2 Коринфӧ 6 - Коми Библия 2023

¹ Ми, Енкӧд ӧтвыв уджалысьяс, корам тіянӧс: сибӧдӧй Енлысь буралӧмсӧ, мед сійӧ эз ло весьшӧрӧ.

² Енмыс ӧд тадзи висьталӧ: – Ме кылі тэнӧ бур кадӧ, отсалі тэныд мездман лунӧ. Со ӧні бур кадыс, со ӧні мездман луныс.

Павеллӧн сьӧкыдлунъяс

³ Ми некодлы огӧ сетӧй помка шуасьны миян вылӧ, медым эз ло лёкӧдӧма кесъялӧмнымӧс.

⁴ Мӧдарӧ, ми быдторйын петкӧдлам асьнымӧс Енлӧн кесъялысьясӧн: ми нуам сьӧкыдсӧ, шогсӧ, дзескӧдӧмсӧ. Ми зумыдӧсь,

⁵ кор миянӧс нӧйтӧны, пуксьӧдӧны дзескыдінӧ, вӧтлӧны, кор ми уджалам ныр вылӧ усьтӧдз, видзалам, коллялам узьтӧм войяс.

⁶ Ми олам сӧстӧма. Миян эм тӧдӧмлун, терпитӧм, бурлун. Миянӧн веськӧдлӧ Вежа Лов да сьӧлӧмсянь муслун.

⁷ Ми висьталам збыльсӧ, ставсӧ вӧчам Ен вынӧн. Миян вермасянторным – веськыдлун. Сійӧн вермасям и водзсасям.

⁸ Ми дасьӧсь сибӧдны ошкӧмсӧ и янӧдӧмсӧ, нимӧдӧмсӧ и лёкӧдӧмсӧ. Миянӧс лыддьӧны пӧръясьысьясӧн, но ми веськыда сёрнитам.

⁹ Ми огӧ нималӧй, но миянӧс ставныс тӧдӧны. Миянӧс лыддьӧны кулӧмаясӧн, но ми ловъяӧсь. Миянӧс нӧйтӧны, но огӧ кулӧй.

¹⁰ Миянӧс шогӧ вӧйтӧны, а ми пыр нимкодясям. Ми гӧльӧсь, но унаӧс озырмӧдам. Миян нинӧм абу, но ставыс эм.

¹¹ Коринфсаяс, ми сёрнитам тіянкӧд веськыда, миян сьӧлӧмным восьса тіянлы.

¹² Ми восьтім тіянлы сьӧлӧмнымӧс, но тіян сьӧлӧмныд тупкыса миянлы.

¹³ Ме шуа тіянлы аслам ныв-пилы моз: воча восьтӧй сьӧлӧмнытӧ миянлы.

Ми – Енлӧн крамыс

¹⁴ Энӧ сюйӧй юрнытӧ ӧти сийӧс улӧ эскытӧмъяскӧд. Вермас ӧмӧй йитны мыйкӧ веськыдлунсӧ лёкыскӧд? Эм-ӧ ӧткодьлуныс югыдыслӧн пемыдыскӧд?

¹⁵ Вермас ӧмӧй воны ӧти кывйӧ Кристос Велиаркӧд? Мый вермас йитны эскысьӧс эскытӧмкӧд?

¹⁶ Вермасны ӧмӧй сулавны идолъяс Енлӧн крамын? Ӧд ті – ловъя Енлӧн крамыс. Енмыс шуӧ: – Овмӧдча на пытшкӧ да понда ветлыны накӧд. Ме лоа налӧн Енмӧн, а найӧ – Менам войтырӧн.

¹⁷ Сідзкӧ: – Петӧй на пӧвстысь да ылыстчӧй наысь, – висьталӧ Господь. – Энӧ инмӧдчӧй пежас, сэки Ме сибӧда тіянӧс.

¹⁸ Ме лоа тіянлы Батьӧн, а ті – Меным ныв-пиӧн, – висьталӧ Господь, Ставсӧвермысь.