Ап. уджъяс 24 - Коми Библия 2023

Феликс водзын Павелӧс мыжалӧм

¹ Вит лун мысти локтісны Ананий аркирей да юрнуӧдысьяс. Накӧд тшӧтш локтіс налӧн Тертул нима дорйысь. Павелӧс мыжалӧмӧн локтысьяс шыӧдчисны юралысь дінӧ.

² Павелӧс вайӧдӧм бӧрын Тертул сувтіс мыжавны:

³ «Пыдди пуктана Феликс! Быд кадӧ да быдлаын ми бур ногӧн казьтылам тэнӧ. Ми уджйӧзаӧсь тэныд миян лӧньлуна олӧмысь, тэнад тӧждысьӧмысь да войтырлысь олӧмсӧ бурмӧдӧмысь.

⁴ Ог кӧсйы ёна сьӧктӧдны тэнӧ, кора сӧмын лоны бур сьӧлӧмаӧн да дженьыдика кывзыштны миянӧс.

⁵ Ми аддзылім: тайӧ мортыс пежалӧ гӧгӧр да став му пасьтала шызьӧдӧ иудей войтырӧс. Сійӧ назаретса велӧдӧмӧ кутчысьысьяслӧн веськӧдлысь.

⁶ Сійӧ кӧсйис пежавны крамнымӧс, таысь ми и босьтім сійӧс да кӧсйим мыждыны Индӧдным серти.

⁷ Но локтіс Лисий, сюрс тышкамортӧн веськӧдлысь, мырддьӧмӧн-мырддис сійӧс миян киысь да мӧдӧдіс тэ дінӧ.

⁸ Тшӧтш миянлы, сійӧс мыжалысьяслы, тшӧктіс локны татчӧ. Тэ верман ачыд бура тӧдмавны ставсӧ, мыйысь ми мыжалам сійӧс».

⁹ Иудейяс сэні тшӧтш шуисны, дзик тадзи пӧ ставыс вӧлі.

Павеллӧн дорйысьӧм

¹⁰ Кор Феликс сетіс кыв Павеллы, Павел воча шуис: «Ме тӧда, тэ уна во чӧж нин веськыда мыждан тайӧ войтырсӧ. Та вӧсна меным кокньыд тані дорйысьнысӧ.

¹¹ Тэ верман ачыд тӧдмавны, мый дас кык лун сайын ме локті Ерусалимӧ, мед юрбитны Енлы.

¹² Крамын ме эг вензьы, синагогаын либӧ карын эг шызьӧд йӧзсӧ.

¹³ Та вӧсна найӧ оз вермыны подулавны ассьыныс мыжалӧмнысӧ.

¹⁴ Но веськыда висьтала тэныд: ме кутчыся тайӧ велӧдӧмас, мый найӧ шуӧны пӧръясьӧмӧн, тадзи кесъяла миян батьяслӧн Енлы. Ме эска ставас, мый гижӧма Индӧдын да пророк гижӧдъясын.

¹⁵ Тані пукалысь иудейяс моз ме тшӧтш лача кута Ен вылӧ, эска, мый лоӧ ловзьӧмыс, ловзясны веськыда олысьяс и лёкнога олысьяс. Менӧ мыжалысьяс ӧд тшӧтш тайӧс виччысьӧны.

¹⁶ Ме век зіля овны Ен водзын да йӧз водзын сӧстӧм сьӧлӧмӧн.

¹⁷ Уна во кольӧм бӧрти ме ӧні локті Ерусалимӧ, медым ас войтырлы сетны чукӧртӧм сьӧм да вайны Енлы вись.

¹⁸ Менӧ аддзылісны крамысь сӧстӧммӧдчӧм бӧрын. Йӧз чукӧрыс да шызьӧмыс сэні матӧ эз вӧв.

¹⁹ Сэні вӧліны Асияысь ӧткымын иудей. Налы эськӧ колӧ вӧлі сувтны тэ водзӧ да мыжавны менӧ, дерт, вӧлі кӧ мыйысь?

²⁰ Тайӧ йӧзыс мед асьныс висьталасны, кутшӧм мыж найӧ аддзисны менсьым, кор ме сулалі веськӧдлан котыр водзын.

²¹ Ме сэні шуи налы: ”Ті талун мыжаланныд менӧ сыысь, мый ме эска кулӧмаяслӧн ловзьӧмӧ”. Гашкӧ, тайӧ шуӧмсьыс ме мыжми на водзын».

²² Феликс бура тӧдіс ”Господь туй” йылысь велӧдӧмсӧ. Ставсӧ кывзӧм бӧрын сёрнисӧ тупкис да шуис: «Локтас Лисий, сюрс тышкамортӧн веськӧдлысь, сэки ме шуа бӧръя кывсӧ».

²³ Сэсся тшӧктіс сё тышкамортӧн веськӧдлысьлы нуӧдны Павелӧс дзескыдінӧ да видзны сійӧс дзескӧдтӧг, лэдзлыны сылӧн ёртъясыслы волывлыны да тӧждысьны сы вӧсна.

Павел дзескыдінын

²⁴ Кымынкӧ лун мысти локтіс Феликс Друзилла гӧтырыскӧд. Сылӧн гӧтырыс вӧлі иудей войтырысь. Феликс тшӧктіс вайӧдны Павелӧс, медым кывзыны Исус Кристослы эскӧм йылысь.

²⁵ Но кор Павел висьталіс веськыда олӧм йылысь, асьтӧ кутӧм да локтана мыждӧм йылысь, Феликсӧс полӧм босьтіс. Сійӧ шуис: «Ӧні мун. Кад кӧ лоӧ, корла на».

²⁶ Сійӧ виччысис, гашкӧ, Павел сетас сьӧм, мед лэдзасны дзескыдінысь. Та вӧсна тшӧкыда корлывліс Павелӧс да сёрнитліс сыкӧд.

²⁷ Кык во мысти Феликс пыдди юралысьӧ пуксис Порций Фест. И медым шогмыны иудейяслы, Феликс колис Павелӧс дзескыдінӧ.