Ап. уджъяс 22 - Коми Библия 2023

¹ «Вокъясӧй да батьясӧй, кывзӧй! Ачымӧс дорйӧм могысь ме кӧсъя мыйкӧ шуны тіянлы».

² Кор найӧ кылісны Павеллысь еврей кыв вылын шыасьӧмсӧ, чӧв ланьтісны. Павел шуис:

³ «Ме ачым иудей, чужи Киликияын Тарс карын, но быдми тані. Гамалиэл дорын менӧ велӧдісны батьяслӧн Индӧдӧ да тіян моз ме чорыда сулалі Ен дор.

⁴ Ме весиг виавмӧн вӧтлывлі ”Господь туйӧд” мунысьясӧс, айуловӧс да аньясӧс кӧртавлӧмӧн пуксьӧдавлі дзескыдінӧ.

⁵ Та йылысь вермас висьтавны ачыс аркирей да юрнуӧдысьяс. Насянь менам вӧлі гижӧд Дамаскын олысь вокъяслы. Тайӧ гижӧднас ме муні сэтчӧ, медым кӧртавны Исуслы эскысьясӧс да мыждӧм могысь вайӧдны найӧс Ерусалимӧ.

⁶ Дамаскӧ матыстчигӧн луншӧр кадӧ ме гӧгӧр виччысьтӧг югнитіс енэжсяньыс дзирдалана югыд.

⁷ Ме уси муас да кылі шыасьӧм: ”Савл, Савл, мыйла вӧтлан Менӧ?”

⁸ Ме юалі: ”Коді Тэ, Господьӧй?” Сійӧ шуис меным: ”Ме – Назаретса Исус, кодӧс тэ вӧтлан”.

⁹ Мекӧд локтысьяс кор аддзӧмаӧсь югыдсӧ, ёна повзьӧмаӧсь, а ме дінӧ шыасьӧмсӧ найӧ абу кывлӧмаӧсь.

¹⁰ Ме шуи: ”Господьӧй, мый меным вӧчны?” Господь шуис: ”Чеччы да мун Дамаскӧ. Сэні висьталасны, мый тэныд вӧчнысӧ”.

¹¹ Дзирдалана югыдсьыс менам синмӧй пемдіс. Та вӧсна мекӧд локтысьяс киӧд кутӧмӧн нуӧдісны менӧ Дамаскӧ.

¹² Сэні ме дінӧ локтіс Ананий нима вежавидзысь да Индӧд серти олысь морт. Дамаскын олысь иудейяс пыдди пуктісны сійӧс.

¹³ Ме дінӧ матыстчӧмӧн сійӧ шуис: ”Савл вокӧй! Мед аддзас тэнад синмыд!” И ме дзик пыр аддзи сійӧс.

¹⁴ Сійӧ шуис меным: ”Миян батьяслӧн Ен бӧрйӧма тэнӧ, медым тэ тӧдін Сылысь кӧсйӧмсӧ, аддзин Веськыда Олысьӧс да кылін Сы вомсянь шуӧмсӧ.

¹⁵ Та вӧсна тэ кутан юӧртны Сы йылысь став йӧзыслы, висьталан, мый тэ аддзылін да кывлін.

¹⁶ А ӧні эн нюжмась, чеччы, шыась Господь дінӧ да пыртчы – мыськав ассьыд мыжъястӧ”.

¹⁷ Сэсся ме бӧр локті Ерусалимӧ. Крамын кевмысигӧн ме быттьӧ ас садьысь петі

¹⁸ да аддзи Господьӧс. Сійӧ шуис, тэрмасьӧмӧн пӧ пет Ерусалимысь, тані пӧ оз сибӧдны Ме йылысь тэнсьыд висьталӧмтӧ.

¹⁹ Ме шуи: ”Господьӧй, найӧ ӧд тӧдӧны, мый ме ветлӧдлі синагогаысь синагогаӧ, пуксьӧдавлі Тэныд эскысьясӧс дзескыдінӧ да чорыда нӧйтлі найӧс.

²⁰ Кор Тэ йылысь висьталысь Степанӧс виисны, ме вӧлі сэні, видзи виысьяслысь паськӧмсӧ да лыдди виӧмсӧ бурторйӧн”.

²¹ Господь шуис меным: ”Мун, Ме мӧдӧда тэнӧ ылӧ ентӧдтӧмъяс дінӧ”».

²² Тайӧ кывъясӧдз кывзісны Павелӧс, сэсся пондісны горзыны: «Татшӧмсӧ колӧ бырӧдны му вывсьыс! Сійӧс оз позь ловйӧн кольны!»

²³ Йӧзыс ӧтарӧ горзісны, шенасисны паськӧмнаныс да коялісны кок увсьыныс буссӧ вывлань.

²⁴ Сэки сюрс тышкамортӧн веськӧдлысь тшӧктіс пыртны Павелӧс изкарӧ да нӧйтны орсӧн. Сэні кӧсйис тӧдмавны, мыйысь иудейяс татшӧмасӧ горзӧны сы вылӧ.

²⁵ Кор Павелӧс кӧртавлісны тасмаясӧн, сійӧ шуис сё тышкамортӧн веськӧдлысьлы: «Тіянлы ӧмӧй позьӧ мыждытӧг нӧйтны римса мортӧс?»

²⁶ Тайӧс кылӧм бӧрын сёӧн веськӧдлысь матыстчис сюрсӧн веськӧдлысь дінӧ да шуис: «Тэ збыльысь кӧсъян нӧйтны тайӧ мортсӧ? Сійӧ ӧд римса».

²⁷ Сюрсӧн веськӧдлысь матыстчис Павел дінӧ да юаліс: «Висьтав, тэ римса?» Павел вочавидзис: «Да».

²⁸ Веськӧдлысь содтіс: «Ме ыджыд дон мынті, мед лоны римсаӧн». Павел шуис сылы: «А ме чужи нин римсаӧн».

²⁹ Сэки нӧйтысьяс дзик пыр вешйисны Павел дінысь. А веськӧдлысь кор тӧдмаліс, мый Павел римса, ёна повзис, мый кӧртавліс сійӧс.

³⁰ Сюрс тышкамортӧн веськӧдлысь кӧсйис збыльысь тӧдмавны, мыйысь иудейяс мыжалӧны Павелӧс. Та вӧсна аскинас тшӧктіс разьны Павеллысь кӧртӧдъяссӧ да чукӧртны аркирейясӧс да став веськӧдлан котырсӧ. Сэсся петкӧдіс Павелӧс на водзӧ.