2 Коринфӧ 9 - Коми Библия 2023

Енмыслы муса долыда сетысь

¹ Чайта, меным оз ков гижны тіянлы, мед отсасинныд вежа войтырлы.

² Ме тӧда тіянлысь зільӧмнытӧ. Македонияса водзын ме ошйыси, мый ті, акайяса, дасьӧсь сетны отсӧг кольӧм восянь нин. Тіян сьӧлӧмсянь тӧждысьӧмныд унаӧс ышӧдіс та вылӧ.

³ Ме мӧдӧда тіян дінӧ вокъясӧс, медым тіянӧн ошйысьӧмӧй эз ло весьшӧрӧ. Ме тіянлы шулі нин: лоӧй дасьӧсь.

⁴ Локтасны кӧ мекӧд тшӧтш Македонияысь эскысьяс, а ті кӧ онӧ лоӧй дасьӧсь, миянлы юръяндзим лоӧ, и тіянлы тшӧтш яндзим лоӧ. Ми ӧд ёна ошйысим тіянӧн.

⁵ Та вӧсна лыдди коланаӧн водзвыв мӧдӧдны тіян дінӧ вокъясӧс, медым чукӧртны кӧсйысьӧм сетӧмторнытӧ. Сэки тайӧ лоӧ ас кадӧ дасьтӧм да сьӧлӧмсянь сетӧмтор, а оз мырдӧн перйӧмтор.

⁶ Тӧдӧй: коді этша кӧдзӧ – этша вундас, коді уна кӧдзӧ – уна вундас.

⁷ Быдӧн сетӧй сьӧлӧм тшӧктӧм сертиныд: энӧ мырдӧн, энӧ шогпырысь, ӧд долыда сетысь муса Енмыслы.

⁸ Енмыс вына озырмӧдны тіянӧс быдпӧлӧс сетӧмторнас, медым быд кадӧ да быдторйын тіян вӧлі став коланаыс, да нӧшта на верминныд вӧчны быдпӧлӧс бур уджсӧ.

⁹ Гижӧдыс висьталӧ: – Сійӧ лышкыда разӧдӧ, сеталӧ гӧльяслы, Сылӧн веськыда вӧчӧмыс кутас овны нэмъяс чӧж.

¹⁰ Кӧдзысьлы кӧйдыссӧ Сетысьыс да няньӧн Пӧткӧдысьыс сетӧ кӧйдыссӧ тшӧтш тіянлы. Сійӧ быдтӧ тіянлысь пуктастӧ да уна пӧв содтӧ тіян веськыда олӧмлысь вотӧссӧ,

¹¹ медым ті вӧлінныд озырӧсь быдторнас да верминныд лышкыда юксьыны быдӧнкӧд. Сэки йӧзыс кутасны аттьӧавны Енсӧ миян отсӧгысь.

¹² Ми отсалам вежа войтырлы огӧ сӧмын налӧн гӧльлун вӧсна, ми отсалам, медым унаӧн аттьӧалісны Енсӧ.

¹³ Тіянлысь бур вӧчӧмнытӧ аддзигӧн вежа войтыр кутас ошкыны Енсӧ, ӧд ті кывзысьӧмӧн оланныд Кристослӧн Евангелльӧ серти, мый йылысь восьсӧн висьтавланныд. Найӧ ошкӧны Енсӧ, ӧд ті лышкыда юксянныд накӧд, тшӧтш мукӧдыскӧд.

¹⁴ Найӧ кевмысьӧны тіян вӧсна да ёна кӧсйӧны аддзысьлыны тіянкӧд, ӧд тіян пытшкын сы ыджда Енлӧн буралӧмыс.

¹⁵ Ошкӧм Енлы шуны вермытӧм сетӧмторсьыс!