2 Каднебӧг 35 - Коми Библия 2023

Ыджыд лун пасйӧм

¹ Ерусалимын Иосей пасйис Господьлы сиӧм Ыджыд лун. Медводдза тӧлысьлӧн дас нёльӧд лунӧ начкисны ыджыдлунся баляӧс.

² Попъяслы Иосей индіс вӧчны ассьыныс уджсӧ да ышӧдіс найӧс кесъявны Господьлӧн крамын.

³ Господьлы вежӧдӧм-торйӧдӧм левитъяслы, Израиль войтырӧс туйдӧдысьяслы, Иосей шуис: «Тіянлы оз нин ков новлӧдлыны пельпом выланыд вежа кудсӧ, ӧд сійӧс сувтӧдӧма крамӧ, мый лэптіс Давидлӧн Соломон пиыс, израильса ӧксы. Ӧні кесъялӧй Господьлы, асланыд Енлы, да Сылӧн Израиль войтырлы.

⁴ Юксьӧй рӧд сертиныд котыръясӧ, кыдзи тшӧктісны израильса Давид ӧксы да сылӧн Соломон пиыс.

⁵ Сулалӧй крамын котыръясӧн, медым войтырлӧн быд рӧдлы кесъяліс ӧти котыр.

⁶ Вежӧдӧй-сӧстӧммӧдӧй асьнытӧ, начкӧй ыджыдлунся баляӧс да дасьтӧй сійӧс асланыд войтырлы. Ставсӧ вӧчӧй сідзи, кыдзи Господь тшӧктіс Мӧисей пыр».

⁷ Аслас пемӧс чукӧрысь Иосей ӧксы сетіс войтырыслы ыджыдлунся вись пыдди комын сюрс баляӧс да кӧзапиӧс, аслас овмӧсысь сетіс тшӧтш налы вись пыдди куим сюрс ӧшкӧс.

⁸ Ӧксылӧн киподувса юралысьяс ас кӧсйӧм сертиныс сетісны войтырыслы, попъяслы да левитъяслы козинъяс. Тайӧ юралысьясыс пӧвстысь Хилки, Закар да Ехиэл – Енлӧн крамын веськӧдлысьяс – сетісны попъяслы ыджыдлунся вись пыдди кык сюрс квайтсё баляӧс да кӧзапиӧс и куимсё ӧшкӧс,

⁹ а Конаний да сылӧн Шемай да Нафанаил вокъясыс, нӧшта левитъяслӧн юралысьясыс – Хашавий, Евэл да Иозавад – сетісны левитъяслы ыджыдлунся вись пыдди вит сюрс баляӧс да кӧзапиӧс и витсё ӧшкӧс.

¹⁰ Кор ставсӧ вӧлі дасьтӧма кесъялӧм кежлӧ, сэки ӧксылӧн тшӧктӧм серти попъяс сувтісны асланыс местаӧ, а левитъяс сувтісны котыръясӧн.

¹¹ Левитъяс начкисны ыджыдлунся баляясӧс, кулисны налысь кучиксӧ, а вирсӧ сетісны попъяслы. Тайӧ вирнас попъяс резісны висьпуктанінсӧ.

¹² Левитъяс торйӧдісны висьяслысь юкӧнъяссӧ, мый колӧ вӧлі вайны сотан вись пыдди, да юклісны войтырыслы рӧд сертиныс, медым вись вайны Господьлы, кыдзи гижӧма Мӧисей небӧгын.

¹³ Ыджыдлунся баляясӧс левитъяс пражитісны би вылын, кыдзи вӧлі тшӧктӧма вӧчны, а вежа вись пыдди вайӧм ӧшъяслысь яйсӧ найӧ пуисны гырничьясын да пӧртъясын да дзик пыр сеталісны войтырыслы.

¹⁴ Та бӧрти левитъяс дасьтісны ыджыдлунся баляӧс аслыныс да попъяслы. Ӧд попъяс, Ааронсянь чужысьяс, сёр рытӧдз вайисны сотан висьяс да сотісны пемӧсъяслысь госсӧ.

¹⁵ Давид ӧксылӧн да сылӧн Асаф, Еман да Едутун пророкъяслӧн тшӧктӧм серти сьылысьяс, Асафсянь чужысьяс, сулалісны асланыс местаын. Быд дзиръя дорын сулалісны дзиръя видзысьяс. Сьылысьяслӧн да дзиръя видзысьяслӧн вокъясыс, левитъяс, дасьтісны налы ыджыдлунся баляӧс, та вӧсна налы эз вӧв колана мунны асланыс кесъяланінысь.

