Ап. уджъяс 26 - Коми Библия 2023

Павел дорйӧ асьсӧ Агриппа ӧксы водзын

¹ Агриппа шуис Павеллы: «Тэ верман сёрнитны ас кузяыд». Павел кисӧ лэптылӧм бӧрын заводитіс дорйысяна сёрнисӧ:

² «Агриппа ӧксы! Ме шуда, мый талун верма дорйысьны тэ водзын иудейяслӧн став мыжалӧмысь.

³ Тэ ӧд бура тӧдан иудей войтырлысь оласногсӧ да налысь вензяна видзӧдлассӧ. Та вӧсна кора тэнӧ терпитӧмӧн кывзыштны менӧ.

⁴ Менсьым олӧмӧс тӧдӧ став иудейыс, ме ӧд том кадсянь олі ас войтыр пӧвстын Ерусалимын.

⁵ Найӧ важысянь тӧдӧны менӧ. Ме вӧлі кутчысьӧма фарисейяслӧн чорыд велӧдӧмӧ да оласногӧ. Та йылысь, кӧсъясны кӧ, асьныс вермасны висьтавны.

⁶ Ӧні ме сулала ёрд водзын, ӧд лача кута кӧсйысьӧм вылӧ, мый Енмыс сетіс миян батьяслы.

⁷ Тайӧ кӧсйысьӧмыслысь збыльмӧмсӧ лача кутӧмӧн виччысьӧны миян войтырлӧн дас кыкнан чужанкотырыс, лун и вой юрбитӧны Енлы. Та вылӧ лача кутӧмысь и мыжалӧны менӧ иудейяс, Агриппа ӧксы.

⁸ Мыйла ті онӧ эскӧй, мый Енмыс вермӧ ловзьӧдны кулӧмаясӧс?

⁹ Ме ачым быд ногыс паныд сувтлі Назаретса Исус нимлы. Чайті, тадзи колӧ вӧлі.

¹⁰ Тадзи вӧчлі Ерусалимын: ме босьті аркирейяссянь гижӧд да вежа войтырӧс унаӧс пуксьӧдалі дзескыдінӧ, ме вӧлі найӧс виӧм дор.

¹¹ Ме унаысь чорыда нӧйтлі найӧс синагогаясын, медым найӧ омӧльтісны Исусӧс. Ме вӧлі тырӧма скӧрлунӧн, вӧтлыси на бӧрся весиг мукӧд каръясӧдз.

¹² Та могӧн аркирейяс нимсянь ме муні Дамаскӧ.

¹³ Луншӧр кадӧ, кор ме вӧлі туйын на, аддзи, ӧксыӧй, кыдзи ме да мекӧд мунысьяс гӧгӧр югнитіс енэжсяньыс югыд. Сійӧ вӧлі шонді югӧрысь на яр.

¹⁴ Ми ставным усим муас. Сэки ме кылі еврей кыв вылын ме дінӧ шыасьӧм: ”Савл, Савл, мыйла вӧтлан Менӧ? Сьӧкыд тэныд мунны ёсь зорлы паныд”.

¹⁵ Ме юалі: ”Коді Тэ, Господьӧй?” Сійӧ шуис: ”Ме эм Исус, кодӧс тэ вӧтлан.

¹⁶ Ӧні чеччы да сувт кок вылад. Ме петкӧдчи тэныд, мед тэ кесъялін Меным да висьталін, мый тэ аддзылін да мый Ме восьта на тэныд.

¹⁷ Ме видза тэнӧ аслад войтырысь да ентӧдтӧмъясысь, кодъяс дінӧ ӧні мӧдӧда тэнӧ,

¹⁸ мед восьтны налысь синсӧ да бергӧдны найӧс пемыдсьыс югыдӧ, сӧтана кипод улысь Ен дінӧ, медым Меным эскӧмӧн найӧ босьтасны мыжъясысь прӧститӧмсӧ да вежа войтырлы Енсянь вичмӧдӧмасӧ”.

¹⁹ Та вӧсна, Агриппа ӧксы, ме эг кут паныд сувтны енэжсянь петкӧдчылӧмлы.

²⁰ Медводз Дамаскын да Ерусалимын, сэсся став Иудея му пасьтала, сэсся нин ентӧдтӧмъяслы висьтавлі, мед бергӧдчасны мыжъяссьыныс Енлань да олӧмнас петкӧдласны тайӧс.

²¹ Таысь иудейяс и босьтісны менӧ крамын да кӧсйисны вины.

²² Но Енмыс пыр на отсаліс меным тайӧ лунӧдзыс, та вӧсна ме ӧнӧдз сулала да висьтала быдӧнлы: прӧстӧй и чина йӧзлы. Висьтала сӧмын сійӧ, мый йылысь водзвыв висьтавлісны Мӧисей да пророкъяс. Найӧ висьталісны,

²³ мый Кристос сьӧкыда кулас и лоас медводдза Ловзьысьӧн, медым восьтны югыдсӧ иудей войтырлы да ентӧдтӧмъяслы».

²⁴ Кор Павел тадзи дорйысис, Фест гораа шуис: «Тэ дзикӧдз йӧймӧмыд, Павел! Ыджыд тӧдӧмлуныд вӧсна вежӧртӧ воштӧмыд».

²⁵ Павел шуис: «Ме эг йӧймы, пыдди пуктана Фест. Ме бур мывкыдсянь висьтала збыльсӧ.

²⁶ Та йылысь бура тӧдӧ ачыс ӧксы, та вӧсна ме восьсӧн сёрнита сы водзын. Эска, тайӧ сылы абу гусятор, ӧд ставыс тайӧ эз гусьӧн вӧчсьы, кӧнкӧ пемыд пельӧсын.

²⁷ Эскан-ӧ, Агриппа ӧксы, пророкъяслы? Тӧда, мый эскан».

²⁸ Агриппа шуис Павеллы: «Зэв тай ӧдйӧ кӧсъян вӧчны менӧ Кристослы эскысьӧн».

²⁹ «Ӧдйӧ ли, ог ли, но кевма Енлы, мед тэ да ті ставныд, менӧ кывзысьяс, лоинныд ме кодьӧсь, сӧмын тайӧ чепъястӧгыс», – шуис Павел.

³⁰ Кор Павел помаліс сёрнисӧ, ӧксы чеччис, сы бӧрся тшӧтш чеччисны Фест юралысь, Вереника да мукӧдыс.

³¹ Муніганыс найӧ сёрнитісны ас костаныс: «Тайӧ мортыс абу мыжа, мед вины сійӧс либӧ видзны дзескыдінын».

³² Агриппа шуис Фестлы: «Позьӧ эськӧ вӧлі лэдзны сійӧс, эз кӧ кор кесарлысь мыждӧмсӧ».