Амос 5 - Коми Библия 2023

Израиль йылысь бӧрдӧдчанкыв

¹ Кывзӧй, Израиль войтыр, тіян йылысь сьыла тайӧ бӧрдӧдчанкывсӧ.

² Усьӧма Израиль ныв, чеччынысӧ оз вермы! Аслас му вылӧ сійӧс шыбитӧма, сійӧс лэптысьыс абу.

³ Господь Ыджыдыс тадзи висьталӧ: – Израильса карысь кӧ тышӧ петас сюрс морт, ловйӧн кольӧ сӧмын сёыс. Петас кӧ сё морт, ловйӧн кольӧ дасыс.

⁴ Господь тадзи висьталӧ Израиль войтырлы: – Корсьӧй Менӧ, и ловйӧн колянныд.

⁵ Энӧ Вефильысь Менӧ корсьӧй, энӧ мунӧй юрбитны Галгалӧ, энӧ ветлӧдлӧй Бер-Шеваӧ. Ӧд Галгалын олысьясӧс пленӧ нуӧдасны, Вефиль нинӧмӧдз воас.

⁶ Корсьӧй Господьӧс, и ловйӧн колянныд. Онӧ кӧ корсьӧй, Сійӧ биӧн уськӧдчас Ӧсиплӧн рӧд вылӧ, и биыс ньылыштас ставсӧ, сотчас Вефиль – и сійӧс кусӧдысьыс оз ло.

⁷ Со, веськыда мыждӧмсӧ ті бергӧдінныд курыд зелляӧ, веськыдлунсӧ муӧ талялінныд!

⁸ Сійӧ вӧчис Корӧся да Куима кодзув чукӧръяс, сап пемыдсӧ вежӧ асъя югыдӧ, лунсӧ – войӧ. Саридзысь Сійӧ чукӧстӧ васӧ да мусӧ киськалӧ. Сылӧн нимыс – Господь!

⁹ Вынаясӧс Сійӧ бырӧдӧ, налысь изкарсӧ кисьтӧ.

¹⁰ Коді ёрд вылын веськыда мыждыны корӧ, сійӧс ті мустӧмтанныд, збыльсӧ висьталысьӧс зывӧктанныд.

¹¹ Ті дзескӧданныд гӧльясӧс, босьтанныд налысь няньсӧ. Та вӧсна лоас тадзи: ті лэптанныд керкаяс кералӧм ыджыд изъясысь, но сэтчӧ онӧ овмӧдчӧй, ті пуктанныд бур виноград йӧръяс, но сэтчӧс вотӧсысь пычкӧм винасӧ онӧ юӧй.

¹² Ме тӧда, кутшӧм уна тіян лёк вӧчӧмныд, тӧда, кутшӧм уна тіян мыжъясныд. Веськыда олысьӧс ті дзескӧданныд, козинъяс босьтанныд, ёрд вылын коньӧрӧс мыжтӧгыс мыжданныд.

¹³ Та вӧсна вежӧра морт татшӧм кадӧ чӧв олӧ, ӧд тайӧ лёк кад.

¹⁴ Бурсӧ корсьӧй, а эн лёксӧ, медым ті ловйӧн колинныд. Сэки Господь Ен Саваоф лоас тіянкӧд, кыдзи ті и шуанныд.

¹⁵ Мустӧмтӧй лёксӧ да радейтӧй бурсӧ, веськыда мыждӧй ёрд вылын. Гашкӧ, Господь Ен Саваоф бурсьӧлӧмтчас Ӧсип рӧдысь ловйӧн кольӧмаяс дінӧ.

¹⁶ Господь Ыджыдыс, Ен Саваоф тадзи висьталӧ: – Быд изэрд вылын кутас кывны бӧрдӧм шы, быд туй вылын – ойзӧм. Му вӧдитысьясӧс ӧтвылысь бӧрдӧдчысьяскӧд корасны бӧрдӧдчыны-сьывны.

¹⁷ Быд виноград йӧрын кутасны синва кисьтны, ӧд Ме муна тіян пӧвстті, – висьталӧ Господь.

Господь кӧсйӧ веськыдлун, оз висьяс

¹⁸ Курыд шог сылы, коді Господьлысь лунсӧ виччысьӧ! Бур вылӧ-ӧ тіянлы Господьлӧн луныс лоӧ? Сійӧ пемыд лоӧ, оз югыд.

¹⁹ Сійӧ лунӧ ті лоанныд морт кодь, коді пышйӧ левысь, но паныдасьӧ ошкӧд, котӧртӧ гортӧдзыс да кутчысьӧ кинас стенмӧ, но сійӧс змей чушкӧ.

²⁰ Господьлӧн луныс пемыд, абу югыд. Сылӧн луныс сап пемыд, весиг чут мында абу югыдыс.

²¹ Ме мустӧмта гажӧдчан лунъяснытӧ, зывӧкта гажӧдчыны чукӧртчӧмнытӧ.

²² Ваянныд кӧ Меным сотан да нянь висьяс, Ме ог сибӧд найӧс. Бурасян вись пыдди кӧ ваянныд тшӧгӧдӧм куканьясӧс, Ме ог видзӧдлы на вылӧ.

²³ Ылыст Ме дінысь гора сьыланкывъястӧ, арфа шыястӧ Ме ог кӧсйы кывзыны.

²⁴ Но веськыда мыждӧмыс мед визувтас ва моз, веськыдлуныс – ю моз.

²⁵ Израиль войтыр! Нелямын во чӧжнас овтӧминын вайлінныд-ӧ ті Меным начкӧм ыж-мӧскӧс да мукӧд вись?

²⁶ Ті новлӧдлінныд Молок идоллысь чомсӧ да Ремфан енлысь кодзувсӧ – ас киӧн вӧчӧм бӧлбанъясӧс.

²⁷ Та вӧсна Ме вӧтла тіянӧс Дамаскысь на ылӧджык, – висьталӧ Господь. Сылӧн нимыс – Ен Саваоф.