2 Тимофейлы 4 - Коми Библия 2023

Быд кадӧ висьтав Бур Юӧрсӧ

¹ Ен водзын да Господь Исус Кристос водзын, коді кутас мыждыны ловъяясӧс да кулӧмаясӧс, Сылысь локтӧмсӧ да Юралӧмсӧ тӧд вылын кутӧмӧн кора тэнӧ:

² ло дась висьтавны Енлысь кывсӧ лӧсялан и лӧсявтӧм кадӧ. Бур велӧдысь моз терпитӧмӧн янӧд, ӧлӧд да туйдӧд.

³ Ӧд воас кад, кор веськыд велӧдӧмсӧ оз пондыны кывзыны. Йӧзыс ас лёк кӧсйӧм сертиныс бӧръясны велӧдысьясӧс да пондасны кывзыны найӧс.

⁴ Пельнысӧ тупкасны збыльыслы да бергӧдчасны мойдъяслань.

⁵ Но тэнад вежӧрыд мед лоӧ ясыд быдторйын, сьӧкыд нуигъясад кутчысь, висьтавлы Бур Юӧрсӧ да кесъяв помӧдз.

⁶ Ӧні ме Ен водзӧ вайӧм вись кодь, воис кад меным мунны.

⁷ Ме бура вермаси, помӧдзыс котӧрті, эскӧмӧс видзи.

⁸ Ӧні менӧ виччысьӧ веськыдлуныслӧн юркытш. Веськыда мыждысь Господь Аслас лунӧ сетас сійӧс меным да быдӧнлы, коді став сьӧлӧмнас виччысьӧ Сылысь локтӧмсӧ.

Павеллӧн корӧмъяс

⁹ Тэрмась локны ме дінӧ регыдъя кадӧ.

¹⁰ Димас эновтіс менӧ да муніс Фессалоникаӧ. Сылы тайӧ мувывса олӧмыс мусаджык вӧлӧма. Крискент муніс Галатӧ, Тит – Далматияӧ, ӧтнас Лука мекӧд.

¹¹ Босьт аскӧдыд Маркӧс, сійӧ лоӧ бур отсасьысьӧн менам уджын.

¹² Тихикӧс ме мӧдӧді Ефесӧ.

¹³ Локтігад вай менсьым кышанӧс, сійӧс ме коли Троадаӧ Карп ордӧ. Босьт нӧшта менсьым небӧгъясӧс, торйӧн нин кучик вылӧ гижӧмасӧ.

¹⁴ Кузнеч Ӧльӧксан вӧчис меным уна лёксӧ. Господь Ачыс мед перъяс сылысь водзӧссӧ ставсьыс.

¹⁵ Видзчысь сыысь. Сійӧ ёна паныд сувтіс миян велӧдӧмлы.

¹⁶ Ёрд водзын медводдза дорйысигӧн некод эз сувт ме дор, ставныс эновтісны менӧ. Мед оз ло лыддьӧма тайӧс налы мыжӧн.

¹⁷ Ачыс Господь вӧлі ме дор. Сійӧ ёнмӧдіс менӧ, медым ме верми тырвыйӧ буръюӧртны, медым ентӧдтӧмъяс кылісны тайӧ Бур Юӧрсӧ. Господь мездіс менӧ весиг лев вомысь.

¹⁸ Тӧда, Сійӧ видзас менӧ став лёксьыс, мездас да вайӧдас Аслас енэжвыв Юраланінӧ. Ошкӧм Сылы нэмъяс чӧж! Аминь.

¹⁹ Висьтав чолӧм Прискиллалы да Акиллы, тшӧтш Ӧнисифорлӧн гортсалы.

²⁰ Ераст кольччис Коринфӧ, Трӧпимӧс ме кольӧді Милитӧ, висьмис да.

²¹ Вермӧдчы локны тӧлӧдзыс. Тэныд ыстӧны чолӧм Еввул, Пуд, Лин, Клавдия да став вокъяс.

²² Господь Исус Кристос тэкӧд. Енлӧн буралӧмыс тіянкӧд. Аминь.