2 Каднебӧг 9 - Коми Библия 2023

Соломон да саваса ӧксы-ань

¹ Саваса ӧксы-ань кыліс Соломонлӧн нималӧмыс йылысь да муніс Ерусалимӧ, медым нӧдкывъясӧн тӧдмавны Соломонлысь мывкыдлунсӧ. Сыкӧд вӧлі зэв уна йӧз. Верблюдъяс вылын найӧ вайисны уна зарни, дона изъяс да чӧскыд ӧвтанторъяс. Ӧксы-ань аддзысис Соломонкӧд. Сійӧ сёрнитіс Соломонкӧд быдтор йылысь, мый кӧсйис тӧдны.

² Соломон вочавидзис ӧксы-аньлӧн став юалӧмыс вылӧ. Эз вӧв сэтшӧмтор, мый вылӧ эськӧ сійӧ эз вермы вочавидзны.

³ Саваса ӧксы-ань гӧгӧрвоис, мый Соломон зэв мывкыд морт. Сійӧ аддзыліс керкасӧ, мый Соломон лэптіс,

⁴ аддзыліс, кутшӧм озыр Соломонлӧн пызаныс, кыдзи кесъялӧны, олӧны да пасьтасьӧны сылӧн йӧзыс, кесйӧгъясыс да вина кисьталысьясыс. Аддзыліс тшӧтш пемӧсъясӧс, кодъясӧс Соломон вайис сотан вись пыдди Господьлӧн крамын. Ёна шензьӧмӧн ӧксы-ань

⁵ шуис Соломон ӧксылы: «Ставыс, мый ме кывлі ас муын тэнад уджъясыд да мывкыдлуныд йылысь, збыль.

⁶ Сэки ме эг эскы, а ӧні эска, ӧд аслам синмӧн ставсӧ аддзылі. Меным, вӧлӧмкӧ, сӧмын мыйтакӧ висьтавлӧмаӧсь тэнад ыджыд мывкыдлуныд йылысь. Тэнад ставыс ёна унджык на менам кывлӧм дорысь.

⁷ Шудаӧсь тэнад йӧзыд да тэнад кесйӧгъясыд, кодъяс век тэкӧд орччӧнӧсь да кылӧны тэнсьыд мывкыд сёрнитӧ.

⁸ Ошкӧм Господьлы, тэнад Енлы! Аслас кӧсйӧм серти Господь, тэнад Енмыд, пуксьӧдіс тэнӧ юралан пуклӧсӧ, пуктіс тэнӧ ӧксыавны Аслас нимсянь. Тэнад Енмыд радейтӧ Израиль войтырӧс, та вӧсна кӧсйӧ вынсьӧдны сійӧс пыр кежлӧ. Сійӧ пуктіс тэнӧ Израиль войтырлы ӧксыӧ, медым тэ юралін да мыждін веськыда».

⁹ Ӧксы-ань козьналіс Соломон ӧксылы сё кызь талант зарни, дона изъяс да унасьыс-уна чӧскыд ӧвтантор. Татшӧм ӧвтанторъясыс, мый саваса ӧксы-ань козьналіс Соломон ӧксылы, Израильын эз на вӧвлыны.

¹⁰ Хирамлӧн да Соломонлӧн кесйӧгъясыс, кодъяс вайлывлісны Офирысь зарни, вайисны тшӧтш гӧрд пу да дона изъяс.

¹¹ Гӧрд пуысь ӧксы тшӧктіс вӧчны Господьлӧн крамӧ да аслас ӧксы керкаӧ посъяс, сьылысьяслы гусли да арфа. Татшӧмторъяссӧ Иуда муын эз на аддзывны.

¹² Козинъяс кындзи Соломон ӧксы сетіс саваса ӧксы-аньлы ставсӧ, мый сійӧ корис да кӧсйис. Сэсся ӧксы-ань аслас йӧзкӧд бӧр муніс аслас муӧ.

Соломонлӧн озырлун

¹³ Быд во Соломонлы вайлісны квайтсё квайтымын квайт талант зарни.

¹⁴ Таысь ӧтдор вузасьысьяс мынтылісны сылы вот, а ӧксыув муясын юралысьяс да аравияса ӧксыяс вайлісны сылы эзысь-зарни.

