Ап. уджъяс 12 - Коми Библия 2023

Петырӧс дзескыдінысь мездӧм

¹ Тайӧ кадӧ Ирӧд ӧксы пондіс ёна дзескӧдны вичкоысь кодсюрӧӧс.

² Сійӧ тшӧктіс вины Иоанлысь Яков воксӧ.

³ Ирӧд аддзис, мый тайӧ сьӧлӧм вылас воис иудейяслы, да тшӧктіс босьтны тшӧтш Петырӧс. Сэки буретш пасйисны Шомтӧм нянь сёян лунъяс.

⁴ Петырӧс босьтісны да йӧртісны дзескыдінӧ. Шыпуртаяслы тшӧктісны видзны сійӧс нёльӧн-нёльӧн да нёльысь вежласьӧмӧн. Ирӧд шуис Ыджыд лун бӧрын петкӧдны сійӧс йӧз водзӧ.

⁵ Петырӧс видзисны дзескыдінын, а вичко дугдывтӧг кевмысис сы вӧсна Енлы.

⁶ Петкӧдан лунлы паныда войӧ Петыр узис кык шыпурта костын. Сійӧс вӧлі дорӧма кык чептӧн, а дзескыдін ӧдзӧс дорын сулалісны видзысьяс.

⁷ Виччысьтӧг Господьлӧн андел сувтіс сы водзӧ, и гӧгӧр югдіс. Петырлы инмӧдчиг андел садьмӧдіс сійӧс да шуис: «Чеччы ӧдйӧджык». Петырлӧн киыс дзик пыр мыніс чепъясысь.

⁸ Андел шуис: «Вӧнясь да кӧмась». Петыр кывзысис. Сэсся андел шуис: «Пасьтав вылыс паськӧмтӧ да лок ме бӧрся».

⁹ Петыр муніс андел бӧрся, но чайтіс, мый ставыс тайӧ абу збыль, а сӧмын Енсянь петкӧдчылӧм.

¹⁰ Воддза да мӧд видзысьяс дінті мунӧм бӧрын найӧ воисны карсьыс петан кӧрт ӧдзӧс дорӧ. Ӧдзӧсыс ачыс воссис, да найӧ петісны. Туй вывті мунігӧн андел виччысьтӧг вошис.

¹¹ Сэки Петыр воис ас садяс да шуис: «Ӧні ме збыльысь тӧда, мый Господь мӧдӧдіс Ассьыс анделсӧ, мед мездыны менӧ Ирӧд киысь да иудей войтырлӧн меным дасьтӧм лёк вӧчӧмысь».

¹² Тайӧс гӧгӧрвоӧм бӧрын Петыр мӧдӧдчис Иоанлӧн Марья мамыс ордӧ. Тайӧ Иоансӧ шуисны Маркӧн. Сэні вель унаӧн вӧлі чукӧртчӧмаӧсь кевмысьны.

¹³ Петыр игӧдчис ӧдзӧсас. Восьтнысӧ петіс Рода нима кесйӧг ань.

¹⁴ Петырлысь гӧлӧссӧ кылӧм бӧрын сійӧ нимкодьысла весиг вунӧдіс восьтны ӧдзӧссӧ, котӧрӧн бӧр пырис да висьталіс, ӧдзӧс саяс пӧ Петыр сулалӧ.

¹⁵ Сылы воча шуисны: «Ас вежӧрад-ӧ тэ?» Но сійӧ пыр ассьыс долис. Сэки найӧ шуисны: «Гашкӧ, тайӧ Петырлӧн анделыс да».

¹⁶ А Петыр пыр на игӧдчис. Кор восьтісны да аддзисны сійӧс, ёна чуймисны.

¹⁷ Петыр сетіс кинас пас, медым найӧ лӧнясны. Сэсся висьталіс налы, кыдзи Господь петкӧдіс сійӧс дзескыдінысь. «Юӧртӧй та йылысь Яковлы да мукӧд вокъяслы», – шуис Петыр. Та бӧрын петіс на дінысь да муніс мӧдлаӧ.

¹⁸ Асывнас Петырлӧн вошӧмысь шыпуртаяс ёна шызисны.

¹⁹ Ирӧд корсис Петырӧс, но ставыс вӧлі весьшӧрӧ. Видзысьясӧс юасьӧм бӧрын сійӧ тшӧктіс вины найӧс. Сэсся Ирӧд муніс Иудеяысь Кесарияӧ да кольччис сэтчӧ.

Ирӧдлӧн кулӧм

²⁰ Ирӧд вӧлі скӧрмӧма Тир да Сидон карса олысьяс вылӧ. Найӧ ӧтвыв сёрнитчӧмӧн локтісны Ирӧд дінӧ бурасьӧм могысь, ӧд ӧксылӧн муыс вердіс найӧс. Найӧ эскӧдісны Властӧс, ӧксы керкаӧн веськӧдлысьӧс, мед сувтас на дор.

²¹ Индӧм лунӧ Ирӧд пасьталіс ӧксы паськӧм, пуксис юралан пуклӧсӧ да пондіс сёрнитны.

²² Йӧзыс гораа шуалісны, тайӧ пӧ Ен сёрнитӧ, оз морт.

²³ Сэки Господьлӧн андел чорыда дойдіс Ирӧдӧс, ӧд Енлы пыдди сійӧ аслыс босьтіс ошкӧмсӧ. Сійӧс ловъявывсьыс сёйисны номыръяс.

²⁴ А Енлӧн кывйыс ёна паськаліс.

²⁵ Варнава да Савл вайӧм сьӧмсӧ сетісны вичколы, сэсся Ерусалимысь бӧр мунісны Антиокияӧ. Аскӧдныс найӧ босьтісны тшӧтш Иоанӧс, кодӧс шуисны Маркӧн.