2 Каднебӧг 8 - Коми Библия 2023

Соломонлӧн уджъяс

¹ Кызь во чӧжӧн Соломон лэптіс Господьлы крам да аслыс керка.

² Соломон дзоньталіс-лэптіс тшӧтш каръяс, кодъясӧс сетіс сылы Хирам, да овмӧдіс сэтчӧ израильсаясӧс.

³ Соломон уськӧдчис Хамат-Сова кар вылӧ да босьтіс сійӧс.

⁴ Овтӧминын сійӧ лэптіс Тадмор кар. Нянь да эмбур видзӧм могысь Хаматын кыпӧдіс каръяс.

⁵ Нӧшта Соломон лэптіс Вылыс Бет-Хорон да Улыс Бет-Хорон изкаръяс, кыпӧдіс на гӧгӧр стенъяс, вӧчис дзиръяяс да тасъяс.

⁶ Сійӧ лэптіс Баалат кар. Нянь да эмбур, тарантасъяс да вӧвъяс видзӧм могысь кыпӧдіс аслыс каръяс. Ерусалимын, Ливанын да аслас киподувса муын сійӧ лэптіс ставсӧ, мый кӧсйис.

^7-8 Хеттейясысь, аморейясысь, перезейясысь, хивейясысь да евуссаясысь ловйӧн кольӧмаясӧс Соломон уджӧдіс. Тадзи найӧ талунӧдз мынтӧны сылы вот. Тайӧ йӧзыс эз вӧвны Израиль войтырысь, а чужисны Израиль муын мукӧд войтыръяссянь, кодъясӧс израильсаяс эз бырӧдны.

⁹ Израильсаясӧс Соломон эз пуктыв кесйӧгъясӧн. Ӧксылы найӧ кесъялісны веськӧдлысьясӧн да тышкайӧзӧн, веськӧдлісны тарантаса тышкайӧзӧн да верзьӧмаясӧн.

¹⁰ Соломон ӧксылӧн вӧлі кыксё ветымын морт, кодъяс юралісны-веськӧдлісны сылӧн войтырӧн.

¹¹ Фараонлысь нывсӧ Соломон вуджӧдіс Давид карысь сылы вӧчӧдӧм керкаӧ. Соломон шуис: «Менам гӧтырӧйлы оз позь овны израильса Давид ӧксы керкаын. Тайӧ керкаыс вежа, ӧд татчӧ коркӧ вайлісны Господьлысь Йитӧд кудсӧ».

¹² Господьлы сотан висьяс Соломон вайліс висьпуктанін вылын, кодӧс сійӧ вӧчис да сувтӧдіс крам посводзлы воча.

¹³ Мӧисейлӧн Индӧдын урчитӧм висьяс сійӧ вайліс шойччан лунӧ, выль тӧлысь чужигӧн да куимысь вонас гажӧдчан лунъяс дырйи: Шомтӧм нянь сёян лунъясӧ, Ветымынӧд лунся гаж дырйи да Чом вӧчан лунъясӧ.

¹⁴ Давид батьыслӧн тшӧктӧм серти Соломон индіс кесъявны поп котыръясӧс, индіс тшӧтш левитъясӧс быд лун кежлӧ вӧчны ассьыныс уджнысӧ – ошкыны Господьӧс да отсасьны попъяслы. Нӧшта Соломон сувтӧдаліс быд дзиръя дорӧ крам видзысьясӧс. Тадзи вӧчны тшӧктіс сылы Енлӧн морт Давид.

¹⁵ Ставсӧ вӧлі вӧчӧма сы серти, мый ӧксы тшӧктыліс попъяс да левитъяс йылысь, озырлун видзанінъяс да мукӧдторйыс йылысь.

¹⁶ Господьлӧн крамлы подув пуктӧмсянь да сійӧс лэптӧмӧдз вӧлі вӧчӧма-эштӧдӧма Соломонлысь став уджсӧ.

¹⁷ Сэсся Соломон муніс Эдом муӧ, Эцион-Гевер да саридздорса Элат каръясӧ.

¹⁸ Хирам мӧдӧдіс ассьыс йӧзсӧ, медым найӧ ваясны Соломонлы корабльяс да кесйӧгъясӧс, кодъяс бура кужӧны кывтны саридз вывті. Соломонлӧн кесйӧгъяскӧд найӧ кывтісны Офирӧ да вайисны сэтысь Соломон ӧксылы нёльсё ветымын талант зарни.