2 Коринфӧ 3 - Коми Библия 2023

Важ да Выль Йитӧд

¹ Гашкӧ, миянлы выльысь висьтавны ас йывсьыным? Гашкӧ, мукӧдыслы моз миянлы тшӧтш колӧ вайны тіянлы эскӧдан гижӧдсӧ? Гашкӧ, асьныд сійӧс сетанныд?

² Миян эскӧдан гижӧдыс – ті. Тайӧ гижӧдсӧ гижӧма миян сьӧлӧмӧ, сійӧс тӧдӧны да лыддьӧны став йӧзыс.

³ Быдӧнлы тыдалана, мый ті – Кристослӧн гижӧдыс. Сійӧс гижӧма Ен Лолӧн, абу чернилаӧн, гижӧма морт сьӧлӧмӧ, абу шыльӧдӧм из вылӧ. Татшӧм гижӧднас ті лоинныд миян кесъялӧм пыр.

⁴ Татшӧм зумыд лача ми кутам Ен вылӧ Кристос пыр.

⁵ Ми лыддям, мый асьным ми нинӧм вылӧ огӧ туйӧй, нинӧм огӧ сяммӧй вӧчнысӧ, но Енмыс сетӧ миянлы сямлунсӧ.

⁶ Сійӧ сетіс миянлы сямлун кесъявны Выль Йитӧдлы, мыйӧн веськӧдлӧ Лов, а оз шыпаса Индӧд. Ӧд шыпаса Индӧдыс вайӧ кулӧм, а Лолыс сетӧ олӧм.

⁷ Индӧдсӧ вӧлі гижӧма шыльӧдӧм из вылӧ. Тайӧ Индӧдсӧ Мӧисейлы сетігӧн Енмыслӧн дзирдлуныс сэтшӧма югдӧдіс Мӧисейлысь чужӧмсӧ, мый Израиль войтыр весиг эз вермы видзӧдны сы вылӧ. Но тайӧ дзирдлуныс вӧлі сӧмын регыдъя. Сідзкӧ, кулӧмӧ вайӧдысь Индӧдлы кесъялӧмыс кӧ вӧлі сэтшӧм дзирдалана,

⁸ сэки кымын пӧв дзирдаланаджык Ловлы кесъялӧмыс?

⁹ Мыждана Индӧдлы кесъялӧмыс кӧ вӧлі дзирдалана, сэки кымын пӧв дзирдаланаджык веськыдлуныслы кесъялӧмыс.

¹⁰ Та вӧсна ӧнія дзирдлуныс вевттьӧ воддзасӧ.

¹¹ Сідзкӧ, воддзаыс, быранаыс кӧ вӧлі сэтшӧм дзирдалана, сэки кымын пӧв дзирдаланаджык ӧніяыс, бырлытӧмыс!

¹² Та вылӧ лача кутӧмӧн ми сёрнитам повтӧг.

¹³ Ми огӧ вӧчӧй Мӧисей моз, коді тупкыліс ассьыс чужӧмсӧ вевттьӧдӧн, медым Израиль войтыр эз аддзы дзирдлуныслысь бырӧмсӧ.

¹⁴ Налӧн пемдӧма вежӧрныс. Важ Йитӧд йылысь Гижӧдсӧ лыддигӧн на вылын ӧнӧдз куйлӧ тайӧ вевттьӧдыс, ӧд сійӧс вештӧ сӧмын Кристос.

¹⁵ Мӧисейлысь Индӧдсӧ лыддигӧн вевттьӧдыс ӧнӧдз на куйлӧ сьӧлӧм выланыс.

¹⁶ Но мортыс кӧ бергӧдчӧ Господь дінӧ, сэки вевттьӧдыс босьтсьӧ.

¹⁷ Господь эм Лов. Кӧні Господьлӧн Лолыс, сэні мездлун.

¹⁸ Ми ставным чужӧмнымӧс вевттьытӧг видзӧдам Господьлӧн дзирдлун вылӧ да рӧмпӧштанысь моз аддзам Сылысь дзирдлунсӧ. Сы вылӧ видзӧдӧмӧн ми лунысь-лун вежсям да кутам дзирдавны Сы моз жӧ. Татшӧмнас вӧчӧ миянӧс Господьлӧн Лолыс.