биысь чепӧсйис змей да шашаритчис Павеллы киас.

⁴ Сэтчӧс олысьяс кор аддзисны Павел ки вылын ӧшалысь змейӧс, ӧта-мӧдныслы шуалісны: «Тыдалӧ, сійӧ морт виысь, вӧйӧмысь кӧ мездмӧм бӧрын Водзӧсперйысьыс кӧсйӧ босьтны сылысь олӧмсӧ».

⁵ Но Павел кисӧ пыркнитӧмӧн шыбитіс змейӧс биӧ, и сылы некутшӧм лёк эз ло.

⁶ Йӧзыс чайтісны, мый Павеллӧн киыс пыктас либӧ сійӧ шойӧн усяс му вылас. Дыркодь виччысисны, мый лоӧ. Но кор аддзисны, мый сыкӧд нинӧм лёкыс эз ло, вежисны мӧвпнысӧ да шуалісны, сійӧ пӧ ен.

⁷ Сэні матын вӧлі діӧн веськӧдлысь Публийлӧн оланіныс. Сійӧ нимкодьпырысь сибӧдіс миянӧс ас ордас да куим лун чӧж бура вердіс-юкталіс.

⁸ Сійӧ кадас Публийлӧн батьыс куйліс биа висьӧмӧн да кынӧм висьӧмӧн. Павел пырис сы дінӧ, кевмысис да сы вылӧ кисӧ пуктылӧмӧн бурдӧдіс сійӧс.

⁹ Тайӧ лоӧмторйыс бӧрын ді вылысь тшӧтш мукӧд висьысьяс пондісны локны, и ставныс бурдісны.

¹⁰ Найӧ быд ногыс аттьӧалісны миянӧс, муніганым весиг сетісны миянлы став коланаторсӧ.

Римӧ воӧм

¹¹ Куим тӧлысь мысти Диоскур нима александрияса корабль вылын ми мӧдӧдчим водзӧ. Тайӧ корабльыс тӧвйис ді вылын.

¹² Ми воим Сиракузаӧ, сэні олім куим лун.

¹³ Сэтысь кывтӧм бӧрын воим Ригияӧ. Лун мысти петіс лун тӧв, и мӧд луннас нин ми воим Путеолӧ.

¹⁴ Сэтысь ми аддзим вокъясӧс, найӧ корисны миянӧс олыштны на ордын вежон. Та бӧрын сэсся мунім Римӧ.

¹⁵ Сэні вокъяс кывлӧмаӧсь миян локтӧм йылысь. Найӧ воча локтісны миянлы, ӧтияс Аппия вузасянінӧдз, мӧдъяс – Куим шойччан керка нима сиктӧдз. Найӧс аддзӧм бӧрын Павел долыдмис да аттьӧаліс Енмӧс.

¹⁶ Римӧ воӧм мысти сё тышкамортӧн веськӧдлысь сетіс пукалысьясӧс сэтчӧс тышкайӧзӧн веськӧдлысьлы. А Павеллы лэдзисны овны торйӧн, но сы бӧрся видзӧдіс тышкаморт.

Павел Римын

¹⁷ Куим лун мысти Павел корис иудейяслысь веськӧдлысьясӧс. Кор найӧ чукӧртчисны, Павел шыасис на дінӧ: «Вокъяс, ме нинӧм эг вӧч ас войтырлы паныдсӧ да эг торк батьяслысь оласногсӧ. Но менӧ пуксьӧдісны Ерусалимын дзескыдінӧ да сетісны римсаяслы.

¹⁸ Найӧ кывзісны менӧ да эз аддзыны мыжсӧ, мед позис вины менӧ. Кӧсйисны весиг лэдзны,

¹⁹ но иудейяс паныд сувтісны талы. Та вӧсна меным ковмис корны кесарлысь мыждӧм. Дерт, эг сы вӧсна, медым мыжавны мыйыськӧ ассьым войтырӧс.

²⁰ Та понда ме и кӧсйи аддзӧдчывны да сёрнитыштны тіянкӧд, ӧд ме пукала сійӧ Мортыс вӧсна, код вылӧ Израиль кутӧ лачасӧ».

²¹ Иудейяслӧн веськӧдлысьяс шуисны: «Миянлы нинӧм эз гижлыны Иудеясянь, весиг вокъяс воліганыс нинӧм эз юӧртны да нинӧм лёксӧ эз висьтавлыны тэ йылысь.

²² Ми кӧсъям кывны, мый тэ ачыд мӧвпалан. Ми тӧдам, мый тайӧ велӧдӧмыслы быдлаын паныд сувтӧны».

²³ Урчитӧм лунӧ локтіс Павел ордӧ зэв уна йӧз. Павел асывсяньыс рытӧдзыс висьтавліс налы Енлӧн Юралӧм йылысь. Мӧисей Индӧд да пророк гижӧдъяс вылӧ мыджсьӧмӧн эскӧдіс найӧс Исус йылысь.

²⁴ Ӧтияс эскисны, мӧдъяс эз эскыны.

²⁵ Тадзи найӧ ас костаныс эз вермыны воны ӧти кывйӧ. Муналіганыс Павел шуис налы татшӧм кывъяс: «Бура шулӧма Вежа Лов миян батьяслы Исай пророк пыр:

²⁶ – Мун да висьтав тайӧ войтырыслы: пельнаныд кутанныд кывзыны да онӧ гӧгӧрвоӧй, синнаныд кутанныд видзӧдны да онӧ аддзӧй.

²⁷ Чорзьӧма тайӧ войтырыслӧн сьӧлӧмныс, найӧ сьӧкыд пеляӧсь, куньса синмаӧсь. Аддзынысӧ оз зільны, кывзынысӧ оз кӧсйыны, сьӧлӧмнаныс оз гӧгӧрвоны. Мелань бергӧдчынысӧ оз кӧсйыны, медым Ме бурдӧді найӧс.

²⁸ Тӧдӧй, мый Ен мӧдӧдӧма мездмӧмсӧ ентӧдтӧмъяслы, найӧ и кыласны».

²⁹ Тайӧс кылӧм бӧрын иудейяс мунісны ас костаныс ёна вензьӧмӧн.

³⁰ Аслас нянь-сов вылын Павел оліс сэні кык во чӧж да сибӧдліс ас ордас быдӧнӧс.

³¹ Сійӧ повтӧг да восьсӧн висьтавліс волысьяслы Енлӧн Юралӧм йылысь да велӧдіс Господь Исус Кристос йылысь.