2 Петыр 1 - Коми Библия 2023

¹ Гижӧ Симон-Петыр, Исус Кристослӧн кесйӧг да апостол. Чолӧмала тіянӧс, миян моз сьӧлӧманыд эскӧмсӧ босьтысьясӧс. Тайӧ донаторсӧ ми босьтім миян Енлӧн да Мездысь Исус Кристослӧн веськыдлун вӧсна.

² Буралӧмыс да лӧньлуныс мед содас тіянлы Енмӧс да Исус Кристос Господьнымӧс тӧдмалігӧн.

Тіянӧс корӧма-бӧрйӧма

³ Ми тӧдмалім Сійӧс, коді корис миянӧс Аслас дзирдлунӧ да тыр-бурӧ. Сылӧн Ен вынсянь сетӧма миянлы став коланасӧ, медым ми олім вежавидзӧмӧн.

⁴ Миянлы сетӧма зэв дона да ыджыд кӧсйысьӧмъяс, медым на отсӧгӧн тіян пытшкын вӧлі енмалуныс, и ті верминныд ылыстчыны мувывса пежалана ыштӧмъясысь.

⁵ Та могысь зільӧй петкӧдлыны эскӧманыд бур вӧчӧм, бур вӧчӧманыд – тӧдӧмлун,

⁶ тӧдӧмлунаныд – асьтӧ кутӧм, асьтӧ кутӧманыд – зумыдлун, зумыдлунаныд – вежавидзӧм,

⁷ вежавидзӧманыд – воктӧ радейтӧм, воктӧ радейтӧманыд – муслун.

⁸ Тайӧ кӧ тіян эм да содӧ, сідзкӧ, Исус Кристос Господьнымӧс тіян тӧдмалӧмныд оз ло весьшӧрӧ и ті онӧ кольӧй вотӧстӧг.

⁹ Кодлӧн тайӧ абу, сійӧ синтӧм, нинӧм оз аддзы, сійӧ вунӧдӧма, мый сійӧс мыськалӧма важ мыжъяссьыс.

¹⁰ Вокъяс, тіянӧс корӧма-бӧрйӧма, сідзкӧ, тӧждысьӧй, мед тайӧ лунысь-лун зумыдмас тіян пытшкын. Тадзи вӧчиганыд некор онӧ крукасьӧй.

¹¹ Сэки ті восьса ӧдзӧсӧд верманныд пырны миян Мездысь Господь Исус Кристослӧн помтӧм Юраланінӧ.

¹² Та вӧсна ме быдпӧрйӧ кута казьтывны тіянлы та йылысь, кӧть эськӧ ті тӧданныд да зумыда сулаланныд тіянлы висьталӧм збыляс.

¹³ Тайӧ вир-яй чомъяс олігӧн ме лыддя коланаӧн садьмӧдны тіянӧс аслам казьтылӧмъясӧн.

¹⁴ Тӧда, меным регыд ковмас кольны ассьым чомйӧс. Тайӧс восьтіс меным Исус Кристос Господьным.

¹⁵ Кута тӧждысьны, медым менам мунӧм бӧрын ставсӧ тайӧс ті век кутінныд тӧд выланыд.

Исус Кристос йылысь пророкалӧмыс збыль

¹⁶ Ми висьталім тіянлы миян Господь Исус Кристослӧн выныс да локтӧмыс йылысь. Тайӧ абу кутшӧмкӧ лӧсьӧдӧм мойд, ми ӧд асланым синмӧн аддзылім Сылысь ыджыд вынсӧ.

¹⁷ Ен Батьыс сетіс Сылы нимӧдӧмсӧ да дзирдлунсӧ, кор Вылысса дзирдлунсяньыс кыліс гӧлӧс шы: «Тайӧ Менам муса Пиӧй, Ме нимкодяся Сыӧн».

¹⁸ Тайӧ шуӧмсӧ ми кылім енэжсянь, кор вӧлім Исускӧд вежа керӧсын.

¹⁹ Нӧшта на, миян эм пророкъяслӧн веськыд кыв. Ті бура вӧчанныд, кутчысянныд кӧ тайӧ кывъяс пемыдын ӧзйысь биӧ моз, кытчӧдз оз во лунъюгыдыс да оз мыччысь асъя кодзулыс тіян сьӧлӧмын.

²⁰ Тӧдӧй, мый пророк гижӧдсӧ мортыс ачыс оз вермы гӧгӧрвоӧдны.

²¹ Ӧд пророкалӧм некор эз вӧв мортлӧн кӧсйӧмсянь, сійӧс висьтавлісны Вежа Лов ышӧдӧмсянь Енлӧн вежа йӧзыс.