Ап. уджъяс 1 - Коми Библия 2023

Вежа Лов йылысь кӧсйысьӧм

¹ Воддза небӧгас, дона Феофил, ме гижи тэныд ставсӧ, мый Исус вӧчис да мыйӧ велӧдіс медводдза лунсяньыс

² да сійӧ лунӧдзыс, кор кыпӧдчис енэжӧ. Кыпӧдчытӧдзыс на Сійӧ Вежа Ловсянь сетіс Аслас бӧрйӧм апостолъяслы тшӧктӧмъяс.

³ Сьӧкыда кулӧм бӧрас Сійӧ уна эскӧданторйӧн петкӧдліс налы, мый Сійӧ ловзис. Нелямын лун чӧж Сійӧ петкӧдчывліс да висьтавліс Енлӧн Юралӧм йылысь.

⁴ Апостолъяскӧд ӧтлаын сёйигӧн Исус шуис: «Ерусалимысь энӧ мунӧй. Виччысьӧй Батьлысь кӧсйысьӧмасӧ, мый йылысь Ме висьтавлі тіянлы.

⁵ Иоан пыртіс ваӧн, но кымынкӧ лун мысти тіянӧс лоӧ пыртӧма Вежа Лолӧн».

⁶ Чукӧртчӧмаяс юалісны Исуслысь: «Господьӧй, он-ӧ тайӧ кадӧ Тэ бӧр сувтӧд Израильлы юралӧмсӧ?»

⁷ Сійӧ вочавидзис: «Абу тіян мог тӧдны кадъяс йылысь, Бать индӧ кадъяссӧ.

⁸ Но кор лэччас тіян вылӧ Вежа Лов, тіянлы лоӧ сетӧма вын. Сэки понданныд висьтавлыны Ме йылысь Ерусалимын, став Иудеяын, Самарияын да став му пасьталаыс».

Енэжӧ кыпӧдчӧм

⁹ Тайӧс висьталӧм бӧрын налӧн син водзын Исус кыпӧдчис енэжӧ. Кымӧрыс кыпӧдіс Сійӧс налӧн син водзсьыныс.

¹⁰ Найӧ синнысӧ эз лэдзлыны енэжысь, пыр видзӧдісны Сылысь ылыстчӧмсӧ. Виччысьтӧг на водзӧ сувтісны еджыд паськӧма кык морт.

¹¹ Найӧ шуисны: «Галилея войтыр, мый ті сулаланныд да видзӧданныд енэжас? Ті асланыд синмӧн аддзылінныд Исуслысь енэжӧ кыпӧдчӧмсӧ, тадзикӧн Сійӧ бӧр локтас».

¹² Сэсся апостолъяс лэччисны Олив керӧсысь да бӧр локтісны Ерусалимӧ. Тайӧ керӧсыс Ерусалимсянь вӧлі верст ылнаын.

¹³ Локтӧм бӧраныс найӧ пырисны керкаӧ да кольччисны сэні вылыс судтаас. Тайӧ вӧліны: Петыр, Яков, Иоан, Ӧндрей, Филип, Фома, Варфоломей, Матвей, Алфей Яков, Симон Зилот да Яков Иуда.

¹⁴ Найӧ ставныс аньяскӧд, Исуслӧн вокъяскӧд да Сылӧн Мария мамыскӧд ӧти сьӧлӧмӧн дугдывтӧг кевмысисны.

Дас кыкӧд апостолӧс бӧрйӧм

¹⁵ Сійӧ лунъясӧ чукӧртчис сё кызь гӧгӧр велӧдчысь. На шӧрӧ сувтӧмӧн Петыр шуис:

¹⁶ «Вокъясӧй, Гижӧдыслы колӧ вӧлі инны. Ӧд Давид пыр на Вежа Лов висьтавліс Иуда йылысь, коді вайӧдіс Исус дінӧ Сійӧс босьтысьясӧс.

¹⁷ Иуда вӧлі миян пӧвстысь, сійӧс миянӧс моз тшӧтш вӧлі бӧрйӧма кесъявны.

¹⁸ Лёк уджсьыс босьтӧм сьӧм вылас сійӧ ньӧбис му. Сэні лёкногӧн усис, кынӧмыс потіс, весиг гырк пытшкӧсыс ортсӧ петіс.

¹⁹ Та йылысь тӧдмаліс став Ерусалимыс. Та вӧсна муыслы сетісны Акелдама ним, мый лоӧ ”вир му”.

²⁰ Псалом небӧгын гижӧма: ”Сылӧн оланіныс мед кушмас, сэні мед оз ло олысьыс”. Нӧшта гижӧма: ”Сылысь кесъялӧмсӧ мед босьтас мӧд”.

²¹ Та вӧсна миянлы колӧ бӧрйыны ӧтиӧс на пиысь, кодъяс вӧліны миянкӧд да Господь Исускӧд

²² Иоанлӧн пыртӧмсянь да Исуслӧн енэжӧ кыпӧдчытӧдзыс. Мед тайӧ мортыс сэсся миянкӧд тшӧтш висьтавлас Исуслӧн ловзьӧм йылысь».

²³ Сэки вӧзйисны кыкӧс: Ӧсип-Варсаваӧс, кодӧс шуисны Юстӧн, да Матфийӧс.

²⁴ Кевмысиганыс шуисны: «Господьӧй, Тэ быдӧнлысь тӧдан сьӧлӧмсӧ. Инды тайӧ кыксьыс Ассьыд бӧрйӧматӧ,

²⁵ медым сійӧ тшӧтш кутас кесъявны да апостолавны. Иуда кежис таысь да муніс сэтчӧ, кӧні сылы колӧ лонысӧ».

²⁶ Сэсся пудъясисны на вӧсна. Пудйыс уси Матфийлы, сійӧс и индісны дас кыкӧд апостолнас.