2 Коринфӧ 7 - Коми Библия 2023

¹ Мусаяс, со мыйта кӧсйысьӧм Енмыс сетӧма миянлы! Сідзкӧ, весалам ассьыным вир-яйнымӧс да ловнымӧс став пежсьыс. Кутам овны Енсьыс полӧмӧн, Сылӧн вежалуныс мед тырвыйӧ лоӧ миян пытшкын!

Павел нимкодясьӧ

² Восьтӧй миянлы сьӧлӧмнытӧ, ӧд ми некодӧс эгӧ дӧзмӧдӧй, некодлы лёксӧ эгӧ вӧчӧй, некод помысь эгӧ озырмӧдчӧй.

³ Тайӧс висьтала ог тіянӧс мыждӧм могысь. Водзынджык ме шулі нин тіянлы, мый ті миян сьӧлӧмынӧсь, ми дасьӧсь овны и кувны тіянкӧд ӧтвылысь.

⁴ Ме ёна эска тіянлы да ошйыся тіянӧн. Шогъяс вылӧ видзӧдтӧг ме ёна нимкодяся, ӧд ті ёна бурӧданныд менӧ.

⁵ Македонияӧ воӧм бӧрын миян эз вӧв некутшӧм шойччӧг. Миянлы быд боксянь вӧлі сьӧкыд: ортсысянь – усьласисны, а пытшкӧсаным вӧлі полӧм.

⁶ Но Енмыс, ловнас усьӧмаясӧс Ышӧдысь, ышӧдіс миянӧс Тит воӧмӧн,

⁷ и эз сӧмын тайӧн. Миян ловным кыпаліс тшӧтш сыысь, мый ті ышӧдӧмныд Титӧс. Сійӧ висьталіс миянлы, ті пӧ ёна гажтӧмтчанныд меысь, ёна шогсянныд да доръянныд менӧ. Таысь меным нӧшта на нимкодь лои.

⁸ Дерт, менам сьӧлӧмӧй нормыліс, мый аслам гижӧдӧн шогӧ уськӧді тіянӧс. Но ӧні ог нин шогсьы, ӧд ме аддза, мый гижӧдыс шогӧдліс тіянӧс сӧмын кад кежлӧ.

⁹ Ме нимкодяся ог тіян шогӧ усьлӧм понда, а нимкодяся сы понда, мый тіян шогсьӧмныд бергӧдіс тіянӧс мыжъяссьыныд. Тайӧ шогсьӧмыс вӧлі Ен кӧсйӧм серти, сідзкӧ, нинӧм лёксӧ ми эгӧ вӧчӧй тіянлы.

¹⁰ Ӧд Ен кӧсйӧм серти шогсьӧмыд бергӧдӧ мыжъясысь, а тасянь воӧ мездмӧм. Сідзкӧ, та йылысь жалитны оз ков! А мувывса шогъясыд вайӧдӧны кулӧмӧдз.

¹¹ Видзӧдлӧй, мый вайис тіянлы Ен кӧсйӧм серти шогсьӧмныд: кутшӧма ті зілянныд петкӧдлыны ассьыныд мыжтӧмлуннытӧ, дӧзманныд лёк вӧчысь вылӧ да лёк вӧчӧмсӧ мустӧмтанныд. Кутшӧма ті гажтӧмтчанныд миянысь, ловнаныд ыпъяланныд да кӧсъянныд мыжаӧс веськыда мыждыны. Ті быд боксянь петкӧдлінныд ассьыныд сӧстӧмлуннытӧ.

¹² Ме гижи тіянлы эг сы вӧсна, коді вӧчис лёксӧ либӧ кодлы вӧчисны лёксӧ, а гижи тіянлы, медым ті гӧгӧрвоинныд Ен водзын, кутшӧма ми тӧждысям тіян вӧсна.

¹³ Сідзкӧ, тіян долыдлунныд долыдмӧдіс и миянӧс. Но нӧшта на долыд лоис Титлӧн нимкодясьӧмысь, ӧд сылӧн сьӧлӧмыс оз нин майшась тіян вӧсна.

¹⁴ Ме ошйысьлі Тит водзын тіянӧн, да меным абу яндзим таысь. Ми ставсӧ висьтавлім тіянлы веськыда, и Тит водзын миян ошйысьӧмным тшӧтш вӧлі веськыд.

¹⁵ Ӧні, тіянӧс казьтылігӧн, сылӧн сьӧлӧмас ёнджыка на содӧ тіян дінӧ муслуныс, ӧд ті ёна кывзысьӧмныд сылысь, полӧмӧн да пыдди пуктӧмӧн сибӧдӧмныд сійӧс.

¹⁶ Меным нимкодь, мый быдторйын верма тіян вылӧ лача кутны.