2 Тимофейлы 1 - Коми Библия 2023

¹ Гижӧ Павел, Ен кӧсйӧм серти Исус Кристослӧн апостол. Менӧ мӧдӧдӧма висьтавны кӧсйысьӧм пыр сетӧм олӧм йылысь. Тайӧ олӧмыс Исус Кристос пытшкын.

² Бурсетӧм, буралӧм да лӧнь олӧм тэныд, муса Тимофей пиӧй, Ен Батьсянь да миян Господь Исус Кристоссянь.

Павел ышӧдӧ Тимофейӧс

³ Аттьӧала Енсӧ, кодлы ме кесъяла батьясным моз сӧстӧм сьӧлӧмӧн. Лун и вой кевмысигам ме век казьтывла тэнӧ.

⁴ Тэнад синваыд оз вунлы менам. Ме ёна кӧсъя аддзӧдчывны тэкӧд, медым тырны нимкодьлунӧн.

⁵ Казьтывла тэнсьыд сьӧлӧмсянь эскӧмтӧ. Тадзи эскылісны тэнад Лоида пӧчыд да Евника мамыд. Тӧда, тэ тшӧтш на моз эскан.

⁶ Та вӧсна казьтышта тэныд: эн кусӧд Енсянь сетӧмторлысь бисӧ. Тайӧ сетӧмторсӧ тэ сибӧдін менам ки пуктылӧм пыр.

⁷ Енмыс ӧд сетіс миянлы эз полӧмыслысь лов, а выныслысь, муслуныслысь да бур мывкыдыслысь лов.

⁸ Сідзкӧ, эн яндысь висьтавлыны Господьным йылысь. Эн яндысь и меысь, Кристос вӧсна дзескыдінӧ йӧртӧмаысь. Мӧдарӧ, Ен вынӧн тэ тшӧтш ну Бур Юӧр вӧсна сьӧкыдсӧ.

⁹ Енмыс мездіс миянӧс да корис вежа олӧмас эз миян уджъясным вӧсна. Сійӧ сетіс миянлы Ассьыс буралӧмсӧ олӧм пуксьытӧдзыс на Исус Кристос пытшкын.

¹⁰ А ӧні миян Мездысь Исус Кристослӧн локтӧмыс восьтіс Енлысь буралӧмсӧ. Кристос бырӧдіс кулӧмсӧ да Бур Юӧр пыр восьтіс олӧмсӧ да бырлытӧмсӧ.

¹¹ Та вылӧ менӧ и пуктӧма, медым висьтавлыны Бур Юӧрсӧ, апостолавны да велӧдны мукӧд войтырӧс.

¹² Дзик та вӧсна ме ӧні сьӧкыдсӧ и нуа да ог яндысь таысь, ӧд ме тӧда, кодлы ме эска. Тӧда, Сійӧ вына видзны меным сетӧмасӧ Аслас локтан лунӧдз.

¹³ Кутчысь месянь кывлӧм веськыд велӧдӧмас, ов Исус Кристоссянь босьтӧм эскӧмнад да муслуннад.

¹⁴ Видз тэныд сетӧм бурсӧ Вежа Лов отсӧгӧн, коді олӧ сьӧлӧманым.

¹⁵ Тэ тӧдан, Асияын ставныс эновтісны менӧ, весиг Фигел Ермогенкӧд.

¹⁶ Господь мед лоас бур сьӧлӧма Ӧнисифорлӧн гортса дінӧ, ӧд сійӧ унаысь ышӧдліс менӧ да эз яндысьлы менам пукалӧмысь.

¹⁷ Римӧ волігас сійӧ быдлаысь корсис менӧ да аддзис.

¹⁸ Мед Господь лоас бур сьӧлӧма сы дінӧ Аслас локтан лунӧ. Мыйтӧм сійӧ отсасис меным Ефесын, тэ бурджыка тӧдан.