¹⁵ Дорӧм зарниысь Соломон ӧксы вӧчӧдіс кыксё ыджыд сайӧд. Быд сайӧд вылӧ муніс квайтсё сикель зарни.

¹⁶ Нӧшта вӧчӧдіс куимсё ичӧтджык сайӧд, быд сайӧд вылӧ муніс куимсё сикель дорӧм зарни. Сайӧдъяссӧ ӧксы пуктіс ливанса пуысь вӧчӧм керкаӧ.

¹⁷ Слӧн лыысь ӧксы вӧчӧдіс ыджыд юралан пуклӧс, сійӧс эжисны весалӧм зарниӧн.

¹⁸ Юралан пуклӧс бердас йитісны квайт тшупӧда сод да зарниысь вӧчӧм кок пуктанін. Пуклӧс ӧтар-мӧдарладорас вӧчисны гырддзаув, а быд гырддзаув дорӧ вӧчисны левӧс.

¹⁹ Нӧшта вӧчисны дас кык левӧс, кодъяс сулалісны квайт тшупӧд вылын ӧтар-мӧдар бокас. Татшӧм пуклӧсыс эз вӧв сэсся некутшӧм муын.

²⁰ Соломон ӧксылӧн став юан дозйыс вӧлі зарниысь, а ливанса пуысь вӧчӧм керкаын став дозмук-кӧлуйыс вӧлі весалӧм зарниысь. Соломон веськӧдлан кадӧ эзысьсӧ эз вылӧ донъявны.

²¹ Соломон ӧксылӧн корабльяс вылын сылӧн йӧзыс Хирамлӧн йӧзкӧд кывтлісны Фарсисӧ. Куим во пытшкас ӧтчыдысь найӧ вайлісны сэтысь зарни-эзысь, слӧн лы, ӧблезянаясӧс да павлинъясӧс.

²² Мувывса став ӧксыыс дорысь Соломон вӧлі медся озыр да медся мывкыд.

²³ Мувывса став ӧксыыс зілисны аддзывны Соломонӧс да кывзыны сійӧс, ӧд сылӧн вӧлі Енсянь мывкыдлун.

²⁴ Соломон дінӧ волысьяс вайлісны аскӧдныс козинъяс: эзысь-зарниысь вӧчӧм дозмук-кӧлуй, паськӧм, шыпуртъяс, чӧскыд ӧвтанторъяс, вӧвъясӧс да мулъясӧс. Тадзи вӧлі быд во.

²⁵ Соломонлӧн вӧлі нёль сюрс лэбув, кӧні видзисны вӧвъясӧс да тарантасъяс. Сылӧн вӧлі дас кык сюрс верзьӧма, кодъясӧс сійӧ овмӧдіс тарантаса тышкайӧзлы торйӧдӧм каръясӧ да аслас Ерусалим карӧ.

²⁶ Ефрат юсянь Филистим муӧдз да Египетӧдз став ӧксыыс вӧліны Соломон кипод улынӧсь.

²⁷ Соломон ӧксы дырйи Ерусалимын [зарниыс да] эзысьыс вӧлі из мында, а сус пуыс вӧлі сы мында, мыйта вӧлі керӧсбердса муын быдмысь инжир пуыс.

²⁸ Вӧвъяссӧ Соломонлы вайлісны Египетысь да мукӧд муясысь.

Соломонлӧн кулӧм

²⁹ Соломон ӧксыалӧм дырйи мукӧд лоӧмторъяс йылысь водзысяньыс и помӧдзыс пасъялӧма Нафан пророклӧн гижӧдъясын, силомса Ахийлӧн пророкалан гижӧдъясын да Иддо нима тӧдысь-аддзысьлӧн восьтӧмъясын. Тайӧ восьтӧмъясыс вӧліны Неватлӧн Еровам пиыс йылысь.

³⁰ Нелямын во чӧж Соломон ӧксыаліс Ерусалим карын, веськӧдліс став Израиль войтырӧн.

³¹ Сэсся Соломон куліс да вуджис батьясыс дінӧ. Сійӧс дзебисны Давид батьыслӧн карӧ. Соломон бӧрти ӧксыӧ пуксис сылӧн Ровоам пиыс.