Ап. уджъяс 21 - Коми Библия 2023

Кесарияӧ кывтӧм

¹ Янсӧдчӧм бӧрын ми веськыда кывтім Косӧ, мӧд луннас Родосӧ, сэсся Патараӧ.

² Сэні ми аддзим Финикияӧ мунысь корабль, пуксим сы вылӧ да кывтім водзӧ.

³ Ми кывтім Кипр дінті, сійӧ коли шуйгавылас. Сэсся воим Сирияӧ да сувтім Тирӧ, кӧні колӧ вӧлі ректыны корабльсӧ.

⁴ Сэні ми корсим велӧдчысьясӧс да олім на дінын вежон. Найӧ Вежа Ловсянь ышӧдӧмӧн висьталісны Павеллы, медым сійӧ эз мун Ерусалимӧ.

⁵ Вежон мысти ми бара петім туйӧ. Ставныс гӧтыръясныскӧд да челядьныскӧд колльӧдісны миянӧс кар сайӧдзыс. Сэні вадорас ми сувтім пидзӧс выланым да кевмысим.

⁶ Янсӧдчӧм бӧрын ми сӧлім корабль вылӧ, а колльӧдысьяс мунісны гортаныс.

⁷ Тирсянь ми кывтім Птолемаидаӧ, тані помасис миян кывтӧмным. Сэні аддзысим вокъяскӧд да кольччим на ордӧ ӧти лун кежлӧ.

⁸ Аскинас ми, Павелкӧд ветлысьяс, мунім сыкӧд Кесарияӧ. Сэні пырим буръюӧртысь Филип ордӧ да кольччим сэтчӧ. Филипӧс вӧлі бӧрйӧма Ерусалимын сизим отсасьысь лыдӧ.

⁹ Сылӧн вӧлі нёль ныв, ставныс найӧ пророкалісны.

¹⁰ Уна лун ми вӧлім на дінын. Сійӧ кадас локтіс Иудеяысь Агав нима пророк.

¹¹ Кор сійӧ пырис миян дінӧ, босьтіс Павеллысь тасмасӧ да кӧрталіс ассьыс ки-коксӧ, сэсся шуис: «Тадзи висьталӧ Вежа Лов: тайӧ тасма новлысьсӧ иудейяс тадзи жӧ кӧрталасны Ерусалимын да сетасны ентӧдтӧмъяс киӧ».

¹² Тайӧс кылӧм бӧрын сэтчӧс эскысьяскӧд ми ставным корим, медым Павел эз мун Ерусалимӧ.

¹³ Павел воча шуис: «Мый ті бӧрданныд, менсьым сьӧлӧмӧс дойдаланныд? Ме дась лоны кӧрталӧмаӧн, весиг дась кувны Ерусалимын Господь Исус ним вӧсна».

¹⁴ Павелӧс кутны ми эгӧ вермӧй, сэки лӧнь сьӧлӧмӧн шуим: «Мед лоас Господьлӧн кӧсйӧм серти».

¹⁵ Та бӧрын ми лӧсьӧдчим туйӧ да мӧдӧдчим Ерусалимӧ.

¹⁶ Колльӧдігмоз миянкӧд тшӧтш мунісны Кесарияысь кодсюрӧ велӧдчысьяс. Найӧ вайӧдісны миянӧс кипрса Мнасон дінӧ, медым сувтны сы ордӧ. Мнасон важысянь нин вӧлі велӧдчысьяс лыдын.

Павел Ерусалимын

¹⁷ Кор ми воим Ерусалимӧ, вокъяс нимкодя сибӧдісны миянӧс.

¹⁸ Аскинас Павелкӧд ми мунім Яков дінӧ, кытчӧ локтісны тшӧтш вичкоса юрнуӧдысьяс.

¹⁹ Найӧс чолӧмалӧм бӧрын Павел сьӧрсьӧн-бӧрсьӧн висьтавліс ставсӧ, мый Енмыс вӧчис ентӧдтӧмъяс пӧвстын сылӧн кесъялӧм пыр.

²⁰ Павелӧс кывзӧм бӧрын юрнуӧдысьяс ошкисны Енмӧс, сэсся шуисны: «Тӧдан, вокӧй, иудейяс дас сюрсъясӧн бергӧдчисны эскӧмас, и ставныс найӧ кутчысьӧны Индӧдӧ.

²¹ Тэ йылысь найӧ кывлӧмаӧсь, тэ пӧ ентӧдтӧмъяс пӧвстын олысь иудейясӧс велӧдан эновтчыны Мӧисей Индӧдысь, ӧлӧдан найӧс пияннысӧ вундыштӧмысь да батьяслӧн оласногӧ кутчысьӧмысь.

