Ап. уджъяс 10 - Коми Библия 2023

Петыр Корнилий ордын

¹ Кесарияын оліс Корнилий нима морт, италияса тышкакотырӧн веськӧдлысь.

² Сійӧ вӧлі вежавидзысь морт, ачыс да сылӧн гортсаыс олісны Енмысь полӧмӧн. Корнилий отсасис гӧль иудейяслы да пыр кевмысис Енлы.

³ Куим час лунын сійӧ вемӧсӧн аддзыліс Енлысь анделӧс, коді пырис сы дінӧ да шыасис: «Корнилий!»

⁴ Повзьӧмпырысь андел вылӧ видзӧдлӧмӧн Корнилий шуис: «Мый, Ыджыдӧй?» Андел шуис сылы: «Енмыс кылӧма тэнсьыд кевмысьӧмтӧ да аддзӧма гӧльяслы отсасьӧмтӧ.

⁵ Дзик пыр мӧдӧд йӧзтӧ Иоппияӧ Симонла, кодӧс шуӧны Петырӧн.

⁶ Ӧні сійӧ кучик вӧчысь Симон ордын, сылӧн керкаыс сулалӧ саридз дорас. Сійӧ висьталас тэныд юӧр, код пыр мездман тэ да став тэнад гортсаыд».

⁷ Андел мунӧм бӧрын Корнилий корис ассьыс кык кесйӧгсӧ да вежавидзӧмӧн олысь ассьыс киподувса тышкамортӧс.

⁸ Корнилий висьталіс налы ставсӧ да мӧдӧдіс найӧс Иоппияӧ.

⁹ Мӧд луннас найӧ вӧлі матыстчӧны карланьыс. Буретш сэки, луншӧр кадӧ, Петыр кайис керка вылас кевмысьны.

¹⁰ Петырлӧн кынӧмыс кутіс сюмавны, сійӧ кӧсйис сёйны. Кор сёянсӧ вӧлі дасьтӧны на, Петыр быттьӧ ас садьсьыс петіс

¹¹ да аддзис, мый восьса енэжсяньыс сы дінӧ лэччӧ мыйкӧ паськыд дӧра кодь. Нёльнан пельӧсӧдыс кутӧмӧн дӧрасӧ лэдзисны му вылӧ.

¹² Сэні вӧліны мувывса быдпӧлӧс нёль кока пемӧсъяс, веглясьысьяс да енэжвыв лэбачьяс.

¹³ Сэки Петыр кыліс гӧлӧс шы: «Чеччы, Петыр, начкы да сёй».

¹⁴ Петыр шуис: «Ог, Господьӧй. Ме некор эг сёйлы нинӧм шогмытӧмсӧ да пежсӧ».

¹⁵ Сэсся бара кыліс: «Енмыс мый сӧстӧммӧдӧма, эн лыддьы сійӧс пежӧн».

¹⁶ Тадзи вӧлі куимысь, сэсся дӧрасӧ бӧр кыпӧдісны енэжас.

¹⁷ Петыр шӧйӧвошӧмӧн мӧвпаліс, мый эськӧ лоӧ тайӧ аддзывлӧмторйыс. Сійӧ кадас Корнилийӧн мӧдӧдӧмаяс Симонлысь керкасӧ аддзӧм бӧрын сувтісны потшӧс дорас

¹⁸ да гораа юалісны: «Тані-ӧ Симоныс, кодӧс шуӧны Петырӧн?»

¹⁹ Кор Петыр мӧвпаліс на аддзывлӧм йывсьыс, Лов шуис сылы: «Тэнӧ корсьӧны куимӧн.

²⁰ Лэччы да майшасьтӧг мун накӧд, ӧд найӧс Ме мӧдӧді».

²¹ Петыр лэччис воӧмаяс дінӧ да шуис: «Ме сійӧ мортыс, кодӧс ті корсянныд. Мый могӧн локтінныд?»

²² Найӧ висьталісны: «Миянӧс мӧдӧдіс Корнилий, сё тышкамортӧн веськӧдлысьным. Сійӧ веськыда олысь да Енмысь полысь морт, иудей войтыр сійӧс пыдди пуктӧ. Вежа андел тшӧктӧма сылы корны тэнӧ гортас, мед кывзыны тэнсьыд висьталӧмтӧ».

²³ Петыр корис найӧс керкаас, вердіс-юкталіс, сэсся мӧд луннас петіс накӧд туйӧ. Сыкӧд тшӧтш мунісны Иоппияысь кодсюрӧ вокъяс.

²⁴ Лун мысти воисны Кесарияӧ. Корнилий виччысис найӧс. Сійӧ вӧлі корӧма ассьыс рӧдвужсӧ да матысса ёртъяссӧ.

²⁵ Пыриганыс Корнилий воча петіс Петырлы да копыртчис сы водзӧ.

