Ап. уджъяс 11 - Коми Библия 2023

Петыр висьтасьӧ апостолъяс водзын Ерусалимын

¹ Апостолъяслы да мукӧд вокъяслы Иудеяын кывсис, мый ентӧдтӧмъяс сибӧдӧмаӧсь Енлысь кывсӧ.

² Кор Петыр локтіс Ерусалимӧ, вундыштчӧмаяс вомалісны сійӧс.

³ Найӧ шуисны: «Тэ ветлӧмыд вундыштчытӧмъяс дінӧ да весиг ӧтлаын сёйӧмыд накӧд».

⁴ Сэки Петыр пондіс висьтавны налы ставсӧ сьӧрсьӧн-бӧрсьӧн:

⁵ «Ме вӧлі Иоппия карын. Сэні кевмысигӧн быттьӧ ас садьысь петі да аддзи Енсянь петкӧдчылӧм: енэжсяньыс лэччис мыйкӧ паськыд дӧра кодь. Нёльнан пельӧсӧдыс кутӧмӧн дӧрасӧ лэдзисны ме водзӧ.

⁶ Ме видзӧдлі да аддзи сэтысь мувывса нёль кока пемӧсъясӧс, веглясьысьясӧс да енэжвыв лэбачьясӧс.

⁷ Сэки ме кылі гӧлӧс шы: ”Чеччы, Петыр, начкы да сёй”.

⁸ Ме шуи: ”Ог, Господьӧй. Ме некор эг босьтлы вомӧ нинӧм шогмытӧмсӧ да пежсӧ”.

⁹ Сэсся енэжсяньыс ме бара кылі: ”Енмыс мый сӧстӧммӧдӧма, эн лыддьы сійӧс пежӧн”.

¹⁰ Тадзи вӧлі куимысь, сэсся ставсӧ бӧр кыпӧдісны енэжас.

¹¹ Буретш сійӧ каднас куим морт сувтісны керка дорӧ, кӧні ме вӧлі. Найӧс, вӧлӧмкӧ, Кесариясянь мӧдӧдӧмаӧсь ме дінӧ.

¹² Лов тшӧктіс меным майшасьтӧг мунны накӧд. Мекӧд тшӧтш мунісны тайӧ квайт вокыс. Кор ми локтім сійӧ мортыс ордӧ,

¹³ сійӧ висьталіс миянлы, мый аддзылӧма анделӧс. Андел сувтӧма керка шӧрас да шуӧма сылы, мӧдӧд пӧ йӧзтӧ Иоппияӧ Симонла, кодӧс шуӧны Петырӧн.

¹⁴ Сійӧ пӧ висьталас тэныд юӧр, код пыр мездман тэ да став тэнад гортсаыд.

¹⁵ И кор ме куті сёрнитны, на вылӧ лэччис Вежа Лов, кыдзи водзынсӧ миян вылӧ.

¹⁶ Сэки меным тӧд вылӧ уси Господьлӧн шуӧмыс: ”Иоан пыртіс ваӧн, но тіянӧс лоӧ пыртӧма Вежа Лолӧн”.

¹⁷ Енмыс кӧ миянлы моз и налы сетіс тайӧ козинсӧ, кор найӧ эскисны Господь Исус Кристослы, сідзкӧ, коді ме сэтшӧмыс, медым паныд сувтны Енмыслы?»

¹⁸ Тайӧс кылӧм бӧрын найӧ лӧнисны да ошкисны Енмӧс шуалӧмӧн: «Тыдалӧ, Енмыс ентӧдтӧмъяслы тшӧтш сетӧма позянлун бергӧдчыны мыжъяссьыс, мед и налӧн вӧлі олӧм».

Антиокияса вичко

¹⁹ Степанӧс виӧм бӧрын дзескӧдӧм вӧсна разалӧмаяс мунісны Финикияӧдз, Кипрӧдз да Антиокияӧдз. Енлысь кывсӧ иудейяслы кындзи найӧ некодлы эз висьтавлыны.

²⁰ На пӧвстын тшӧтш вӧліны Кипрысь да Киринеяысь кодсюрӧ. Антиокияӧ локтӧм бӧраныс найӧ висьтавлісны грекъяслы Господь Исус йылысь Бур Юӧр.

²¹ Господь вӧлі накӧд, та вӧсна унаӧн эскисны да бергӧдчисны Господь дінӧ.

²² Та йылысь кывсис Ерусалимын эскысьяслы. Сэки найӧ мӧдӧдісны Антиокияӧ Варнаваӧс.

²³ Воӧм бӧрас Варнава аддзис, мый сэні Енлӧн буралӧмыс, да ёна нимкодясис. Сійӧ ышӧдіс быдӧнӧс став сьӧлӧмнас кутчысьны Господь дінӧ.

²⁴ Варнава вӧлі бур морт, тырӧма Вежа Лолӧн. Сылӧн вӧлі зумыд эскӧм. Унаӧн сэки бергӧдчисны Господь дінӧ.

²⁵ Сэсся Варнава муніс Тарсӧ корсьны Савлӧс и аддзӧм бӧрас локтіс сыкӧд Антиокияӧ.

²⁶ Во чӧж найӧ чукӧртчывлісны сэні эскысьяскӧд да велӧдісны бура уна йӧзӧс. Антиокияын велӧдчысьясӧс медводдзаысь шуисны Кристос войтырӧн.

²⁷ Сійӧ лунъясӧ Антиокияӧ локтісны Ерусалимысь пророкъяс.

²⁸ На пиысь Агав нима пророк Ловсянь водзвыв висьталіс, мый став му пасьтала лоас ыджыд тшыгъялӧм. Клавдий кесар дырйи тадзи и лоис.

²⁹ Велӧдчысьяс шуисны отсавны Иудеяын олысь вокъяслы, коді мыйта вермас.

³⁰ Тадзи и вӧчисны: Варнавакӧд да Савлкӧд найӧ мӧдӧдісны вичкоса юрнуӧдысьяслы сьӧм.