2 Каднебӧг 4 - Коми Библия 2023

Крамса дозмук-кӧлуй

¹ Соломон вӧчӧдіс ыргӧн висьпуктанін, кузьта-пасьтанас кызь гырддза, судтанас дас гырддза.

² Соломон вӧчӧдіс ыргӧнысь ыджыд гӧгрӧс вайӧртӧд, шуисны сійӧс саридзӧн. Ӧтар дорышсяньыс мӧдар дорышӧдзыс сійӧ вӧлі дас гырддза пасьта, джуджданас вӧлі вит гырддза, а гӧгӧртны кӧ сійӧс кӧвйӧн, колана вӧлі комын гырддза кузьта кӧв.

³ Вайӧртӧд улын гӧгӧрыс кык визьӧн сулалісны сывдӧмӧн вӧчӧм ӧшъяс, быд гырддза пасьтаын сулаліс дас ӧш. Ӧшъяссӧ вӧлі ӧтторъя сывдӧма вайӧртӧдыскӧд.

⁴ Вайӧртӧдыс сулаліс дас кык ӧш вылын: куим ӧшкыс видзӧдісны войвылӧ, куимыс – рытыввылӧ, куимыс – лунвылӧ, и куимыс – асыввылӧ. Ӧшъяслысь бекнысӧ вӧлі веськӧдӧма вайӧртӧд шӧрлань, на вылӧ и мыджсис вайӧртӧдыс.

⁵ Вайӧртӧдлӧн стенмыс вӧлі ки пыдӧс кызта, а дорышыс вӧлі чаша сяма, лилия дзоридз кодь. Сэтчӧ тӧрис куим сюрс бат мында ва.

⁶ Соломон вӧчӧдіс дас ыджыд мыссян доз. Витсӧ сувтӧдісны вайӧртӧд веськыдладорас, а мӧд витсӧ – шуйгаладорас. Тайӧ дозъясас мыськалісны пемӧсъяслысь яйсӧ, мый дасьтісны сотан вись вайӧм вылӧ. А вайӧртӧдас мыссисны попъяс.

⁷ Соломон вӧчӧдіс дас зарни бикок, кыдзи колӧ вӧлі найӧс вӧчнысӧ. Найӧс сувтӧдісны крамӧ, витсӧ – веськыдладорас, а мӧд витсӧ – шуйгаладорас.

⁸ Соломон вӧчӧдіс дас пызан. Найӧс сувтӧдісны крамӧ, витсӧ – веськыдладорас, а мӧд витсӧ – шуйгаладорас. Нӧшта зарниысь вӧчисны вир резан сё тасьті.

⁹ Соломон вӧчӧдіс ыджыд йӧр, попъяслы йӧр да йӧръясас пыран дзиръяяс. Дзиръяяссӧ эжисны ыргӧнӧн.

¹⁰ Вайӧртӧдсӧ сувтӧдісны крамлӧн веськыдладорас, асыв-лунвывлань.

¹¹ Хирам вӧчис пӧим воръяс, пӧим куралан зыръяс да вир резан тасьтіяс [тшӧтш тшынӧдчан дозъяс да вись ваян дозъяс] – Енлӧн крамса став дозмук-кӧлуйсӧ, мый сылы тшӧктіс вӧчны Соломон ӧксы.

¹² Вӧчис кык ыджыд сюръя да сюръя йылас чаша сяма юръяс, найӧс кытшалӧм-вевттьӧм могысь чепъясысь вӧчис кык мичмӧдантор.

¹³ Мичмӧданторъяс вылас вӧчис гранат кодь нёльсё сяр – кык визьӧн быд мичмӧдантор вылӧ, медым вевттьыны сюръяяслысь юрсӧ.

¹⁴ Вӧчис дас мыссян доз да на улӧ дас джек,

¹⁵ вайӧртӧд да сы улын сулалысь дас кык ӧшкӧс,

¹⁶ пӧим воръяс, пӧим куралан зыръяс да яй бергӧдлан вилаяс. Став дозмук-кӧлуйыс, мый Хирам-Ави вӧчис Соломон ӧксылы Господьлӧн крамӧ, вӧлі весалӧм-мольӧдӧм ыргӧнысь.

¹⁷ Тайӧ дозмук-кӧлуйсӧ сывдісны-вӧчисны ӧксылӧн тшӧктӧм серти сёйӧд муын Йӧрдан ковтысын, Суккот да Цереда каръяс костын.

¹⁸ Дозмук-кӧлуйсӧ вӧчисны сы мында, мый весиг эз вермыны артавны, уна-ӧ ыргӧн муніс найӧс сывдӧм вылӧ.

¹⁹ Таысь кындзи Енлӧн крамӧ Соломон вӧчӧдіс уна мукӧдтор: зарни висьпуктанін, вежа няньлы пызанъяс,

²⁰ весалӧм зарниысь бикокъяс да би дозъяс, медым ӧзъялісны Вежасьыс-вежаин водзын, кыдзи индӧма.

²¹ Нӧшта медбур зарниысь Соломон вӧчӧдіс дзоридзьяс, би дозъяс да чепӧляяс,

²² весалӧм зарниысь вӧчӧдіс пуртъяс, вир резан тасьтіяс, кӧшъяс да пӧим воръяс. Зарниысь вӧчисны тшӧтш крампытшкӧсса ӧдзӧсъяс – Вежаинӧ да Вежасьыс-вежаинӧ пыран ӧдзӧсъяс.