Амос 6 - Коми Библия 2023

Вылӧ кыпӧдчысьясӧс мыждӧм

¹ Курыд шог тіянлы, войтыр пӧвстысь медтӧдчанаяслы, кодъяс вылӧ став Израиль лача кутӧ. Ті тӧждысьтӧг оланныд Сионын да Самария керӧс вылын.

² Мунӧй Калне карӧ да видзӧдлӧй, сэтысянь мунӧй ыджыд Хамат карӧ, лэччӧй филистимса Геф карӧ. Ті ӧд наысь абу ёнджыкӧсь. Налӧн ӧмӧй муныс тіянысь ыджыдджык?

³ Ті кӧсъянныд ылыстны сійӧ лунсӧ, кор лёкыс суас тіянӧс, но ті асланыд виалӧм-дзескӧдӧмӧн матыстанныд сійӧс.

⁴ Ті куйланныд слӧн лыысь вӧчӧм узьланін вылын, жуйвидзанныд юрлӧсъяс вылын пукалӧмӧн. Ті босьтанныд ыж чукӧрысь баляясӧс, йирсянінысь куканьясӧс, и сёянныд найӧс.

⁵ Ті лӧвтанныд-сьыланныд арфа улӧ, чайтанныд, мый Давид моз кужанныд ворсны.

⁶ Вись ваян дозйысь ті юанныд вина, мавтчанныд медбур мавтасъясӧн. Но тіянлы веськодь, мый Ӧсиплысь рӧдсӧ суас бырӧдӧм.

⁷ Та вӧсна ті медводдзаясӧн мунанныд пленӧ – помасяс жуйвидзысьяслӧн гажӧдчӧмыс!

⁸ Яков рӧдлӧн вылӧ кыпӧдчӧмыс Меным зывӧк, сылысь изкарсӧ Ме мустӧмта, – висьталӧ Господь Ен Саваоф. – Та вӧсна Ме, Господь Ыджыдыс, кыв сета, мый карсӧ ставнас вӧрӧглы коля.

⁹ Весиг дас морт кӧ ӧти керкаӧ дзебсясны, найӧ тшӧтш куласны.

¹⁰ Кор шойысла локтас рӧдвужсьыс кодкӧ али шойяс сотысь да юалас керкаас пукалысьлысь: «Эм-ӧ на кодкӧ тэкӧд?», мӧдыс вочавидзас: «Абу». Локтысь содтас: «Чӧв ов! Господьлысь нимсӧ тані эн казьтыв».

¹¹ Ӧд Господь тшӧктас пазӧдны ыджыд керкаяс, дзикӧдз жуглыны ичӧт керкаяс.

¹² Изкырта вывті ӧмӧй котралӧны вӧвъяс? Верман ӧмӧй ӧшъясӧн гӧрны сэті? А ті бергӧдінныд веськыда мыждӧмсӧ пагӧдан быдмӧгӧ, веськыдлуныслысь вотӧссӧ – курыд зелляӧ.

¹³ Ті нимкодясянныд Ло-Девар кар босьтӧмысь, шуанныд, асланым вынӧн пӧ Карнаим босьтім.

¹⁴ Израильсаяс, кывзӧй, – висьталӧ Господь Ен Саваоф. – Ме кыпӧда тіянлы паныд войтырӧс. Найӧ кутасны дзескӧдны тіянӧс быдлаын Лево-Хаматсянь Арава сёнӧдз.