¹⁶ Тадзи сійӧ лунӧ вӧлі лӧсьӧдӧма Господьлы кесъялӧм, медым Иосей ӧксылӧн тшӧктӧм серти пасйыны Ыджыд лун да вайны сотан висьяс Господьлӧн висьпуктанін вылын.

¹⁷ Ерусалимӧ чукӧртчӧм Израиль войтыр пасйис Ыджыд лун. Та бӧрын сизим лун чӧж нӧшта пасйисны Шомтӧм нянь сёян лунъяс.

¹⁸ Израильын тадзисӧ эз на пасйывны Ыджыд лунсӧ Самуил пророклӧн олан лунъяссянь. Весиг ӧти израильса ӧксы эз пасйывлы Ыджыд лунсӧ сідзи, кыдзи ӧні пасйисны сійӧс Иосей ӧксы, попъяс, левитъяс, став Иуда войтырыс, Израильысь локтӧмаяс да Ерусалимын олысьяс.

¹⁹ Тайӧ Ыджыд лунсӧ вӧлі пасйӧма Иосейлӧн дас кӧкъямысӧд ӧксыалан воӧ.

Иосей ӧксылӧн кулӧм

²⁰ [Иосей ӧксы сотіс Ерусалим карын да став Иуда муын туналысьясӧс да ылӧгсӧ водзвыв юӧртысьясӧс, сотіс бӧлбанъяс, идолъяс да идолъяслы юрбитанінъяс. Тадзи сійӧ збыльмӧдіс Индӧд кывъяссӧ, мый вӧлі гижӧма небӧгӧ, кодӧс аддзис Господьлӧн крамысь Хилки поп. Таӧдз эз вӧв Иосей кодь ӧксыыс, коді эськӧ став сьӧлӧмнас, олӧмнас да став выннас шыасис Господь дінӧ да оліс Мӧисейлӧн Индӧд серти. И Иосейлӧн кулӧм бӧрти сы кодь ӧксыыс эз вӧв. Но Господь эз кусӧд Ассьыс ыджыд скӧрлунсӧ. Господьлӧн скӧрлуныс ыпъяліс Иуда вылӧ, ӧд Манассей ёна дӧзмӧдіс Сійӧс. Господь шуис: «Израильӧс моз Ме ӧтдорта Иуда войтырӧс. Ме эновта Ерусалим кар, мый Ме бӧрйи, и крам, мый йылысь Ме шулі, мый сэні лоас Менам нимӧй».] Сы бӧрти, кор Иосей ӧксы выльысь лӧсьӧдіс крамын кесъялӧмсӧ, египетса Неко ӧксы мӧдӧдчис уськӧдчыны Каркемис кар вылӧ, мый сулаліс Ефрат ю дорын. Иосей ӧксы петіс сылы паныд тышӧ.

²¹ Неко мӧдӧдіс ассьыс йӧзсӧ да тшӧктіс шуны Иосейлы: «Ме ог тэкӧд кӧсйы тышкасьны, иудаса ӧксы. Ме эг тэныд паныд пет, а аслам вӧрӧглы паныд петі. Енмыс тшӧктӧ менӧ тэрмасьны. Эн пыксьы Енмыслы, медым Сійӧ эз бырӧд тэнӧ, ӧд Енмыс мекӧд».

²² Но Иосей дасьтысис тыш кежлӧ, эз бӧрыньтчы. Сійӧ эз кывзы Неколысь Енсянь висьталӧм кывъяссӧ, и Мегиддо ковтысын паніс тыш.

²³ Ньӧвйӧн лыйсьысьяс лыйисны Иосей ӧксылы, и сійӧ шуис аслас кесйӧгъяслы: «Петкӧдӧй менӧ татысь, менӧ чорыда дойдісны».

²⁴ Кесйӧгъясыс босьтісны сійӧс тарантассьыс, пуктісны мӧд тарантасӧ да нуисны Ерусалимӧ. Сэні сійӧ кувсис. Сійӧс дзебисны батьясыслӧн дзебанінӧ. Став Иуда войтырыс да Ерусалимын олысьяс бӧрдісны Иосей вӧсна.

²⁵ Еремей сьыліс Иосей йылысь бӧрдан сьыланкыв. Сьылысьяс талунъя лунӧдз сьылӧны Иосей йылысь бӧрдан сьыланкыв. Тайӧ сьыланкывсӧ пыртӧма бӧрдан сьыланкывъяс лыдӧ, Израильын ӧнӧдз сійӧс сьылӧны.

²⁶ Став бурыс йылысь, мый Иосей ӧксы вӧчис Господьлӧн Индӧд серти, сылӧн мукӧд уджъясыс йылысь

²⁷ да сылӧн ӧксыалӧм дырйи лоӧмторъяс йылысь водзысяньыс и помӧдзыс гижӧма израильса да иудаса ӧксыяслӧн небӧгӧ.