2 Коринфӧ 8 - Коми Библия 2023

Ерусалимса эскысьяслы отсӧг

¹ Вокъяс, ми кӧсъям, мед ті тӧдінныд Енлысь ыджыд буралӧмсӧ македонияса вичкояс дінӧ.

² Налы ёна сьӧкыд, но та вылӧ видзӧдтӧг найӧ ёна нимкодясьӧны. Найӧ вывті гӧльӧсь, но та дырйи найӧ зэв лышкыдӧсь.

³ Ме тӧда, мый найӧ сетӧны мыйтӧм вермӧны, весиг верманасьыс унджык на.

⁴ Найӧ ёна корисны миянӧс босьтны насянь сетӧмторсӧ, медым отсавны вежа войтырлы.

⁵ Найӧ сетісны ёна унджык миян виччысьӧм дорысь. Ен кӧсйӧм серти найӧ сиисны асьнысӧ медводз Господьлы, сэсся миянлы.

⁶ Та вӧсна ми корим Титӧс водзӧ вӧчны тайӧ бур уджсӧ тіян пӧвстын да вайӧдны сійӧс помӧдз.

⁷ Ті озырӧсь быдторнас: эскӧмӧн, сёрнитны кужӧмӧн, тӧдӧмлунӧн, зільӧмӧн, миян дінӧ муслунӧн. Сідзкӧ, лоӧй лышкыдӧсь тшӧтш отсӧг сетігӧн.

⁸ Тайӧ абу тшӧктӧм. Ме сӧмын висьтала тіянлы мукӧдыслӧн зільӧм йылысь, медым тӧдмавны, сьӧлӧмсянь-ӧ ті радейтанныд йӧзсӧ.

⁹ Ті тӧданныд миян Господь Исус Кристослысь буралӧмсӧ. Сійӧ вӧлі озыр, но гӧльмис тіян вӧсна, медым Аслас гӧльлунӧн озырмӧдны тіянӧс.

¹⁰ Ме туйдӧда тіянӧс, ӧд тайӧ тіянлы бур вылӧ. Ті кольӧм воӧ нин кутінныд вӧчны тайӧ уджсӧ, и вӧчинныд сійӧс окотапырысь.

¹¹ Ті ёна кӧсйинныд вӧчны тайӧ уджсӧ, сідзкӧ, вӧчӧй сійӧс позянлун сертиныд да вайӧдӧй сійӧс помӧдзыс!

¹² Мортыс кӧ сетӧ сьӧлӧмсяньыс, сылысь сетӧмторсӧ донъялӧны эмлуныс серти, а оз абутӧмлуныс серти.

¹³ Ме ог кӧсйы сьӧктӧдны тіянӧс, медым мукӧдыслы вӧлі кокньыдджык, но кӧсъя, медым быдӧнлы вӧлі ӧтмоза.

¹⁴ Ӧні тіян озырлунныд вевттяс налысь тырмытӧмсӧ, а мӧдысь налӧн озырлунныс вевттяс тіянлысь тырмытӧмсӧ. Тадзи быдӧнлы лоӧ ӧтмоза.

¹⁵ Гижӧдыс висьталӧ: Уна чукӧртысьлӧн эз вӧв вывтіыс, этша чукӧртысьлӧн эз вӧв тырмытӧмыс.

Тит да сылӧн отсасьысьяс

¹⁶ Ошкӧм Енлы! Сійӧ пуктӧма Тит сьӧлӧмӧ тіян вӧсна ме кодь жӧ тӧждысьӧм.

¹⁷ Тит мунӧ тіян дінӧ оз сӧмын менам корӧм вӧсна. Сійӧ ёна тӧждысьӧ тіян вӧсна, та понда сійӧ мунӧ ас кӧсйӧм сертиыс.

¹⁸ Сыкӧд ми мӧдӧдам нӧшта ӧти вокӧс. Быд вичко ёна ошкӧ сійӧс Бур Юӧр висьтавлӧмысь.

¹⁹ Вичкояс бӧрйисны тайӧ воксӧ ветлыны миянкӧд, медым чукӧртны сетӧмтор. Тайӧ уджсӧ ми вӧчам Господьӧс ошкӧм могысь. Тайӧн петкӧдлам, мый ми дасьӧсь тіян моз тшӧтш отсасьны.

²⁰ Ми огӧ кӧсйӧй, медым тайӧ уна сетӧмторсӧ чукӧртігӧн кодкӧ шуасис миян вылӧ.

²¹ Ми ставсӧ зілям вӧчны веськыда огӧ сӧмын Господь водзын, тшӧтш йӧзыс водзын.

²² Тит да тайӧ вокыскӧд ми мӧдӧдам нӧшта ӧтиӧс. Ассьыс зільӧмсӧ сійӧ петкӧдліс унаысь да унаторйын. Сійӧ кутӧ тіян вылӧ ыджыд лача, та вӧсна ӧні ёнджыка на зільӧ отсасьны тіянлы.

²³ Шуны кӧ Тит йылысь, сійӧ – менам уджъёрт, сыкӧд ӧтвыв ми кесъялам тіянлы. Мукӧд вокъяссӧ мӧдӧдісны вичкояс, и налӧн олӧмыс нимӧдӧ Кристосӧс.

²⁴ Сідзкӧ, петкӧдлӧй на дінӧ ассьыныд муслунтӧ, сэки быд вичко аддзас, мый ми ошйысям тіянӧн огӧ весьшӧрӧ.