²² Мый нӧ кутам вӧчны? Збыльысь ӧд йӧзыд чукӧртчасны, кор тӧдмаласны тэнсьыд локтӧмтӧ.

²³ Вӧч, кыдзи ми шуам. Миян пӧвстын эм нёль морт, кодъяслӧн эм Ен водзын кӧсйысьӧм.

²⁴ Босьт найӧс аскӧдыд да сӧстӧммӧдчы накӧд. Мынтысь на вӧсна, мед шырасны юрнысӧ. Сэки ставныс тӧдмаласны, мый тэ кутчысян Индӧдӧ, и тэ йылысь кывлӧмторйыс абу збыль.

²⁵ А эскӧмӧ бергӧдчӧм ентӧдтӧмъяслы ми гижлім, мед видзасны асьнысӧ идоллы вайӧм сёянысь, вир юӧмысь, джагалӧм пемӧс яй сёйӧмысь да кырсалӧмысь. Мукӧд тшӧктӧмас налы оз ков кутчысьны».

²⁶ Сэки Павел босьтіс аскӧдыс тайӧ йӧзсӧ да мӧд луннас сӧстӧммӧдчис накӧд. Сэсся муніс крамӧ да висьталіс, кор помасясны налӧн сӧстӧммӧдчан лунъясыс да кор лоӧ вайӧма быдӧн вӧсна вись.

Павелӧс крамын босьтӧм

²⁷ Сизимӧд луннас, сӧстӧммӧдчӧм помасигӧн, Асияысь воӧм иудейяс аддзисны Павелӧс крамысь. Найӧ шызьӧдісны став йӧзсӧ да Павелӧс босьтігӧн

²⁸ горзісны: «Израиль войтыр, отсалӧй босьтны тайӧ мортсӧ! Сійӧ быдлаын велӧдӧ-сёрнитӧ миян войтырлы паныд, Индӧдлы паныд да тайӧ вежаиныслы паныд. Весиг грекъясӧс вайӧдӧма татчӧ, пежалӧ вежаинсӧ».

²⁹ Та водзвылын найӧ аддзылӧмаӧсь карсьыс Павелӧс ефесса Трӧпимкӧд. Найӧ чайтісны, мый Павел сыкӧд локтіс крамӧ.

³⁰ Став карыс шызис, йӧзыс локтӧмӧн локтісны. Павелӧс босьтісны да кыскисны крамсьыс ортсӧ, крам ӧдзӧсъяссӧ дзик пыр йигналісны.

³¹ Павелӧс кӧсйисны нин вины, но буретш сэки сюрс тышкамортӧн веськӧдлысьлы кывсис, мый став Ерусалимыс шызьӧма.

³² Сійӧ дзик пыр босьтіс аскӧдыс тышкайӧзӧс да тэрмасьӧмӧн локтіс чукӧртчӧминӧ. Кор Павелӧс нӧйтысьяс аддзисны сюрс тышкамортӧн веськӧдлысьӧс да сылысь йӧзсӧ, дугдісны нӧйтны сійӧс.

³³ Веськӧдлысь матыстчис Павел дінӧ, сэсся тшӧктіс босьтны сійӧс да дорны чепъясӧн. Ачыс юасис, коді сійӧ да мый сійӧ вӧчис.

³⁴ Ӧтияс горзісны ӧтитор, мӧдъяс – мӧдтор. Йӧзлӧн горзӧмысь веськӧдлысь нинӧм эз гӧгӧрво, та вӧсна тшӧктіс нуӧдны Павелӧс изкарӧ.

³⁵ Содйӧд кайигӧн йӧзлӧн дзескӧдӧм вӧсна шыпуртаяслы ковмис нуны Павелӧс ки выланыс.

³⁶ Йӧзыс вӧтчисны на бӧрся да горзісны: «Виӧй сійӧс!»

Павел дорйӧ асьсӧ

³⁷ Изкарӧ пыригӧн Павел шуис сюрс тышкамортӧн веськӧдлысьлы: «Позьӧ-ӧ меным сёрнитны тэкӧд?» Мӧдыс шуис: «Тэ грек кыв тӧдан?

³⁸ Абу-ӧ тэ сійӧ египетсаыс, коді неважӧн зык лэптіс да петкӧдіс овтӧминӧ нёль сюрс лёк вӧчысьӧс?»

³⁹ Павел шуис: «Ме иудей, Киликияын нималана Тарс карысь. Кора, лэдз меным кыв шуны йӧзыслы».

⁴⁰ Павеллы лэдзисны сёрнитны. Сод вылас сулалӧмӧн Павел лэптіс кисӧ. Кор йӧзыс ланьтісны, сійӧ пондіс сёрнитны еврей кыв вылын: