2 Каднебӧг 6 - Коми Библия 2023

¹ Сэки Соломон шуис: «Господь висьтавліс, мый Сійӧ лоӧ сьӧд кымӧрын.

² [Вежа Енмӧй,] Тэныд ме лэпті керка, медым Тэ олін сэні нэмъяс чӧж».

Соломон шыасьӧ войтырыс дінӧ

³ Соломон ӧксы бергӧдчис сы водзын сулалысь Израиль войтырлань да бурсиис найӧс.

⁴ Сійӧ шуис: «Ошкӧм Господьлы, Израильлӧн Енлы! Ӧні Господь збыльмӧдіс сійӧ, мый Аслас вомӧн кӧсйысьліс менам Давид батьлы. Господь шуліс:

⁵ ”Ассьым войтырӧс Египетысь петкӧдӧмсянь Израиль чужанкотыръяслы вичмӧдӧм муясын Ме эг бӧрйывлы некутшӧм кар, медым сэні лэптісны Меным керка. Эг бӧрйывлы некодӧс, медым пуктыны сійӧс Аслам Израиль войтырлы юралысьӧ.

⁶ А ӧні Ме бӧрйи Ерусалим кар, медым сэні вӧлі Менам нимӧй. Ме бӧрйи Давидӧс, медым сійӧ веськӧдліс Менам Израиль войтырӧн”.

⁷ Менам Давид батьӧй сьӧлӧмсяньыс кӧсйис лэптыны Господьлы, Израильлӧн Енлы, крам.

⁸ Но Господь шуис сылы: ”Зэв бур, мый тэ кӧсъян лэптыны крам, кӧні лоас Менам нимӧй.

⁹ Но он тэ лэпты, а тэсянь чужысь пиыд лэптас Меным крам”.

¹⁰ Господь збыльмӧдіс Ассьыс шуӧм кывсӧ. Ӧні ме пукала Давид батьлӧн юралан пуклӧсын да веськӧдла Израильӧн, кыдзи Господь и шуліс. Ме лэпті Израильлӧн Господь Енлы крам.

¹¹ Крамас ме пукті Господьлысь Йитӧд кудсӧ, кытчӧ пуктӧма йитӧдлысь изпӧвъяс. Тайӧ йитӧдсӧ Сійӧ кӧрталіс Израиль войтыркӧд».

Соломонлӧн кевмысьӧм

¹² Став Израиль войтыр водзын Соломон сувтіс Господьлӧн висьпуктанін водзӧ да лэптіс кисӧ.

¹³ Крам йӧр шӧрас Соломонлӧн тшӧктӧм серти вӧлі вӧчӧма ыргӧн содъя пос да пуктӧма крам йӧр шӧрас. Сылӧн кузьта-пасьтаыс вӧлі вит гырддза, а судтаыс вӧлі куим гырддза. Соломон кайис сэтчӧ да Израиль войтыр водзын сувтіс пидзӧс вылас. Кисӧ енэжлань кыпӧдӧмӧн

¹⁴ Соломон шуис: «Господьӧй, Израильлӧн Енмӧй! Тэ кодь мӧд енмыс абу енэжас ни му вылас! Тэ видзан кӧрталӧм йитӧдтӧ да буралӧмтӧ Аслад кесйӧгъясыд дінӧ, кодъяс став сьӧлӧмсяньыс олӧны Тэнад кӧсйӧм серти.

¹⁵ Тэ кутін Ассьыд кывтӧ, мый шулін Аслад Давид кесйӧглы, менам батьлы. Ӧні Тэ збыльмӧдін сійӧс, мый шулін Аслад вомӧн.

¹⁶ Господьӧй, Израильлӧн Енмӧй, збыльмӧд тшӧтш Ассьыд мӧд кӧсйысьӧмтӧ, мый Тэ шулін Аслад кесйӧглы, менам Давид батьлы. Тэ ӧд шулін сылы: ”Тэсянь чужысьяс кӧ тэ моз кутасны ветлыны веськыд туйӧд да овны Менам Индӧд серти, сэки на пӧвстысь пыр лоӧ ӧксы, коді кутас веськӧдлыны Израиль войтырӧн Ме водзын”.

¹⁷ Господьӧй, Израильлӧн Енмӧй, мед инас Тэнад кӧсйысьӧмыд, мый Тэ шулін Аслад Давид кесйӧглы.

¹⁸ Збыльысь, му вылын-ӧ Енмыслы овны йӧзыскӧд? Енэжыс да енэжвывса енэжъясыс кӧ оз вермыны тӧрӧдны Тэнӧ, дерт нин, тайӧ крамыс, кодӧс ме лэпті, оз вермы тӧрӧдны Тэнӧ.

¹⁹ Господьӧй Енмӧй, бергӧдчы Аслад кесйӧглань да кывзы сылысь корӧмсӧ! Кыв Аслад кесйӧглысь Тэ водзын кевмысьӧмсӧ!

²⁰ Тэнад синмыд мед лун и вой видзӧдас тайӧ крамыс вылӧ. Тэ ӧд шулін, мый Тэнад нимыд лоас сэні. Кыв Аслад кесйӧглысь тайӧ крамас кевмысьӧмсӧ.

²¹ Кыв Аслад кесйӧглысь да Аслад Израиль войтырлысь кевмӧмсӧ, кор найӧ шыасясны Тэ дінӧ тайӧ крамас. Кыв найӧс енэжсяньыд, Аслад оланінсянь. Кыв найӧс да прӧстит найӧс.

²² Мыжаласны кӧ кодӧскӧ мӧд мортлы паныд мыж вӧчӧмысь, и сылы ковмас локны тайӧ крамас да Тэнад висьпуктанін водзын кыв сетӧмӧн шуны, мый абу мыжа,

²³ сэки Тэ кыв енэжсяньыд да веськыда мыжды Ассьыд кесйӧгъястӧ: мыжаӧс мыжды, мед сылы юр вылас усьӧ аслас мыжыс, а мыжтӧмӧс дорйы да мынтысь сылы веськыдлуныс серти.

²⁴ Тэнад Израиль войтырыд кӧ Тэныд паныд мыж вӧчас да та вӧсна вӧрӧг пасьвартас найӧс, а сэсся кӧ найӧ шыасясны Тэ дінӧ, кутасны нимӧдны Тэнӧ да корны-кевмыны Тэ водзын тайӧ крамас,

²⁵ сэки Тэ кыв енэжсяньыд да прӧстит Израиль войтырыдлысь мыжсӧ. Бӧр бергӧд найӧс сійӧ муас, мый Тэ сетін налы да налӧн батьяслы.

²⁶ Израиль войтырлӧн Тэныд паныд мыж вӧчӧм вӧсна кӧ енэжыс оз сет зэрсӧ, но сэсся кӧ найӧ кевмысясны тайӧ крамас, нимӧдасны Тэнӧ да бергӧдчасны мыжсьыныс, мыйысь Тэ мыждін найӧс,

²⁷ сэки Тэ кыв найӧс енэжсяньыд да прӧстит Аслад кесйӧгъяслысь да Израиль войтырыдлысь мыжсӧ. Петкӧдлы налы бур туйсӧ, кыті налы колӧ мунны, да мӧдӧд зэрсӧ Аслад му вылӧ, мый Тэ вичмӧдін Аслад войтырыдлы.

²⁸ Налӧн му вылӧ кӧ пуксяс тшыг кад либӧ паськалас пӧрӧс висьӧм, налысь няньсӧ кӧ бырӧдас сотысь тӧвру, кутшӧмкӧ висьӧм, саранча либӧ лёльӧ, налӧн му вылӧ кӧ уськӧдчас вӧрӧг, суас кӧ найӧс ускӧттьӧ либӧ висьӧм,

²⁹ но Тэнад Израиль войтырысь кӧ кӧть ӧти морт либӧ ставнас войтырыд шыасяс Тэ дінӧ да кевмысяс аслас шог да ускӧттьӧ дырйи, и найӧ кӧ нюжӧдасны кинысӧ тайӧ крамланьыс,

³⁰ сэки Тэ кыв найӧс енэжсяньыд, Аслад оланінсянь, да прӧстит найӧс. Тэ ӧд тӧдан быдӧнлысь сьӧлӧмсӧ, сӧмын ӧтнадӧн Тэ тӧдан мортлысь сьӧлӧмсӧ. Мынтысь быдӧнлы сылӧн уджъясыс серти,

³¹ медым Тэнад войтырыд став олӧм чӧжыс оліс Тэысь полӧмӧн-вежавидзӧмӧн да ветліс Тэнад туйӧд сійӧ муас, мый Тэ сетін миян батьяслы.

³² Весиг кӧ йӧз муысь локтысь, коді абу Тэнад Израиль войтыр пӧвстысь, локтас ылі муысь Тэнад ыджыд нимыд, вына киыд да ён сойыд вӧсна и кутас кевмысьны тайӧ крамланьыс бергӧдчӧмӧн,

³³ сэки Тэ кыв сійӧс енэжсяньыд, Аслад оланінсянь. Кора Тэнӧ, вӧч йӧз муысь локтысьлӧн кевмӧм серти, медым мувывса войтыръяс тӧдісны Тэнсьыд нимтӧ да Тэнад Израиль войтырыд моз полісны-вежавидзисны Тэысь. Сэки найӧ тӧдмаласны, мый Тэнад нимлы сиӧма тайӧ крамсӧ, мый ме лэпті.

³⁴ Тэнад тшӧктӧм серти кӧ Тэнад войтырыд тышӧ петас вӧрӧглы паныд, кутас кевмысьны Тэныд да бергӧдчас Тэнад бӧрйӧм карлань да крамлань, мый ме лэпті Тэныд,

³⁵ сэки Тэ кыв налысь корӧм-кевмӧмсӧ енэжсяньыд да отсав налы.

³⁶ Но кор найӧ мыж вӧчасны Тэныд паныд, ӧд мыж вӧчтӧм мортыс абу, и Тэ скӧрман на вылӧ да сетан найӧс вӧрӧг киӧ, и кор найӧс нуӧдасны пленӧ ылӧ либӧ матӧ,

³⁷ и сэні кӧ найӧ сьӧлӧмсяньныс бергӧдчасны да Тэ водзын кевмысьӧмӧн висьтасясны, ми пӧ мыжмим, лёксӧ да мыжсӧ вӧчим,

³⁸ и став сьӧлӧмсяньныс кӧ шыасясны Тэ дінӧ вӧрӧг муын, кытчӧ найӧс нуӧдісны, пондасны кевмысьны да кевмысиганыс бергӧдчасны асланыс мулань, мый Тэ сетін налӧн батьяслы, карлань, мый Тэ бӧрйин, да крамлань, мый ме лэпті Тэныд,

³⁹ сэки Тэ кыв налысь корӧм-кевмӧмсӧ енэжсяньыд, Аслад оланінсянь, да отсав налы. Прӧстит Ассьыд войтыртӧ, ӧд найӧ мыж вӧчисны Тэныд паныд.

⁴⁰ Енмӧй, Тэнад синмыд мед аддзас, Тэнад пельыд мед кылас тайӧ крамас кевмысьӧмсӧ.

⁴¹ Господьӧй Енмӧй, чеччы да лок Аслад шойччанінӧ, Тэ да Тэнад выныдлӧн кудйыс, локтӧй! Господьӧй Енмӧй, Тэнад попъясыд мед вевттьысясны мездлунӧн, Тэнад эскана войтырыд мед нимкодясяс Тэнад бурлунысь.

⁴² Господьӧй Енмӧй, эн ӧтдорт Ассьыд мавтыштӧматӧ, эн вунӧд Ассьыд буралӧмтӧ Давид кесйӧгыд дінӧ».