Ап. уджъяс 27 - Коми Библия 2023

Римӧ кывтӧм

¹ Кор шуӧма вӧлі кывтны Италияӧ, Павелӧс да мукӧд пукалысьӧс сетісны Юлий нима мортлы, коді веськӧдліс кесарлӧн сё тышкамортӧн.

² Ми сӧлім Адрамитияысь кывтысь корабль вылӧ, сійӧ лӧсьӧдчис кывтны Асия муясті. Миянкӧд тшӧтш вӧлі Фессалоникаысь македонияса Аристарк.

³ Мӧд луннас ми сувтім Сидонӧ. Юлий вӧлі бур сьӧлӧма Павел дінӧ, лэдзис сылы ветлыны ёртъяс дінас да босьтны став коланаторсӧ туйӧ.

⁴ Сидонысь петӧм бӧрын паныда тӧлыс вӧсна миянлы ковмис кывтны Кипрӧ.

⁵ Киликия да Памфилияті кывтігӧн ми вуджим саридзсӧ да воим Ликияӧ, Мира карӧ.

⁶ Сэні сё тышкамортӧн веськӧдлысь аддзис Александрияысь Италияӧ кывтысь корабль да пуксьӧдіс миянӧс сы вылӧ.

⁷ Ми кывтім ньӧжйӧ уна лун чӧж, ӧдва воим Книд карӧдз. Паныда тӧлыс эз лэдз кывтны водзӧ, та вӧсна Салмонаті кытшовтӧмӧн пондім кывтны Крит пӧлӧн.

⁸ Вадор пӧлӧныс кывтӧмӧн ми сьӧкыдпырысь воӧдчим сідз шусяна Бур ӧзынӧ. Тасянь матын вӧлі Ласея кар.

⁹ Уна кад ми сэні воштім, весиг Видзалан лун нин коли бӧрӧ, и татшӧм тӧланас водзӧ кывтны эз позь. Сэки Павел шыасис:

¹⁰ «Войтырӧй, ме аддза, водзӧ кывтны лоас вывті сьӧкыд, вермам воштыны груз тыра корабльнымӧс, весиг ассьыным олӧмнымӧс».

¹¹ Но сё тышкамортӧн веськӧдлысь Павеллы дорысь ёнджыка эскис корабльвывса ыджыдыслы да корабль нуӧдысьлы.

¹² Тӧвйыны тайӧ сувтанінас эз позь, та вӧсна унаӧн шуисны кывтны татысь, кыдзкӧ воӧдчыны Финик карӧдз да тӧвйыны сэні. Тайӧ критса ӧзыныс видзӧдіс рытыв-лунвывлань да рытыв-войвывлань.

Тӧвныр

¹³ Пӧльыштіс лун тӧв. Чайтісны, мый кывтӧмыс артмас, та вӧсна мӧдӧдчисны Крит пӧлӧн.

¹⁴ Регыд мысти асыв-войвывсянь кыпӧдчис ыджыд тӧвныр, сійӧ пӧльтіс ді вывсянь.

¹⁵ Корабль эз вермы водзсасьны тӧвныркӧд. Тӧвныр нетшыштіс да пондіс новлӧдлыны корабльнымӧс гыяс вывті.

¹⁶ Клавда ді весьтті кывтігӧн ми кыдзкӧ вермим видзны корабльлысь пыжсӧ.

¹⁷ Пыжсӧ лэптісны корабль вылӧ, а корабльсӧ кӧртавлісны гезъясӧн. Тӧвдӧрасӧ лэдзисны, полісны, мед оз шыбит миянӧс Сирт ляпкыдінӧ. Тадзи ёна на новлӧдліс миянӧс.

¹⁸ Тӧвнырлӧн ланьтӧмыс эз на тыдав, та вӧсна мӧд луннас пондісны ректыны корабльсӧ саридзӧ.

¹⁹ Коймӧд луннас шыблалім корабль вылысь весиг став кӧрта кӧлуйсӧ.

²⁰ Уна лун чӧж эз петкӧдчыв шонді, эз тыдавны кодзувъяс, тӧвнырлӧн помыс эз тыдав. Миян воши став лача ловйӧн кольны.

²¹ Ми дыр кад олім сёйтӧг. Сэки Павел сувтіс на шӧрӧ да шуис: «Войтырӧй, колӧ вӧлі кывзыны менӧ да эз ков петны Критысь, сэки эськӧ эз су тіянӧс тайӧ сьӧкыдыс да лёкторйыс.

²² А ӧні кора, энӧ шогсьӧй. Тіян пиысь весиг ӧти ловъя лов оз вош, сӧмын корабльнымӧс воштам.

²³ Тайӧ войнас петкӧдчыліс меным андел, сійӧс мӧдӧдіс Ен, кодлы ме сеті ачымӧс да кодлы ме кесъяла.

²⁴ Андел шуис: ”Эн пов, Павел. Тэныд ковмас на сувтны кесар водзӧ. Тэ ради Енмыс тшӧтш видзас тэкӧд кывтысьясӧс”.

²⁵ Энӧ шогсьӧй, войтыр. Ме эска Енмыслы да тӧда, анделлӧн шуӧмыс инас.

²⁶ Миянӧс лоӧ шыбитӧма кутшӧмкӧ ді вылӧ».

²⁷ Дас нёль лун нин миянӧс новлӧдліс Адрия саридзті. Войшӧр гӧгӧрын корабльвывса уджалысьяс казялісны, мый кутшӧмкӧ му дінӧ матыстчам.

²⁸ Джудждасӧ видлісны да, кызь сыв лои. Муныштӧм бӧрын бара видлісны – дас вит сывйӧдз вӧлі ляпкалӧма.

²⁹ Полісны изъяинӧ тшукӧмысь. Та вӧсна лэдзисны бӧжладорсяньыс нёль якӧр да ёна кевмисны, мед эськӧ югдытӧдзыс вермисны кутчысьны.

³⁰ Но корабльвывса уджалысьяс шуисны пышйыны. Пондісны лэдзны корабль вылысь пыжсӧ саридзӧ, быттьӧ нӧшта кӧсйӧны чӧвтны якӧръяс нырладорсяньыс.

³¹ Сэки Павел шуис сё тышкамортӧн веськӧдлысьлы да сылӧн йӧзыслы: «Найӧ кӧ оз лоны корабль вылас, ті ловйӧн онӧ кольӧй».

³² Сэки тышкайӧз керыштісны пыжлысь гезъяссӧ да пыжыс усис саридзӧ.

³³ Асъядорыс Павел тшӧктіс ставныслы сёйыштны: «Ті дас нёль лун нин майшасьӧмныдла нинӧм энӧ сёйлӧй.

³⁴ Колӧ сёйыштны, мед ловйӧн колинныд. Тіян пиысь некодлӧн весиг юрси сі оз усь юр вывсьыныд».

³⁵ Тайӧс шуӧм бӧрын босьтіс нянь, ставныслӧн син водзын Енмӧс аттьӧалӧмӧн чегъяліс да пондіс сёйны.

³⁶ Ставныс долыдмисны да тшӧтш пондісны сёйны.

³⁷ Корабль вылас ми вӧлім кыксё сизимдас квайт морт.

³⁸ Пӧттӧдзныс сёйӧм бӧрын пондісны шыблавны саридзӧ шобді мешӧкъяснысӧ, мед кокньӧдны корабльсӧ.

³⁹ Кор дзикӧдз югдіс, тыдовтчис алькӧса куръя, муыс вӧлі тӧдтӧм. Шуисны пырны куръяӧ.

⁴⁰ Якӧръяссӧ орйӧдлісны да вӧйтісны саридзӧ, личӧдісны веськӧдлан пелысъяслысь гезъяссӧ да тӧв ньылыдыс зэвтісны ичӧт тӧвдӧра. Тадзи ми сетчим вадорланьыс.

⁴¹ Сэсся веськалім ляпкыдінӧ да корабльным сибдіс. Нырнас сатшис да некодарӧ эз вӧр, а бӧжыс гыяслӧн лёкысь швачкӧдӧмысь пондіс чуктавны-жугласьны.

⁴² Тышкайӧз кӧсйисны нин вины пукалысьясӧс, медым вартчиганыс некод эз пышйы.

⁴³ Но медым видзны Павеллысь олӧмсӧ, сё тышкамортӧн веськӧдлысь ӧлӧдіс найӧс таысь. Сійӧ медводз тшӧктіс шыбитчыны ваӧ вартчыны кужысьяслы да уйны береглань.

⁴⁴ Мукӧдыслы тшӧктіс воӧдчыны пӧвъяс отсӧгӧн либӧ кодлы мый сюрас корабль вывсьыс. Тадзи ставныс петісны му вылӧ.