2 Коринфӧ 1 - Коми Библия 2023

¹ Гижӧ Павел, Ен кӧсйӧм серти Исус Кристослӧн апостол. Тимофей воккӧд ми чолӧмалам тіянӧс, коринфса вичкоӧс, да Акайя пасьтала став вежа войтырӧс.

² Буралӧм да лӧнь олӧм тіянлы Ен Батьнымсянь да Господь Исус Кристоссянь.

Енмыс – миянӧс бурӧдысь

³ Ошкӧм Енлы, миян Господь Исус Кристослӧн Батьлы. Сійӧ – бур сьӧлӧма Бать да быдторйын бурӧдысь Ен!

⁴ Сійӧ бурӧдӧ миянӧс быд шог дырйи, медым ми тшӧтш вермим бурӧдны шогӧ усьӧмаясӧс Енсянь бурӧдӧмӧн.

⁵ Ми уна нуам Кристослысь сьӧкыдсӧ, но та дырйи ми уна и босьтам Кристоссянь бурӧдӧмсӧ.

⁶ Ми кӧ сьӧкыдалам – тіянӧс бурӧдӧм да мездмӧм вылӧ. А мездмӧмныд лоӧ тырвыйӧ сэки, кор миян моз венанныд сьӧкыдлунсӧ.

⁷ Та вӧсна ми кутам тіян вылӧ зумыд лача. Енмыс кӧ бурӧдӧ миянӧс – тіянлы тшӧтш вичмӧ бурӧдӧмыс да мездмӧмыс. Ми тӧдам, ті кӧ миян моз нуанныд сьӧкыдсӧ, сідзкӧ, миянлы моз тіянлы тшӧтш вичмас бурӧдӧмыс.

⁸ Вокъяс, ми кӧсъям, мед ті тӧдінныд, кутшӧм сьӧкыдлунъяс суисны миянӧс Асияын. Миянлы вӧлі сэтшӧм сьӧкыд, эгӧ чайтӧй весиг ловйӧн кольны.

⁹ Асьнымӧс лыддим нин кулӧмаясӧн, эз вӧв некутшӧм лача ас выланым, сӧмын Ен вылӧ, кулӧмаясӧс Ловзьӧдысь вылӧ.

^10-11 Сійӧ видзис миянӧс кулӧмысь да водзӧ на видзас. Ті кӧ отсаланныд миянлы кевмысьӧмнаныд, ми лача кутам, мый Енмыс нӧшта на видзас. Сэки унаӧн кутасны ошкыны Енсӧ миян дінӧ Сылӧн буралӧмысь.

Павеллӧн тӧждысьӧм

¹² Ми ошйысям, мый тайӧ муюгыдас олысьяскӧд, торйӧн нин тіянкӧд, вӧлім восьсаӧсь да веськыдӧсь, олім Енлысь кывзысьӧмӧн. Та вӧсна миян сьӧлӧмным оз мыжды миянӧс. Ми ӧд эгӧ асланым мывкыд серти олӧй, миянӧн веськӧдліс Енлӧн буралӧмыс.

¹³ Ми гижам тіянлы сӧмын сійӧ, мый лыддянныд да гӧгӧрвоанныд. Лача кута, мый ті понданныд тырвыйӧ гӧгӧрвоны миянӧс.

¹⁴ Дерт, ті мыйтакӧ ӧні гӧгӧрвоанныд нин миянӧс. Сідзкӧ, миян Господь Исус Кристослӧн лунӧ ми вермам ӧтмоза ошйысьны ӧта-мӧдӧн.

¹⁵ Татчӧ зумыда эскӧмӧн ме водзынджык нин кӧсйи волыны тіян дінӧ, медым Енлӧн буралӧмыс кыкысь вичмис тіянлы.

¹⁶ Ме ӧд кӧсйи кежавны тіян дінӧ Македонияӧ мунігӧн да нӧшта бӧрсӧ локтігӧн. Сэсся ті эськӧ водзӧ мӧдӧдінныд менӧ Иудеяӧ.

¹⁷ Гашкӧ, тадзи мӧвпалігӧн ме кокньыд мывкыда вӧлі? Гашкӧ, чайтанныд, тайӧ кӧсйӧмыс менам ассянь вӧлі? Гашкӧ, менам ӧтпырйӧ артмӧ ”сідз” и ”абу сідз”?

¹⁸ Ен тӧдӧ, мый тайӧ збыль: ме некор эг шулы ӧтпырйӧ ”сідз” и ”абу сідз”.

¹⁹ Силуанкӧд да Тимофейкӧд ми висьтавлім тіянлы Ен Пи йылысь – Исус Кристос йылысь. Сійӧ некор эз шулы ӧтпырйӧ ”сідз” и ”абу сідз”. Сы пытшкын ставыс вӧлі ”сідз”.

²⁰ Енлӧн став кӧсйысьӧмыс збыльмис Исус Кристос пыр. Та вӧсна Енмӧс ошкӧмӧн ми шуам Сылы Исус Кристос пыр ”Аминь”.

²¹ Енмыс, коді топыда йитӧ миянӧс да тіянӧс Кристос пытшкын, мавтыштіс миянӧс:

²² Сійӧ пасйис миянӧс да мӧдӧдіс миян пытшкӧ Ассьыс Ловсӧ, коді эскӧдӧ миянӧс, мый Енлӧн став кӧсйысьӧмыс збыльмас.

²³ Ме висьтала Ен водзын, мый тіянӧс жалитӧм вӧсна ме ӧнӧдз эг волы Коринфӧ.

²⁴ Ми огӧ кӧсйӧй веськӧдлыны тіян эскӧмӧн, кӧсъям сӧмын отсавны тіянлы, медым ті верминныд нимкодясьны. Ми тӧдам, мый тіян эскӧмныд зумыд.