²⁶ Петыр сійӧс лэптігмоз шуис: «Чеччы, ме ӧд морт жӧ».

²⁷ Сэсся сыкӧд сёрнитігтырйи пырис керкаӧ да аддзис керка тыр йӧзӧс.

²⁸ Петыр шуис налы: «Ті тӧданныд, мый иудейяслы оз позь ӧтувтчыны да волысьны мукӧд войтыркӧд. Но Ен меным петкӧдліс, мед ме некодӧс эг пукты шогмытӧмӧ да пеж туйӧ.

²⁹ Та вӧсна ме кывшутӧг локті тіян дінӧ. Кӧсъя тӧдны, мый могӧн ті коринныд менӧ?»

³⁰ Корнилий висьталіс: «Куим лун сайын дзик тайӧ кадас куим часын ме видзалӧмӧн кевмыси гортын. Сэки сувтіс ме водзӧ дзирдалан паськӧма морт

³¹ да шуис, Корнилий, Енмыс пӧ кылӧма тэнсьыд кевмысьӧмтӧ да аддзӧма гӧльяслы отсасьӧмтӧ.

³² Мӧдӧд пӧ йӧзтӧ Иоппияӧ корны Симонӧс, кодӧс шуӧны Петырӧн. Ӧні пӧ сійӧ кучик вӧчысь Симон керкаын, а керкаыс пӧ саридз дорас. Сійӧ пӧ локтас да висьталас тэныд ставсӧ.

³³ Сэки ме дзик пыр мӧдӧді тэ дінӧ ассьым йӧзӧс. Тэ бура вӧчин, мый локтін. Ми ставным ӧні Ен водзынӧсь да дасьӧсь кывзыны ставсӧ, мый Енмыс тшӧктіс висьтавны тэныд».

³⁴ Петыр шуис: «Ме збыльысь ӧні гӧгӧрвоа, мый Енмыслы став йӧзыс ӧткодьӧсь.

³⁵ Быд войтыр пӧвстысь Сійӧ сибӧдӧ найӧс, кодъяс олӧны веськыда да Сыысь полӧмӧн.

³⁶ Сійӧ мӧдӧдіс Израиль войтырлы Ассьыс кывсӧ, лӧньлун йылысь Бур Юӧрсӧ, кодӧс вайис Исус Кристос. Сійӧ ставныслы Господь.

³⁷ Ті тӧданныд, мый вӧлі Галилеяын, сэсся став Иудея пасьтала сійӧ пыртчӧм бӧрын, мый йылысь висьтавліс Иоан.

³⁸ Ен мавтыштіс Назаретса Исусӧс Вежа Лолӧн да вынӧн. Исус быдлаті ветлӧдліс, уна бур вӧчис йӧзыслы, бурдӧдаліс да мездіс йӧзсӧ омӧльыслӧн киысь. Енмыс вӧлі Сыкӧд.

³⁹ Ми асланым синмӧн аддзылім ставсӧ, мый Сійӧ вӧчис Иудея муын да Ерусалимын. Сійӧс пу вылӧ ӧшӧдӧмӧн виисны.

⁴⁰ Но Енмыс ловзьӧдіс Сійӧс коймӧд луннас да сетіс Сылы петкӧдчывны,

⁴¹ но эз став йӧзыслы, а миянлы, кодъясӧс Енмыс водзысяньыс бӧрйис висьтавны та йылысь. Сійӧ тшӧктіс миянлы, кодъяс ӧтлаын сёйим-юим Сыкӧд ловзьӧм бӧрас,

⁴² юӧртны йӧзыслы да висьтавны, мый Ен пуктіс Сійӧс ловъяяслы да кулӧмаяслы Мыждысьӧн.

⁴³ Сы йылысь став пророкыс висьталӧ, мый быдӧнлысь, коді эскӧ Сылы, лоӧ прӧститӧма мыжъяссӧ Сы нимӧн».

⁴⁴ Петырлӧн сёрнитігӧн Вежа Лов лэччис ставныс вылӧ, кодъяс сэні кывзісны.

⁴⁵ Петыркӧд локтӧм эскысь иудейяс чуймисны, мый Вежа Ловсӧ сетӧма тшӧтш мукӧд войтыръяс пиысь эскысьяслы,

⁴⁶ ӧд кылісны налысь мукӧд кывъяс вылын сёрнитӧмсӧ да Енмӧс ошкӧмсӧ. Сэки Петыр шуис:

⁴⁷ «Вермас-ӧ кодкӧ кутны найӧс пыртчӧмысь, налы кӧ миянлы моз тшӧтш сетӧма Вежа Ловсӧ?»

⁴⁸ Сэсся Петыр тшӧктіс налы пыртчыны Исус Кристос нимӧн. А найӧ корисны Петырӧс кольччыны сэтчӧ кымынкӧ лун кежлӧ.