Аггей 1 - Коми Библия 2023

Господь тшӧктӧ лэптыны крам

¹ Дарий ӧксылӧн мӧд веськӧдлан воӧ, квайтӧд тӧлысьлӧн медводдза лунӧ, Шеалтиэллӧн Зоровавель пилы, Иуда муын юралысьлы, да Иоседеклӧн Исус пилы, аркирейлы, Аггей пророк пыр вӧлі Господьсянь кыв:

² «Господь Саваоф тадзи висьталӧ: тайӧ войтырыс шуалӧ, эз пӧ на во кадыс Господьлысь крамсӧ выльысь лэптыны».

³ Та вӧсна Аггей пророк пыр вӧлі Господьсянь кыв:

⁴ – Тіянлы ӧмӧй кад овны мичмӧдӧм керкаясын, кор тайӧ крамсӧ пазӧдӧма?

⁵ Господь Саваоф тадзи висьталӧ: – Видзӧдлӧй, кыдзи ті оланныд!

⁶ Ті уна кӧдзанныд, но этша вунданныд, ті сёянныд, но онӧ пӧтӧй, ті юанныд, но горшныд оз веськав, ті пасьтасянныд, но онӧ шоналӧй, ті мырсянныд-уджаланныд, но зепныд век куш.

⁷ Господь Саваоф тадзи висьталӧ: – Видзӧдлӧй, кыдзи ті оланныд!

⁸ Кайӧй керӧс вылӧ, вайӧй сэтысь пуяс да Менӧ пыдди пуктӧм могысь лэптӧй Менам сьӧлӧм серти крам, – висьталӧ Господь.

⁹ – Ті виччысянныд уна, а чукӧртанныд этша. Мый ваянныд гортаныд – сійӧс Ме шердъя. Мыйла тадзи артмӧ? – висьталӧ Господь Саваоф. – Сы вӧсна, мый Менсьым крамӧс пазӧдӧма, а ті асланыд керкаяс вӧсна тӧждысянныд.

¹⁰ Та вӧсна енэжыс оз сет тіянлы зэрсӧ, муыс оз сет быдтассӧ.

¹¹ Ме мӧдӧді зэртӧм кад му вылӧ, керӧсъяс да кӧдзасъяс вылӧ, виноград да олив пуяс вылӧ, мувывса став быдтас вылӧ, йӧз вылӧ да ыж-мӧс вылӧ, видз-му уджъяс вылӧ.

¹² Зоровавель, Шеалтиэллӧн пиыс, да Исус аркирей, Иоседеклӧн пиыс, тшӧтш пленысь воӧм коляс войтырыс кывзысисны Господьлысь, асланыс Енлысь. Найӧ сибӧдісны-кывзісны Аггей пророклысь кывъяссӧ, ӧд Господь, налӧн Енмыс, мӧдӧдіс сійӧс на дінӧ. Войтырыс поліс-вежавидзис Господьысь.

¹³ Сэки Аггей, кодӧс Господь мӧдӧдіс, юӧртіс войтырыслы: «Ме тіянкӧд! – висьталӧ Господь».

¹⁴ Господь ышӧдіс Шеалтиэллысь Зоровавель писӧ, Иуда муын юралысьӧс, да Иоседеклысь Исус писӧ, аркирейӧс, тшӧтш коляс войтырсӧ, и найӧ локтісны да кутісны лэптыны Господь Саваофлысь, асланыс Енлысь, крамсӧ.

¹⁵ Тайӧ вӧлі Дарий ӧксылӧн мӧд веськӧдлан воӧ, квайтӧд тӧлысьлӧн кызь нёльӧд лунӧ.